ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

វៀតណាម​ត្រូវ​បាន​គេ​ជំរុញ​ឲ្យ​ប្ដូរ​មធ្យោបាយ​ដឹកជញ្ជូន​តាម​ផ្លូវ​គោក​ទៅ​ជា​ផ្លូវ​ទឹក​វិញ​​


វៀត​ណាម​អាច​កាត់​បន្ថយ​ការ​បញ្ជេញ​ឧស្ម័ន​កាបូន​ដោយ​ប្តូរ​ពី​ការ​ដឹក​ជញ្ជូន​ផ្លូវគោក​មក​ផ្លូវ​ទឹក​វិញ។

អ្នក​សរសេរ​របាយការណ៍​មួយ​ដែល​មាន​កម្រាស់​១៣០​ទំព័រ​​ផ្ដោត​ទៅ​លើ​ការ​កើនឡើង​ឧស្សាហកម្ម​ដឹកជញ្ជូន​នៅ​ប្រទេស​វៀតណាម ហើយ​បាន​ផ្ដល់​អនុសាសន៍​ឲ្យ​វៀតណាម​ប្ដូរ​ពី​ការ​ប្រើប្រាស់​យានយន្ដ​ដឹកជញ្ជូន​តាម​ផ្លូវគោក​ទៅ​ជា​ផ្លូវ​ទឹក​វិញ។

ការ​បញ្ចេញ​ឧស្ម័ន​កាបូនិច​កំពុង​តែ​កើនឡើង​យ៉ាង​ឆាប់​រហ័ស​នៅ​ក្នុង​ប្រទេស វៀតណាម លឿនជាង​ប្រទេស​ណាៗ​ទាំងអស់​នៅ​ក្នុង​ពិភពលោក​នេះ។ នេះ​បើយោង​តាម​ការវិភាគ​មួយ​ក្នុង​ពេល​ថ្មីៗ​នេះ​អំពី​ថាមពល​នៅ​ក្នុង​ពិភពលោក​របស់ក្រុមហ៊ុន​ប្រេង​និង​ឧស្ម័ន BP។ លទ្ធផល​នៃ​វិភាគ​នេះ​កាន់​តែ​ជំរុញ​ជា​បន្ទាន់​ថែម​ទៀត​ទៅ​លើ​សេចក្ដីរាយការណ៍​មួយ​ដែល​ត្រូវ​បាន​ចេញ​ផ្សាយ​កាល​ពី​ថ្ងៃទី​១៦ ខែកញ្ញា កន្លង​ទៅ​នេះ​ដោយ​ធនាគារ​ពិភពលោក។ របាយការណ៍​របស់​ធនាគារ​ពិភពលោក​បាន​ផ្ដល់​អនុសាសន៍​ទៅ​លើ​វិធី​ដែល​វៀតណាម​អាច​កាត់​បន្ថយ​ការ​បញ្ចេញ​ឧស្ម័ន​កាបូនិច​និង​ដើម្បី​សម្រេច​បាន​ទៅ​តាម​គោលដៅ​ដែល​ដាក់​ចេញ​នៅ​ក្នុង​កិច្ចព្រមព្រៀង​បម្រែ បម្រួល​អាកាសធាតុ​ទីក្រុង​ប៉ារីស។

អ្នក​សរសេរ​របាយការណ៍​មួយ​ដែល​មាន​កម្រាស់​១៣០​ទំព័រផ្ដោត​ទៅ​លើ​ការ​កើនឡើង​ឧស្សាហកម្ម​ដឹកជញ្ជូន​នៅ​ប្រទេស​វៀតណាម ហើយ​បាន​ផ្ដល់​អនុសាសន៍​ឲ្យ​វៀតណាម​ប្ដូរ​ពី​ការ​ប្រើប្រាស់​យានយន្ដ​ដឹកជញ្ជូន​តាម​ផ្លូវគោក​ទៅ​ជា​ផ្លូវ​ទឹក​វិញ។

