សមាគមនេសាទវៀតណាម កំពុងទាមទារឲ្យដោះលែងទូកនេសាទនិងម្ចាស់ទូកដែលបានត្រូវចាប់ខ្លួនដោយពួកអាជ្ញាធរចិនក្នុងសមុទ្រចិនខាងត្បូងកាលពីសប្តាហ៍មុន។
យោងតាមក្រសួងការបរទេសចិនឲ្យដឹងថា អ្នកនេសាទវៀតណាម៦នាក់ បានត្រូវចាប់ខ្លួនកាលពីថ្ងៃទី៣ ខែកក្កដានេះនៅក្បែរកោះ Hainan។
ក៏ប៉ុន្តែ លោក Vo Van Trac អនុប្រធានសមាគមនេសាទវៀតណាម បានប្រាប់ VOA ផ្សាយជាភាសាវៀតណាមថា ការចាប់ខ្លួននេះ បានកើតមានឡើងនៅភាគនារតីជិតប្រជុំកោះ Paracel ។
បណ្តាញផ្សាយព័ត៌មានរដ្ឋវៀតណាមរាយការណ៍ថា រដ្ឋាភិបាលទីក្រុងហាណូយ បានទាមទារឲ្យរដ្ឋាភិបាលទីក្រុងប៉េកាំង បញ្ចេញទីកន្លែងពិតប្រាកដដែលឧបទ្ទវហេតុនោះបានកើតមានឡើង។
វៀតណាមនិងចិន បានពាក់ព័ន្ធក្នុងជម្លោះដែលមានរយៈពេល២ខែជុំវិញការដ្ឋានខួងប្រេងមួយកន្លែង ដែលប្រទេសទាំងពីរបានអះអាងថាកណ្លែងនោះស្ថិតនៅក្នុងដែនអធិបតេយ្យរបស់ខ្លួនរៀងៗខ្លួន៕
