រដ្ឋាភិបាលទីក្រុងហាណូយបានបញ្ចេញប្រតិកម្មជាផ្លូវការឆ្លើយតបទៅនឹងសំណើរបស់រដ្ឋាភិបាលទីក្រុងភ្នំពេញ ដើម្បី«កំណត់អត្តសញ្ញាណ» និង «ចាត់វិធានការម៉ឺងម៉ាត់ប្រឆាំងនឹង» ជនជាតិវៀតណាមដែលបានបញ្ចេញយោបល់លើទំព័រហ្វេកប៊ុកប្រមាថលោកនាយករដ្ឋមន្ត្រី ហ៊ុន សែន និងបានរិះគន់ថាលោក ហ៊ុន សែន គាំទ្រការទាមទារកម្មសិទ្ធិប្រទេសចិនក្នុងរឿងក្ដីសមុទ្រចិនខាងត្បូង។
នៅក្នុងសេចក្ដីថ្លែងការណ៍ជាលាយលក្ខណ៍អក្សរមួយ លោក Le Hai Binh អ្នកនាំពាក្យក្រសួងការបរទេសវៀតណាម បានឲ្យដឹងថា៖
«ការបង្ហោះមតិផ្ទាល់ខ្លួនរបស់អ្នកប្រើប្រាស់អ៊ីនធឺណិតជនជាតិវៀតណាម «មិនឆ្លុះបញ្ចាំងពីទស្សនៈរបស់ប្រទេសវៀតណាមឡើយ»។
អ្នកនាំពាក្យរូបនេះនិយាយថា៖ «យើងមិនគាំទ្រជនណាដែលប្រើសេរីភាពក្នុងការបញ្ចេញមតិ ដើម្បីជេរប្រមាថអ្នកដទៃជាលក្ខណៈបុគ្គលក្នុងចេតនាបង្ករឿង ដែលបង្កើតជាទំនាស់រវាងប្រជាជនក្នុងប្រទេសទាំងពីរនោះទេ»។
ប្រតិកម្មពីរដ្ឋាភិបាលទីក្រុងហាណូយត្រូវបានធ្វើឡើងបន្ទាប់ពីរដ្ឋាភិបាលកម្ពុជាចេញសេចក្ដីថ្លែងការណ៍ថ្កោលទោសលើ «ការវាយប្រហារដោយពាក្យសម្ដី» ចោទប្រកាន់លោក ហ៊ុន សែន ថា បានក្បត់ប្រទេសជិតខាងភាគខាងកើត ដែលនេះជាទង្វើ «អសីលធម៌» និង «ប៉ះពាល់ខ្លាំង»។
លោក Huynh Ngoc Chenh អ្នកជំនាញផ្នែកប្រព័ន្ធផ្សព្វផ្សាយជនជាតិវៀតណាមម្នាក់ បាននិយាយថា លោកមានការភ្ញាក់ផ្អើលទៅនឹងការឆ្លើយតបរបស់វៀតណាម។
«វាបានបង្ហាញពីការកើនឡើងនៃផលប៉ះពាល់របស់ប្រព័ន្ធផ្សព្វផ្សាយសង្គម ជាពិសេសហ្វេសប៊ុក មកលើអាជ្ញាធរនានា ជាពិសេសអាជ្ញាធរវៀតណាម។ សូម្បីតែលោកនាយករដ្ឋមន្ត្រីវៀតណាម លោក Nguyen Xuan Phuc ត្រូវបានបង្ខំឲ្យធ្វើការសុំទោសជាសាធារណៈ បន្ទាប់ពីក្បួនរថយន្តរបស់លោកស្ថិតក្នុងល្បឿនលឿននៅលើផ្លូវចង្អៀត Hoi An Street ដែលជាផ្លូវបម្រុងទុកសម្រាប់អ្នកថ្មើរជើង ដែលបង្កឲ្យមានការរិះគន់ពេញហ្វេសប៊ុក»។
កាលពីថ្ងៃច័ន្ទកន្លងទៅ នាយករដ្ឋមន្ត្រីកម្ពុជា បានប្រើប្រាស់បណ្ដាញសង្គម វាយបកទៅកាន់អ្នកដែលរិះគន់លោករឿងបញ្ហាសមុទ្រចិនខាងត្បូង និងឲ្យប្រទេសវៀតណាមគោរពអធិបតេយ្យភាពកម្ពុជា ព្រមទាំងប្រាប់វៀតណាមឲ្យ៖ «អប់រំប្រជាជនរបស់ខ្លួន កុំឲ្យរំខានលោកទៀត»។
លោក ហ៊ុន សែន បានបង្ហោះឆ្លើយតបនៅលើទំព័រហ្វេសប៊ុកថា៖ «ជាថ្មីម្ដងទៀត ខ្ញុំចង់បញ្ជាក់សាជាថ្មីជាមួយអ្នកថា ខ្ញុំមិនមែនជាអាយ៉ងវៀតណាម បម្រើផលប្រយោជន៍វៀតណាមឡើយ ហើយខ្ញុំក៏មិនមែនជាចៅហ្វាយវៀតណាមដែរ»។
«ខ្ញុំក៏មិនបានសុំឲ្យប្រទេសវៀតណាមមកបម្រើផលប្រយោជន៍នយោបាយកម្ពុជាដែរ។ ជម្លោះនៅដែនសមុទ្រខាងត្បូងគួរតែត្រូវបាន (ដោះស្រាយ) ដោយសន្តិវិធីរវាងរដ្ឋាភិបាលចិន និងរដ្ឋាភិបាលវៀតណាម។ វាប្រសើរជាងការដោះស្រាយតាមរយៈការធ្វើសង្គ្រាម ដូចដែលអ្នកបានបញ្ចេញយោបល់ក្នុងទំព័រហ្វេសប៊ុករបស់ខ្ញុំ»។
