ប្រជាពលរដ្ឋប្រមាណ១០០នាក់ មកពីខេត្តមួយចំនួន បានបន្តប្រមូលផ្តុំគ្នានៅគៀនរបងក្រសួងមហាផ្ទៃកាលពីព្រឹកថ្ងៃចន្ទ ដើម្បីប្រឆាំងនឹងការចាប់ខ្លួនលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា(CCFC) និងសហការីរបស់លោក២នាក់ ដែលកំពុងបន្តស្ថិតក្រោមការសួរនាំនៅតុលាការខេត្តរតនគិរី។
លោក ថេង សាវឿន និងសហការីរបស់លោក២នាក់ ត្រូវបានសមត្ថកិច្ចខេត្តក្រចេះ ឃាត់ខ្លួនកាលពីថ្ងៃពុធសប្តាហ៍មុន ក្រោមការបញ្ជារបស់ស្នងការនគរបាលខេត្តរតនគិរី។ ការឃាត់ខ្លួននេះ ធ្វើឡើង ខណៈលោកនិងក្រុមការងារកំពុងធ្វើដំណើរមករាជធានីភ្នំពេញវិញ កាត់តាមខេត្តក្រចេះក្រោយបញ្ចប់វគ្គបណ្តុះបណ្តាល និងការដើរលេងកម្សាន្តនៅក្នុងខេត្តរតនគិរី។
គិតត្រឹមរសៀល ថ្ងៃចន្ទនេះ គេមិនទាន់ដឹងថាតុលាការខេត្តរតនគិរីចោទប្រកាន់សកម្មជនការពារសិទ្ធិដីធ្លីខាងលើយ៉ាងណាទេ។ ប៉ុន្តែបើតាមការបញ្ជាក់របស់រដ្ឋលេខាធិការ និងជាអ្នកនាំពាក្យក្រសួងមហាផ្ទៃលោក ខៀវ សុភ័គ អាជ្ញាធរមានសមត្ថកិច្ចសង្ស័យថាសកម្មជនទាំង៣នាក់នោះ មានផែនការធ្វើ «បដិវត្តន៍កសិករ» តាមវិធីសាស្ត្ររបស់មេខ្មែរក្រហម ប៉ុល ពត។
ពលរដ្ឋមកពីខេត្តកោះកុង អ្នកស្រី ស៊ឹម ថន អាយុ ៣៤ ឆ្នាំ ប្រាប់វីអូអេនៅក្រៅរបងក្រសួងមហាផ្ទៃ នៅថ្ងៃចន្ទនេះថា ទាំងលោក ថេង សាវឿន និងសហការីគាត់គ្មានបំណងធ្វើបដិវត្តន៍កសិករទេ គឺអ្នកទាំង៣ គ្រាន់តែបានបង្រៀនកសិករឱ្យដឹងពីរបៀបបង្កបង្កើនផល ដោយមិនប្រើជីគីមី និងការចិញ្ចឹមសត្វជាដើម។
អ្នកស្រីស្នើសុំឱ្យក្រសួងមហាផ្ទៃ និងអាជ្ញាធរពាក់ព័ន្ធដោះលែង សកម្មជនទាំង៣នាក់នោះ ព្រោះពួកគេគ្មានកំហុស។ អ្នកស្រីចាត់ទុកថាការឃាត់ខ្លួនអ្នកទាំង៣ គឺជារឿងអយុត្តិធម៌។
អ្នកស្រីថ្លែងថា៖ «អយុត្តិធម៌ណាស់ សម្រាប់ពួកគាត់ ព្រោះពួកគាត់មិនមានកំហុសអីផង ហេតុអីបានចាប់ពួកគាត់។ ពួកគាត់ជួយប្រជាពលរដ្ឋទូទាំងប្រទេស ដើម្បីជួយឱ្យលើកស្ទួយកសិករ។ ហេតុអ្វីបានគាត់ទៅមានឈ្មោះជាប់តុលាការ ជាប់ឃុំអ៊ីចឹង»។
លោក វង់ គាង អាយុ២៨ឆ្នាំ ពលរដ្ឋម្នាក់ទៀតមកពីខេត្តកោះកុងក៏ស្នើឱ្យអាជ្ញាធរដោះលែងលោក ថេង សាវឿន និងសហការី២នាក់ទៀត គឺលោក ថាន់ ហាច មន្ត្រីសម្របសម្រួលសហគមន៍ និងលោក ញ៉ិល ភាព មន្ត្រីជាន់ខ្ពស់នៃសមាគមសម្ព័ន្ធសហគមន៍កសិករកម្ពុជា។ លោកបន្ថែមថា សកម្មជនទាំង៣មិនបានប្រព្រឹត្តកំហុសដែលត្រូវអាជ្ញាធរឃាត់ខ្លួននោះទេ។
លោកថ្លែងថា៖ «ជួយដោះលែងពួកគាត់»។
