មេដឹកនាំកំពូលៗវៀតណាមបានប្តេជ្ញាប្រែក្លាយប្រទេសនេះទៅជាយ៉ាងហោចណាស់ប្រទេសប្រាក់ចំណូលមធ្យមក្នុងរយៈពេល៥ឆ្នាំខាងមុខ តាមរយៈការទាក់ទាញការវិនិយោគបរទេសឱ្យមកធ្វើការផលិតនៅក្នុងប្រទេសឱ្យបានកាន់តែច្រើន។ នេះជាគោលដៅមួយដែលនឹងធ្វើឱ្យប្រទេសនេះងើបពីភាពក្រីក្រយ៉ាងខ្លាំងក្នុងទសវត្សរ៍ឆ្នាំ១៩៨០។
គណៈកម្មាធិការមជ្ឈិមបក្សកុម្មុយនិស្តបានបូកសរុបលទ្ធផលក្នុងសម័យប្រជុំពេញអង្គរបស់ខ្លួនកាលពីថ្ងៃទី៨ ខែតុលា ដែលធ្វើឡើងដោយផ្តោតលើគោលដៅម៉ាក្រូសេដ្ឋកិច្ច ហើយអនុរដ្ឋមន្ត្រីផែនការបាននិយាយដាច់ដោយឡែកថា ពលរដ្ឋវៀតណាមគួរតែអាចរកចំណូលបានប្រមាណ៥.០០០ដុល្លារក្នុងមួយឆ្នាំជាមធ្យមនៅត្រឹមឆ្នាំ២០២៥ ដែលជាចំនួនកើនពី២.៧៥០ដុល្លារនៅពេលនេះ។
ប្រទេសវៀតណាមអាចឈានទៅដល់ផែនការនេះពោលគឺថាក្លាយជាប្រទេសប្រាក់ចំណូលមធ្យម ឬប្រាក់ចំណូលមធ្យមកម្រិតខ្ពស់ (ដែលនេះជាពាក្យបច្ចេកទេសរបស់ធនាគារពិភពលោក) ដោយធ្វើការពង្រឹងកំណែទម្រង់សេដ្ឋកិច្ចរយៈពេល១០ឆ្នាំរបស់ខ្លួនដែលឥឡូវនេះទាក់ទាញអ្នកវិនិយោគបរទេសឱ្យមកវិនិយោគនៅក្នុងប្រទេសនេះ។ ប្រទេសវៀតណាមត្រូវបានគេឃើញថាជាប្រទេសផលិតកម្ម ដែលមានសមត្ថភាពប្រហាក់ប្រហែលទៅនឹងប្រទេសចិនដែលមានរោងចក្រច្រើនជាងគេបង្អស់នៅក្នុងពិភពលោក។
ការវិនិយោគបរទេសបង្កើតការងារ និងលើកកម្ពស់ប្រាក់ចំណូលរបស់ប្រជាជនវៀតណាមដែលមានពលរដ្ឋសរុបចំនួន៩៧លាននាក់។ ប្រទេសវៀតណាមនៅពេលនេះជាប្រទេសប្រាក់ចំណូលមធ្យមកម្រិតទាប។
រដ្ឋាភិបាលទំនងនឹងបង្កើតចំណូលបន្ថែមទៀតតាមរយៈការធ្វើឱ្យប្រសើរឡើងនូវហេដ្ឋារចនាសម្ព័ន្ធ និងផ្តល់ការលើកទឹកចិត្តដល់អ្នកវិនិយោគសម្រាប់ការផលិតគ្រឿងអេឡិចត្រូនិកដែលមានតម្លៃខ្ពស់។ អ្នកវិនិយោគដែលទទួលបានការលើកទឹកចិត្តសព្វថ្ងៃរួមមានក្រុមហ៊ុន Intel និងក្រុមហ៊ុន Samsung Electronics។
ក្រុមហ៊ុន IHS Markit ជាក្រុមហ៊ុនស្រាវជ្រាវដែលមានមូលដ្ឋាននៅក្នុងក្រុងឡុងដ៍ ហើយលោក Rajiv Biswas ជាអ្នកសេដ្ឋកិច្ចជាន់ខ្ពស់ថ្នាក់តំបន់នៃក្រុមហ៊ុននេះនៅក្នុងប្រទេសសិង្ហបុរី។ លោកបាននិយាយក្នុងសម្តីដើមថា «អ្វីដែលពួកគេបានធ្វើកាលពី១០ឆ្នាំមុន ហើយចាប់តាំងពីពេលនោះមកបានផ្តល់លទ្ធផលហើយ ដូច្នេះខ្ញុំមិនចង់និយាយថា ពួកគេមិនចាំបាច់ធ្វើអ្វីនោះទេ ប៉ុន្តែពួកគេស្ថិតនៅលើផ្លូវត្រូវហើយ ដោយសារតែមានគោលនយោបាយរួចទៅហើយ។ នេះជាសារដ៏សំខាន់។ គោលដៅរបស់ពួកគេគឺក្លាយជាប្រទេសប្រាក់ចំណូលមធ្យមកម្រិតខ្ពស់»។