លោក Ousmane Dione នាយក​ធនាគារ​ពិភពលោក​ប្រចាំ​ប្រទេស វៀតណាម ដែល​មាន​ការិយាល័យ​នៅ​ទីក្រុង ហាណូយ បាន​មាន​ប្រសាសន៍​ថា៖ «ប្រព័ន្ធ​ដឹកជញ្ជូន​ដ៏​ល្អ​មួយ​គឺ​ចាំបាច់​ណាស់​សម្រាប់ធ្វើ​ឲ្យ​សេដ្ឋកិច្ច​របស់​វៀតណាម​នៅ​តែ​រីក​ចម្រើន។ សេដ្ឋកិច្ច​វៀតណាម​ពឹងផ្អែក​យ៉ាង​ខ្លាំង​ទៅ​លើ​ការ​ធ្វើ​ពាណិជ្ជកម្ម​ជាមួយ​នឹង​បរទេស ​និង​ការ​ភ្ជាប់​ទំនាក់ទំនង​ចល័ត។ យើង​សង្ឃឹម​ថា លទ្ធផល​ដែល​បាន​រកឃើញ​និង​អនុសាសន៍​នៅ​ក្នុង​របាយការណ៍​ថ្មី​នេះ​នឹង​ជួយ​ប្រទេស​វៀតណាម​នៅ​ក្នុង​កិច្ចខិតខំ​ប្រឹងប្រែង​ដើម្បី​សម្រេច​ឲ្យ​បាន​នូវ​វិស័យ​ដឹក​ជញ្ជូន​ដ៏​ខ្លាំងក្លា​និង​ប្រកប​ដោយ​និរន្តរភាព‍»។

របាយការណ៍​នេះ​ក៏​បាន​វិភាគ​ទៅ​លើ​ដំណោះស្រាយ​ចំនួន​៨​ដែល​វៀតណាម​អាច​នឹង​ធ្វើ​តេស្តដើម្បី​កាត់បន្ថយ​ការ​បញ្ចេញ​ឧស្ម័ន​ផ្ទះ​កញ្ចក់​តាមរយៈ​ការ​ផ្លាស់ប្ដូរ​មធ្យោបាយ​ដឹកជញ្ជូន ដូចជា​ការ​ប្ដូរ​ទៅ​ប្រើប្រាស់​មធ្យោបាយ​ដឹកជញ្ជូន​សាធារណៈ​និង​ការ​បង្កើន​ការ​ប្រើប្រាស់​ប្រេង​ជីវសាស្ត្រ​ជាដើម។ របាយការណ៍​នេះ​ក៏​បាន​សន្និដ្ឋាន​ថា ដំណោះ ស្រាយ​ដ៏​មាន​ប្រសិទ្ធភាព​បំផុត​គឺ​ការ​ប្ដូរ​ពី​ការប្រើប្រាស់​មធ្យោបាយ​ដឹក​ជញ្ជូន​តាម​ផ្លូវ​គោក ទៅ​ជា​មធ្យោបាយ​ដឹក​ជញ្ជូន​តាម​ផ្លូវ​ទឹក​វិញ។ ការ​ធ្វើ​ដូច្នេះ​អាច​កាត់​បន្ថយ​ការ​បញ្ចេញ​ឧស្ម័ន​កាបូនិច​ចំនួន​២២លាន​៨សែន​តោន​ត្រឹម​ឆ្នាំ​២០៣០​ខាង​មុខ​នេះ។

របាយការណ៍​នេះ​បាន​ឲ្យ​ដឹង​ទៀត​ថា ដំណោះស្រាយ​ដ៏​មាន​ប្រសិទ្ធភាព​បំផុត​ទី​ពីរ​គឺ​ត្រូវ​ធ្វើ​ឲ្យ​រថយន្ត​ស៊ីសាំង​តិច​និង​បញ្ចេញ​ឧស្ម័ន​កាបូនិច​តិច​ ដែល​អាច​កាត់​បន្ថយ​ការ​បញ្ចេញ​ឧស្ម័ន​កាបូនិច​រហូត​ដល់​ទៅ​១៥លាន​៨​សែន​តោន​ត្រឹមឆ្នាំ២០៣០។