ស្រដៀងគ្នានេះដែរ អ្នកតវ៉ាម្នាក់ទៀត គឺអ្នកស្រី ហុន ហន អាយុ៥៥ឆ្នាំ លើកឡើងថា ក្រសួងមហាផ្ទៃគួរតែជួយសម្រួលឱ្យមានការដោះលែងអ្នកទាំង៣ ក្រោមហេតុផលពួកគាត់គ្មានផែនការញុះញង់ឱ្យពលរដ្ឋក្រោកឈរប្រឆាំងរដ្ឋាភិបាល ហើយថាសកម្មជនទាំង៣នាក់នោះបានត្រឹមជួយផ្តល់គ្រាប់ពូជបន្លែ និងពូជសត្វ ក៏ដូចជាជួយកសិករក្នុងការតស៊ូមតិជំទាស់នឹងការរំលោភបំពានសិទ្ធិដីធ្លីពីអ្នកមានអំណាច និងឥទ្ធិពលនៅខេត្តកោះកុង។
អ្នកស្រីប្រាប់វីអូអេថា៖ «គាត់ចិត្តល្អណាស់ជួយប្រជាពលរដ្ឋយើង ដូចថាខេត្តកោះកុង ខេត្តណាក៏គាត់ជួយដែរ ឱ្យតែប្រជាពលរដ្ឋក្រីក្រ គាត់នៅជួយ។ ជួយដូចថា គ្រាប់ពូជ អត់លុយ អត់កាក់ជួយទេ មានតែគ្រាប់ពូជ មានមេមាន់ ដូចថា ជ្រូកទា អ៊ីចឹង»។
យ៉ាងណាក៏ដោយ អ្នកនាំពាក្យក្រសួងមហាផ្ទៃលោក ខៀវ សុភ័គ ប្រាប់វីអូអេថា ករណីលោក ថេង សាវឿន កំពុងស្ថិតក្នុងដៃរបស់តុលាការខេត្តរតនគិរី ក្រោយអាជ្ញាធរមានសមត្ថកិច្ចក្នុងខេត្តរតនគិរីសង្ស័យថា វគ្គបណ្តុះបណ្តាល ពង្រឹងសមត្ថភាពរបស់ក្រុមការងារសមាគមសម្ព័ន្ធសហគមន៍កសិករកម្ពុជា មានចរឹតនយោបាយ ព្រោះបើតាមឯកសារ និងម៉ាស៊ីនកំព្យូទ័រដែលអាជ្ញាធរមានសមត្ថកិច្ចរឹបអូសបាន មេរៀនរបស់ពួកគេបង្កប់ខ្លឹមសារញុះញង់ឱ្យពលរដ្ឋអ្នកក្រស្អប់ពលរដ្ឋអ្នកមាន ដូចអ្វីដែលក្រុមខ្មែរក្រហមបានធ្វើកាលពីអតីតកាល។
លោកថ្លែងថា៖ «របបប្រល័យពូជសាសន៍ខ្មែរក្រហមបានប្រើប្រាស់ មេរៀននេះនៅខេត្តរតនគិរីហ្នឹងឯង តាមរយៈអង្គការរបស់ពួក ប៉ុល ពត ដែលញុះញង់កសិករទៅធ្វើការបដិវត្តន៍។ បន្ទាប់ពីមានការសង្ស័យអ៊ីចឹង ក៏ស្នងការដ្ឋាននគរបាលខេត្តរតនគិរី បានស្នើសុំឱ្យស្នងការនគរបាលខេត្តក្រចេះហ្នឹង ឃាត់ខ្លួនអ្នករួមដំណើរហ្នឹងបញ្ជូនទៅខេត្តរតនគិរីដើម្បីធ្វើការសួរនាំ»។
វីអូអេមិនទាន់អាចទាក់ទងសុំការអត្ថាធិប្បាយពីលោក កែវ ភក្តី ព្រះរាជអាជ្ញារងនៃសាលាដំបូងខេត្តរតនគិរី តាមទូរសព្ទ បាននៅឡើយទេ។
អ្នកនាំពាក្យសមាគមសិទ្ធិមនុស្សអាដហុក លោក ស៊ឹង សែនករុណា ដែលបានឃ្លាំមើលករណីឃាត់ខ្លួនមេដឹកនាំ និងមន្ត្រីរបស់សមាគមសម្ព័ន្ធសហគមន៍កសិករកម្ពុជា ឱ្យដឹងថា គិតត្រឹមរសៀលថ្ងៃចន្ទ អយ្យការអមសាលាដំបូងខេត្តរតនគិរីមិនទាន់ធ្វើការចោទប្រកាន់នៅឡើយមកលើលោក ថេង សាវឿន និងសហការីរបស់លោក ដោយនៅបន្តនីតិវិធីសាកសួរ។ លោកបន្ថែមថា ក្រុមគ្រួសារ និងមេធាវីត្រូវបានអនុញ្ញាតឱ្យចូលជួបសួរសុខទុក្ខ ហើយភាគីអយ្យការនៅបន្តសាកសួរជនសង្ស័យម្នាក់ទៀត គឺលោក ញ៉ិល ភាព មុននឹងបញ្ជូនទៅចៅក្រមស៊ើបសួរ និងបន្តនីតិវិធីផ្សេងទៀត ពាក់ព័ន្ធនឹងការសម្រេចឃុំខ្លួន ឬយ៉ាងណានោះ៕