សង្គ្រាម ការហ៊ុមព័ទ្ធសេដ្ឋកិច្ច និងការបាត់បង់ការគាំទ្រពីអតីតសូវៀតបានធ្វើឱ្យប្រជាជនវៀតណាមជាច្រើនស្ថិតក្នុងភាពក្រីក្រនៅក្នុងទសវត្សរ៍ឆ្នាំ១៩៨០។ ការបើកទ្វារចំហរបស់រដ្ឋាភិបាលនៅក្នុងឆ្នាំ១៩៨៦ចាប់ផ្តើមនាំយកការវិនិយោគចូលក្នុងប្រទេសនេះ។
លោក Sky Nguyen អាយុ២៤ឆ្នាំ ជាអតីតមគ្គទេសក៍ទេសចរណ៍ឯកជនសម្រាប់អ្នកទេសចរបរទេសនៅក្នុងក្រុងហូជីមិញ។ លោកទទួលបានការងារជាប្រធានផ្នែកលក់នៅក្រុមហ៊ុនអចលនទ្រព្យមួយ និងរំពឹងថា នឹងទទួលបានប្រាក់ចំណូលល្អពីការងារនេះ។ លោកកំពុងលក់អចលនទ្រព្យនៅក្នុងបរិវេណកន្លែងលំហែកាយតាមឆ្នេរសមុទ្រដែលមានទំហំ៩០០ហិកតា ហើយទីនោះជាកន្លែងដែលអ្នកវិនិយោគមកពីប្រទេសសិង្ហបុរី និងហូឡង់មានគម្រោងអភិវឌ្ឍន៍រួចទៅហើយ។
លោកNguyen បាននិយាយថា «វិស័យអចលនទ្រព្យសម្រាប់ប្រទេសវៀតណាមទាំងមូលនឹងមិនធ្លាក់ចុះនោះទេ។ វាកើនឡើងបន្តិចបន្តួចយឺតៗ»។
លោកNguyenបានបោះបង់ការងារក្នុងវិស័យទេសចរណ៍ បន្ទាប់ពីប្រទេសវៀតណាមបានបិទព្រំដែនរបស់ខ្លួននៅក្នុងខែមីនាដើម្បីបញ្ឈប់ករណីឆ្លងជំងឺកូវីដ១៩តាមការនាំចូលពីក្រៅ ដោយធ្វើឱ្យសណ្ឋាគារ និងមគ្គទេសក៍ទេសចរណ៍ជាច្រើនមានការងារតិចតួចធ្វើ។ អ្នកវិនិយោគលើកន្លែងលំហែកាយកំពុងពឹងផ្អែកលើការងើបឡើងវិញនៃវិស័យទេសចរណ៍នេះ។
ការបិទអាជីវកម្មដោយសារតែជំងឺរាតត្បាតបានប៉ះពាល់ដល់ការងារនៅទូទាំងពិភពលោក និងធ្វើឱ្យតម្រូវការអ្នកប្រើប្រាស់ធ្លាក់ចុះ ប៉ះពាល់ដល់រោងចក្រវៀតណាមដែលផលិតសម្លៀកបំពាក់ ស្បែកជើង និងគ្រឿងសង្ហារិមសម្រាប់ការនាំចេញ។
សេដ្ឋកិច្ចនឹងលូតលាស់ក្នុងអត្រាតែ២%ប៉ុណ្ណោះនៅក្នុងឆ្នាំនេះ នេះបើយោងតាមការទស្សន៍ទាយផ្លូវការមួយ ដែលនេះជាចំនួនធ្លាក់ចុះពី៦% ឬខ្ពស់ជាងនេះសម្រាប់រៀងរាល់ឆ្នាំសម្រាប់ប្រទេសវៀតណាមចាប់តាំងពីឆ្នាំ២០១២មក។ ទោះជាយ៉ាងនេះក្តី ក្រសួងវិនិយោគ និងផែនការបានកំណត់គោលដៅកំណើនក្នុងអត្រា៦% ទៅ៦,៥% សម្រាប់ឆ្នាំ២០២១។
ឯកសារបានមកពីកិច្ចប្រជុំសម័យពេញអង្គរបស់គណបក្ស និងកិច្ចប្រជុំនយោបាយផ្សេងទៀតនៅខែនេះមិនផ្តល់ផែនការលម្អិតសម្រាប់ការអនុវត្តទៅឆ្នាំ២០២៥នោះទេ ប៉ុន្តែអ្នកវិភាគជឿថា ពួកគេផ្តោតលើការងើបឡើងវិញក្រោយជំងឺរាតត្បាតនៅក្នុងឆ្នាំ២០២១ និងមានវិធានការផ្សេងៗដើម្បីលើកកម្ពស់ចំណូលតាមរយៈការទាក់ទាញរោងចក្របរទេសដែលផលិតទំនិញមានតម្លៃខ្ពស់ដូចជាទូរស័ព្ទដៃទំនើប (smartphone) ឱ្យមកវិនិយោគនៅក្នុងប្រទេស។
