ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានាធិបតី​ថ្មី​របស់​ស្រីលង្កា​ឡើង​កាន់​តំណែង​ចំ​ពេល​សេដ្ឋកិច្ច​ប្រទេស​មាន​វិបត្តិ


នៅ​ក្នុង​រូបថត​ផ្តល់​ឱ្យ​ដោយ​ការិយាល័យ​ប្រធានាធិបតី​ស្រីលង្កា​នេះ ប្រធានាធិបតី​ថ្មី​លោក Ranil Wickremesinghe ចុះ​ហត្ថលេខា​លើ​ឯកសារ​មួយ​ក្រោយ​លោក​ស្បថ​ចូល​កាន់​តំណែង​នៅ​រដ្ឋធានី​កូឡុំបូ កាល​ពី​ថ្ងៃ​ទី​២១ ខែ​កក្កដា ឆ្នាំ​២០២២។

នៅ​ក្នុង​ប្រទេស​ស្រីលង្កា លោក​ប្រធានាធិបតី Ranil Wickremesinghe បាន​សន្យា​បង្កើត​រដ្ឋាភិបាល​ដែល​មាន​សមាជិក​មក​ពី​គ្រប់​គណបក្ស​ដែល​មាន​សមត្ថភាព​ស្នើសុំ​ប្រាក់​ជំនួយ​សង្គ្រោះ​រាប់​ពាន់​លាន​ដុល្លារ​អាមេរិក​ពី​អង្គការ​មូលនិធិ​រូបិយវត្ថុ​អន្តរជាតិ (IMF) បន្ទាប់​ពី​លោក​បាន​ស្បថ​ចូល​កាន់​តំណែង​ជា​ប្រធានាធិបតី​មក។ ប៉ុន្តែ​កន្លង​មក ការ​តែងតាំង​មន្ត្រី​មួយ​ចំនួន​របស់​លោក​បាន​បង្ក​ឱ្យ​មាន​កំហឹង​ពី​អ្នក​តវ៉ា។

អតិផរណា​ខ្ពស់​ខ្លាំង​បាន​ធ្វើ​ឱ្យ​តម្លៃ​អង្ករ​កើនឡើង។ កង្វះ​ប្រេង​ឥន្ធនៈ​ធ្ងន់ធ្ងរ​បាន​ធ្វើ​ឱ្យ​មនុស្ស​តម្រង់​ជួរ​ជាង ៣ គីឡូម៉ែត្រ​ដើម្បី​ចាក់​សាំង ដោយ​ពួកគេ​មួយ​ចំនួន​ត្រូវ​ដេក​រង់ចាំ​ក្នុង​ស្ថានភាព​លំបាក​អស់​រយៈពេល​ជា​ច្រើន​ថ្ងៃ​ជាប់ៗ​គ្នា។ កង្វះ​ប្រេង​ឥន្ធនៈ​មាន​ន័យ​ថា ទំនិញ​ចាំបាច់​មួយ​ចំនួន​ដូចជា​អង្ករ​និង​ថ្នាំ​ពេទ្យ​ជាដើម​មិន​អាច​ដឹក​ជញ្ជូន​ទៅ​ដល់​តំបន់​ជនបទ​បាន។

លោក Sulaimaan Saim ដែល​ទើបតែ​ត្រឡប់​មកពី​ការ​សិក្សា​ផ្នែក​វេជ្ជសាស្ត្រ​ក្នុង​ប្រទេស​បេឡារុស​កាលពី​ពេល​ថ្មីៗ​នេះ បាន​និយាយ​ថា អ្នក​ដែល​ធ្លាប់​ជិះ​រថយន្ត​ទំនើប​ឥឡូវ​នេះ​បែរ​ជា​មក​ជិះ​ម៉ូតូ​កង់​បី​ទៅ​វិញ ហើយ​អ្នក​ដែល​ធ្លាប់​ជិះ​ម៉ូតូ​កង់បី​ឥឡូវ​នេះ​ត្រូវ​បង្ខំ​ចិត្ត​ដើរ​ដោយ​ថ្មើរ​ជើង​ទៅ​វិញ។

