មនុស្សរាប់រយនាក់ បានប្រមូលផ្តុំគ្នាកាលពីថ្ងៃចន្ទនៅសាលាក្រុងក្នុងទីក្រុង Gilroy នៃរដ្ឋកាលីហ្វ័រញ៉ាដើម្បីគោរពវិញ្ញាណក្ខន្ធជនរងគ្រោះដែលបានសម្លាប់ និងរងរបួសដោយសារក្មេងជំទង់ម្នាក់ដែលបានវាយប្រហារទៅលើពិធីម្ហូបអាហារដ៏មានប្រជាប្រិយភាព។
មនុស្សដែលចូលរួមពិធីនោះបានដុតទៀនស្តាប់សុន្ទរកថារបស់មេដឹកនាំមូលដ្ឋានហើយនិងចូលរួមពីធីច្រៀងថា «ទីក្រុង Gilroy ដ៏ខ្លាំង»។
លោក Roland Velascoអភិបាលក្រុង បាននិយាយថា «យើងមិនអាចឲ្យជនចង្រៃនោះបំផ្លាញយើងបានទេ»។
ពួកអាជ្ញាធរ នៅតែកំពុងព្យាយាមស្វែងរកមូលហេតុនៅពីខាងក្រោយនៃការវាយប្រហារកាលពីថ្ងៃសៅរ៍សប្តាហ៍មុននៅក្នុងទីក្រុងនេះដែលស្ថិតនៅចម្ងាយ១៧០គីឡូ ម៉ែត្រពីទីក្រុង San Francisco។
លោក Scot Smithee ប្រធានប៉ូលិសក្រុង Gilroy និយាយថា អ្នកបាញ់ប្រហារនោះត្រូវ បានកំណត់អត្តសញ្ញាណថា William Legan អាយុ១៩ឆ្នាំ បានប្រើកាំភ្លើងវែងវាយប្រហារនៅថ្ងៃចុងក្រោយរបស់ពិធីក្នុងក្រុង Gilroy។
អ្នកស្លាប់រួមមានក្មេងប្រុសអាយុ៦ឆ្នាំម្នាក់ ក្មេងស្រីអាយុ១៣ឆ្នាំម្នាក់ហើយនិងបុរសម្នាក់ខ្ទង់អាយុ២០ឆ្នាំប្លាយ។ អ្នកចូលរួមពិធីនោះ១២នាក់ទៀត បានរងរបួសក្នុងការវាយប្រហារ ដែលបានបញ្ចប់ដោយប៉ូលិសបានសម្លាប់អ្នកបាញ់ប្រហារនោះ។
លោក Smithee ប្រធានប៉ូលិសក្រុង Gilroy បានប្រាប់ពួកអ្នកយកព័ត៌មានកាលពីថ្ងៃចន្ទថា ប៉ូលិស បានធ្វើការឆ្លើយតបមិនដល់រយៈពេលមួយនាទីបន្ទាប់ពីអ្នកបាញ់ប្រហារនោះបានបើកការបាញ់ប្រហារ៕