លោកអ៊ូ វីរៈ ប្រធានវេទិកាអនាគត បានមានប្រសាសន៍ប្រាប់ VOA ខេមរភាសាថា លោកទទួលស្គាល់ថាការរិះគន់ទៅលើលោកនាយករដ្ឋមន្ត្រី មិនបានឆ្លុះបញ្ចាំងពីទស្សនៈរបស់រដ្ឋាភិបាលវៀតណាមទេ ហើយលោកបានចោទជាសំណួរទៅលើភាពប្រយ័ត្នប្រយែងផ្នែកនយោបាយរបស់លោក ហ៊ុន សែន ក្នុងការឆ្លើយតបជាលក្ខណៈបុគ្គល ទៅកាន់អ្នកលេងអ៊ីនធឺណិតមួយចំនួន ហើយនេះមិនរាប់បញ្ចូលការចេញសេចក្ដីថ្លែងការណ៍លក្ខណៈការទូតផង។
លោកបាននិយាយថា៖ «ខ្ញុំជឿជាក់ថា ទំព័រហ្វេសប៊ុករបស់លោកនាយករដ្ឋមន្ត្រី មានមនុស្សច្រើនណាស់ជួយធ្វើការលោក។ ប្រសិនបើគាត់មិនចូលចិត្តពីរបៀបដែលគេបញ្ចេញយោបល់ [លើអ្វីដែលលោកបង្ហោះ] លោកអាចមិនអើពើបាន។
អ្នកនាំពាក្យក្រសួងការបរទេសវៀតណាម លោក Binh បានប្រាប់ VOA ភាសាវៀតណាមថា ក្រសួងការបរទេសបានយកចិត្តទុកដាក់ជាសំខាន់ចំពោះ «មិត្តភាព ភាពជាអ្នកជិតខាង និងទំនាក់ទំនងទូលំទូលាយជាមួយកម្ពុជា។ ហើយថា វាបានធ្វើឲ្យមាន កិច្ចខិតខំប្រឹងប្រែងដើម្បីរក្សាទំនាក់ទំនង និងផលប្រយោជន៍រួមរបស់ប្រជាជនប្រទេសទាំងពីរ»។
កាលពីថ្ងៃអង្គារកន្លងទៅ ប្រទេសកម្ពុជា និងវៀតណាមបានបញ្ចប់កិច្ចប្រជុំចង្អៀតស្ដីពីជម្លោះព្រំដែន ដោយយល់ព្រមរួមគ្នា ក្នុងការស្វែងរក ប្រឹក្សាអន្តរជាតិ ដើម្បីណែនាំពីការបោះបង្គោលព្រំដែន។
លោក វ៉ា គីមហុង ប្រធានគណៈកម្មាធិការព្រំដែនកម្ពុជាប្រាប់អ្នកសារព័ត៌មានថា ភាគីទាំងពីរ «បានបរាជ័យក្នុងការឈានទៅដល់កិច្ចព្រមព្រៀងមួយ»។
លោក Tran Cong Truc ជាអតីតមន្ត្រីវៀតណាមទទួលបន្ទុកកិច្ចការព្រំដែន ដែលបានចូលរួមច្រើនលើកច្រើនសារជាមួយភាគីកម្ពុជា បានបង្ហាញសុទិដ្ឋិនិយមលើបញ្ហានេះ។
«វៀតណាមបានបង្ហាញ ពីឆន្ទៈរបស់ខ្លួនក្នុងការដោះស្រាយបញ្ហាព្រំដែន ដោយយល់ព្រមឲ្យភាគីទីបី ជាពិសេសប្រទេសបារាំង ចូលរួមក្នុងដំណើរការបោះបង្គោលព្រំដែននេះ»។ លោកបន្ថែមថា បារាំងបានរៀបចំផែនទីច្បាប់ដើម លម្អិតពីការបែងចែកបន្ទាត់ព្រំដែនក្នុងអំឡុងពេលអាណានិគម»។
យ៉ាងណាក៏ដោយ ប្រធានប្រតិភូកម្ពុជា បានឲ្យដឹងថា រដ្ឋាភិបាលទីក្រុងភ្នំពេញ សង្កេតឃើញថា ព្រំដែនរវាងកម្ពុជា និងវៀតណាមមានសភាពដូចទៅនឹងព្រំដែនដែលបានកំណត់កាលពីឆ្នាំ 1983 នេះបើយោងតាមផែនទីតំបន់ឥណ្ឌូចិន ដែលជាអតីតទឹកដីអាណានិគមបារាំង ដែលបច្ចុប្បន្នមានប្រទេសវៀតណាម កម្ពុជា និង ឡាវ។
ភាពតានតឹងបានកើតឡើងក្នុងប៉ុន្មានសប្ដាហ៍ថ្មីៗនេះ ខណៈពេលដែលរដ្ឋាភិបាលក្រុងភ្នំពេញ បានរិះគន់រដ្ឋាភិបាលទីក្រុងហាណូយ ថាបានជីកស្រះ និងសង់ប៉ុស្តិ៍យាម ខុសច្បាប់នៅក្នុងទឹកដីកម្ពុជា ហើយវៀតណាមបានបដិសេធការចោទប្រកាន់នេះ៕
ប្រែសម្រួលដោយ សឿន វឌ្ឍនា