ប្ដូរ​ការ​ដឹកជញ្ជូន​តាម​ផ្លូវ​គោក​ទៅ​ជា​តាម​ផ្លូវ​ទឹក​និង​ផ្លូវ​ដែក​វិញ

វៀតណាម​មាន​ឆ្នេរសមុទ្រ​រហូត​ដល់​ប្រវែង​៣២១៨​ គីឡូម៉ែត្រ​ឯណោះ ហើយ​ក៏​មាន​ដី​សណ្ដ​ទន្លេ​ចំនួន​ពីរ​ធំៗ​ផង​ដែរ​នៅ​តាម​តំបន់​សំខាន់​នានា ដូចជា​ដីសណ្ដ​ទន្លេ​មេគង្គ​នៅ​ប៉ែក​ខាង​ត្បូង​ក្បែរ​ទីក្រុង ហូជីមិញ និង​ទន្លេ​ក្រហម​នៅ​ប៉ែក​ខាង​ត្បូង​ក្បែរ​ទីក្រុង ហាណូយ។ ថ្វីត្បិត​តែ​ផ្លូវទឹក​ទាំង​នេះ​កំពុង​ត្រូវ​បាន​ប្រើប្រាស់​ដើម្បី​ដឹកជញ្ជូន​ទំនិញ​ក៏​ដោយ ក៏​មានការ​កើនឡើង​នូវ​ការ​ពឹងផ្អែក​លើ​រថយន្ត​ដឹក​ទំនិញ​ធំៗ​ដើម្បី​ដឹក​ទំនិញ​តាម​ផ្លូវ​គោក​ផង​ដែរ។ ការណ៍​នេះ​បាន​ធ្វើ​ឲ្យ​ការ​វិនិយោគ​បន្ថែម​ទៀត​ទៅ​លើ​ផ្លូវទឹក​កាន់​តែ​ចាំបាច់ ប្រសិនបើ​ប្រទេស​វៀតណាម​ចង់​រួមចំណែក​ធ្វើការ​លើ​វិស័យ​ដឹកជញ្ជូន​នោះ។ នេះ​បើ​យោង​តាម​របាយការណ៍​ដដែល​នោះ។

ដោយសារ​តែ​ប្រទេស​វៀតណាមក៏​មាន​អត្រា​កំណើន​សេដ្ឋកិច្ច​ខ្ពស់​បំផុត​មួយ​ដែរ​នៅ​ក្នុង​ពិភពលោក ប្រទេស​នេះ​មាន​កំណើន​ភាគហ៊ុន​នៅ​ក្នុង​ពាណិជ្ជកម្ម​ពិភពលោក ដែល​ត្រូវការ​ធនធាន​ថាមពល​និង​មធ្យោបាយ​ដឹក​ជញ្ជូន​ទំនិញកាន់​តែ​ច្រើន​ជាង​មុន​។

ការណ៍​នេះ​ធ្វើ​ឲ្យ​មាន​កំណើន​ការ​ប្រើប្រាស់​ថាមពល​នៅ​ទូទាំង​ប្រទេស​វៀតណាម​ច្រើន​ជាង​មុន រាប់​ចាប់​ពី​កំណើន​តម្រូវការ​រថយន្ត​សម្រាប់​អ្នក​មាន​ជីវភាព​មធ្យម រហូត​ដល់​វិស័យ​សំណង់​ដែល​ត្រូវ​ការសាងសង់​អគារ​ផ្ទះជួល​និង​ការិយាល័យ​កាន់​តែ​ច្រើន។ អ្នក​បរិស្ថាន​បាន​ឆ្លើយ​តប​ទៅ​នឹង​ចំណុច​នេះ​វិញ​តាមរយៈ​ការ​ស្នើ​ឲ្យ​ពលរដ្ឋ​វៀតណាម​ព្យាយាម​ប្រើប្រាស់​ប្រភព​ថាមពល​ផ្សេង​មក​ជំនួស​វិញ​។

