អ្នកស្រី Gina Haspel ដែលជាមន្ត្រីជើងចាស់នៃទីភ្នាក់ងារស៊ើបការណ៍កណ្តាលរបស់អាមេរិករយៈពេល៣០ឆ្នាំ បានស្បថចូលកាន់តំណែងកាលពីថ្ងៃចន្ទ ជានាយិកាដំបូងបង្អស់នៃទីភ្នាក់ងារនេះ។
អ្នកស្រី Haspel បានថ្លែងដោយគូសបញ្ជាក់ពីមោទនភាពរបស់អ្នកស្រីក្នុងនាមជាស្ត្រីដំបូងបង្អស់ដែលកាន់តំណែងនេះថា «ខ្ញុំធ្វើតាមវីរនារីដទៃទៀតដែលមិនធ្លាប់ចង់បានការទទួលស្គាល់ជាសាធារណៈ ប៉ុន្តែដើរតួនាទីជាអ្នកលើកទឹកចិត្តដល់មនុស្សជំនាន់ក្រោយឲ្យធ្វើដូចពួកគេដែរ»។
លោកប្រធានាធិបតីអាមេរិក ដូណាល់ ត្រាំ បានឈរមើល ខណៈលោកអនុប្រធានាធិបតី Mike Pence ជាអ្នកកាន់ពិធីឲ្យអ្នកស្រី Haspel វ័យ៦១ឆ្នាំ ស្បថចូលកាន់តំណែង ក្នុងពិធីមួយនៅឯទីស្នាក់ការទីភ្នាក់ងារ CIA ដែលស្ថិតនៅជាយរដ្ឋធានី វ៉ាស៊ីនតោន។
លោក ត្រាំ បានមានប្រសាសន៍ថា «អ្នកស្រី Gina ម៉ឺងម៉ាត់ណាស់ អ្នកស្រីរឹងមាំ ហើយនៅពេលដែលត្រូវការពារអាមេរិក អ្នកស្រី Gina នឹងមិនចុះចាញ់នោះទេ។ ទាំងបុរសនិងស្ត្រីនៃទីភ្នាក់ងារនេះសក្តិសមនឹងទទួលបានមេដឹកនាំដ៏អស្ចារ្យ ហើយនេះគឺជាអ្វីដែលពួកគេទទួលបាន»។
លោក ត្រាំ បានហៅអ្នកស្រីថាជា «មនុស្សដ៏ពិសេសម្នាក់...ជាមនុស្សម្នាក់ដែលបានបម្រើប្រទេសនេះដោយជំនាញដ៏ពិសេសនិងការលះបង់។ គ្មាននរណាម្នាក់ក្នុងប្រទេសនេះដែលសាកសមនឹងកាន់តំណែងនេះជាងអ្នកស្រីនោះទេ»។
អ្នកស្រី Haspel បានពិពណ៌នាជីវិតរបស់អ្នកស្រីនៅទីភ្នាក់ងារ CIA និងបុគ្គលិកនៅទីនោះថា «វាមិនមែនត្រឹមតែជាការងារនោះទេ ប៉ុន្តែជាការស្នើឲ្យការពារប្រទេសនេះពីការវាយប្រហារភេរវកម្ម»៕