ប្រទេសវៀតណាមនៅរក្សាអត្រាឆ្លងមេរោគកូរ៉ូណាក្នុងកម្រិតទាបមួយ ដែលមានករណីឆ្លងសរុបចំនួន១.១៤៨ករណី។
លោក Frederick Burke ដែលជាដៃគូម្នាក់ប្រចាំនៅក្រុងហូជីមិញរបស់ក្រុមហ៊ុនមេធាវី Baker McKenzie បាននិយាយក្នុងសម្តីដើមថា «ពួកគេមានទំនុកចិត្តថា ពួកគេនឹងមានអត្រាកំណើនវិជ្ជមាន។ ពួកគេអាចគ្រប់គ្រងមេរោគកូរ៉ូណាបាន ប៉ុន្តែជំហានបន្ទាប់គឺជាជំហានដែលមានការលំបាកមួយ»។
លោក Biswas បាននិយាយថា មន្ត្រីរដ្ឋាភិបាលនឹងត្រូវសាងសង់ផ្លូវ និងអាកាសយានដ្ឋានបន្ថែមទៀតដើម្បីបន្តទាក់ទាញឱ្យមានការវិនិយោគចូលក្នុងប្រទេស។
គេហទំព័រសារព័ត៌មានក្នុងស្រុក VnExpress International បានរាយការណ៍ថា នៅត្រឹមឆ្នាំ២០២៥ ប្រទេសវៀតណាមត្រូវបានគេរំពឹងថា នឹងបញ្ចប់ផ្លូវល្បឿនលឿន North-South Expressway ដែលរត់ចាប់ពីក្រុងហាណូយនៅភាគខាងជើង ទៅខេត្ត Can Tho នៅភាគខាងត្បូងបំផុតរបស់ប្រទេសនេះ និងបញ្ចប់ដំណាក់កាលដំបូងនៃការសាងសង់អាកាសយានដ្ឋានអន្តរជាតិដែលអាចជួយដោះស្រាយបញ្ហានៅក្នុងក្រុងហូជីមិញ។ រោងចក្រផលិតត្រូវការហេដ្ឋារចនាសម្ព័ន្ធដែលមានគុណភាពក្នុងការដឹកជញ្ជូនវត្ថុធាតុដើម និងដឹកជញ្ជូនទំនិញសម្រាប់ការនាំចេញ។
គម្រោងវិនិយោគបរទេសជិត៣.៩០០ទទួលបានអាជ្ញាប័ណ្ណកាលពីឆ្នាំមុនដែលមានដើមទុនចុះបញ្ជីសរុបចំនួន៣៦២,៥ពាន់លានដុល្លារ ដែលជាចំនួនទឹកប្រាក់ខ្ពស់ជាងផលិតផលសរុបក្នុងស្រុករបស់វៀតណាមដែលមានទឹកប្រាក់២៦០ពាន់លានដុល្លារទៅទៀត។
លោក Jack Nguyen ជាដៃគូម្នាក់នៅក្រុមហ៊ុន Mazars ដែលជាក្រុមហ៊ុនប្រឹក្សាយោបល់ពាណិជ្ជកម្មនៅក្នុងក្រុងហូជីមិញបាននិយាយថា ដើម្បីនាំយកការវិនិយោគបន្ថែម រដ្ឋាភិបាលនឹងព្យាយាមលុបបំបាត់ការិយាធិបតេយ្យ និងអំពើពុករលួយក្នុងថ្នាក់មូលដ្ឋាន។ លោកបាននិយាយថា សភាពាណិជ្ជកម្មបរទេសនៅក្នុងប្រទេសវៀតណាមបានជំរុញឱ្យរដ្ឋលុបចោលបទប្បញ្ញត្តិមិនចាំបាច់នានា។
លោកបាននិយាយក្នុងសម្តីដើមថា «នៅពេលអ្នកទៅជួបជាមួយនឹងមន្ត្រីថ្នាក់ក្រោម តែងតែមានការិយាធិបតេយ្យ [និង] អំពើពុករលួយកំប៉ិកកំប៉ុក ប៉ុន្តែជារួមខ្ញុំគិតថា ឃើញមានឆន្ទៈជារួមមួយពីមន្ត្រីរដ្ឋាភិបាលថ្នាក់កំពូលចុះមកក្រោយដើម្បីគ្រាន់តែព្យាយាមធ្វើឱ្យការធ្វើអាជីវកម្មរបស់អ្នកវិនិយោគបរទេសមានភាពងាយស្រួលតាមតែអាចធ្វើទៅបាន»៕