លោកស្រី Nguy Thi Khanh នាយិកា​មជ្ឈមណ្ឌល Green Innovation and Development Center ​ហៅ​កាត់​ថា GreenID ដែល​ជា​អង្គការ​ការពារ​បរិស្ថាន​មិន​ស្វែងរក​ប្រាក់​កម្រៃ​មួយ​នៅ​ទីក្រុង ហាណូយ បាន​និយាយ​ថា៖ «ក្នុង​នាម​ជា​ប្រទេស​មួយ​ដែល​សម្បូរ​ទៅ​ដោយ​ថាមពល​ចម្រុះ​និង​ថាមពល​ដែល​អាច​ផលិត​បាន​វិញ​យ៉ាង​ច្រើន​លើសលុប ប្រទេស​វៀតណាម​នឹង​អាច​ទទួល​បាន​ផល​ប្រយោជន៍​ជាច្រើន​ ប្រសិន​បើ​ប្រទេស​នេះងាក​មក​ផលិត​ថាមពល​ស្អាត​កាន់តែ​ឆាប់រហ័ស​នោះ‍»។

លោកស្រី​បាន​បន្ថែម​ទៀត​ថា ចាប់​ពី​ពេល​នេះ​ត​ទៅ ការ​ប្រើប្រាស់​ថាមពល​ដែល​អាច​ផលិត​វិញ​បាន​កាន់​តែ​ច្រើន​នឹង​កាត់​បន្ថយ​ការនាំ​ចូល​ប្រេង​ឥន្ធនៈ​ផូស៊ីល កាត់​បន្ថយ​ការ​បំពុល​បរិស្ថាន កាត់​បន្ថយ​ការ​ប្រែប្រួល​អាកាសធាតុ និង​ផ្ដល់​អត្ថប្រយោជន៍​មួយ​ចំនួន​ទៅ​លើ​សេដ្ឋកិច្ចសង្គម។

បន្ថែម​ពី​លើ​ការ​ប្ដូរ​មធ្យោបាយ​ដឹកជញ្ជូន​តាម​ជើង​គោក​ទៅ​ជា​ជើង​ទឹក​វិញ ធនាគារ​ពិភពលោក​ក៏​បាន​ផ្ដល់​អនុសាសន៍​ឲ្យ​ប្រើ​ដំណោះស្រាយ​ផ្សេងៗ​បញ្ចូល​គ្នា​ផង​ដែរ ដើម្បី​កាត់​បន្ថយ​ការ​បញ្ចេញ​ឧស្ម័ន​កាបូនិច។ មធ្យោបាយ​ទាំង​នោះ​រួម​មាន​ដូចជា​ការ​ងាក​ទៅ​ប្រើប្រាស់​យានយន្ដ​ប្រើ​អគ្គិសនី ការ​បង្កើត​បទដ្ឋាន​ប្រើប្រាស់​ប្រេង​ស្អាត វិនិយោគ​ទៅ​លើ​ការ​ប្រើប្រាស់​រថយន្ត​ក្រុងនិង​រថភ្លើង​សាធារណៈ និងការ​ប្ដូរ​ពី​មធ្យោបាយ​ធ្វើដំណើរ​តាម​ផ្លូវ​ថ្នល់​ទៅជា​ផ្លូវ​ដែក​វិញ។

របាយការណ៍​នេះ​បាន​ឲ្យ​ដឹង​ទៀត​ថា វិធីសាស្ត្រ​ដែល​មាន​តុល្យភាព​មួយ​អាច​នឹង​កាត់​បន្ថយ​ការ​បញ្ចេញ​ឧស្ម័ន​ពុល​នៅ​ក្នុង​វិស័យ​ដឹកជញ្ជូន​របស់​វៀតណាម​ត្រឹម​៩%​ត្រឹម​ឆ្នាំ​២០៣០ ហើយ​អាច​កាត់​បន្ថយ​បាន​រហូត​ដល់​២០% ប្រសិន​បើ​មាន​ការ​គាំទ្រ​ពី​សំណាក់​ម្ចាស់​ជំនួយ​និង​បណ្ដា​ក្រុមហ៊ុន​ឯកជន​នានា៕

ប្រែសម្រួល​ដោយ​អ្នកស្រី ហុង ចិន្ដា

XS
SM
MD
LG