លោក Saim ថ្លែង​ដូច្នេះ​ថា៖ «រដ្ឋាភិបាល​ខ្ជីខ្ជា​និង​ខ្ជះខ្ជាយ​ពេល​វេលា​ខ្លាំង​ពេក។ ពួកគេ​កំពុង​លេង​សើច​ជាមួយ​នឹង​ប្រាក់​របស់​យើង។ ពួកគេ​កំពុង​យក​ប្រាក់​របស់​ពលរដ្ឋ។ និយាយ​ទៅ ពួកគេ​កំពុង​លួច​ប្រាក់​របស់​ពលរដ្ឋ»។

ប្រទេស​ស្រីលង្កា​មាន​បំណុល​សរុប​ចំនួន ៥១ ពាន់​លាន​ដុល្លារ​អាមេរិក ហើយ​ប្រទេស​នេះ​ត្រូវការ​ថវិកា​ចំនួន ៧ ពាន់​លាន​ដុល្លារ​អាមេរិក​ដើម្បី​ដោះស្រាយ​កាតព្វកិច្ច​បំណុល​របស់​ខ្លួន និង​ដើម្បី​អាច​បន្ត​ប្រតិបត្តិការ​របស់​រដ្ឋាភិបាល​សម្រាប់​រយៈពេល​ដែល​នៅ​សេសសល់​នៅ​ក្នុង​ឆ្នាំ​នេះ​បាន ប៉ុន្តែ​ប្រាក់​បម្រុង​ទុក​បរទេស​របស់​ខ្លួន​សរុប​មាន​ចំនួន​តែ ១.៧០០ លាន​ដុល្លារ​អាមេរិក​តែ​ប៉ុណ្ណោះ។ ធនាគារ​កណ្តាល​របស់​ប្រទេស​ស្រីលង្កា​ថា ក្នុង​ចំណោម​ប្រាក់​បម្រុង​ទុក​បរទេស​ទាំង​អស់​នោះ មាន​ប្រាក់​ចំនួន​តែ ២៥ លាន​ដុល្លារ​អាមេរិក​ប៉ុណ្ណោះ​ដែល​អាច​ប្រើប្រាស់​បាន។

នេះ​គឺជា​បញ្ហា​ផ្ទុះ​ឡើង​លាយឡំ​គ្នា​ដែល​បង្ក​ឱ្យ​មនុស្ស​រាប់​សែន​នាក់​ហ៊ុមព័ទ្ធ​តវ៉ា​នៅ​បរិវេណ​វិមាន​ប្រធានាធិបតី ដោយ​បង្ខំ​ឱ្យ​លោក Gotabaya Rajapaksa ដែល​ជា​ប្រធានាធិបតី​ស្រីលង្កា​នៅ​ពេល​នោះ រត់​ភៀស​ខ្លួន​ពី​ប្រទេស​និង​លាលែង​ពី​តំណែង។

ទោះ​ជា​យ៉ាង​នេះ​ក្តី អ្នក​តវ៉ា​ក៏​មាន​កំហឹង​ផង​ដែរ​ដោយសារ​ចាប់​តាំង​ពី​ឡើង​កាន់​តំណែង​មក លោក​ប្រធានាធិបតី Wickremesinghe បាន​តែងតាំង​លោក Dinesh Gunawardena ដែល​ជា​សម្ព័ន្ធមិត្ត​ជិតស្និទ្ធ​នឹង​លោក Rajapaksa ជា​នាយករដ្ឋមន្ត្រី​ថ្មី ហើយ​លោក​បាន​បញ្ជា​ឱ្យ​យោធា​រុះរើ​ជំរំ​របស់​ក្រុម​អ្នក​តវ៉ា​នៅ​ខាង​ក្រៅ​បរិវេណ​វិមាន​ប្រធានាធិបតី។

អ្នកបម្រើការ​ខាង​ផ្នែក​សុខាភិបាល​កាន់​បដា​ស្រែក​ប្រឆាំង​នឹង​លោក​ប្រធានាធិបតី​ថ្មី​លោក Ranil Wickremesinghe ក្នុង​អំឡុង​បាតុកម្ម​មួយ​នៅ​រដ្ឋធានី​កូឡុំបូ កាល​ពី​ថ្ងៃ​ទី​២៣ ខែ​កក្កដា ឆ្នាំ​២០២២។
អ្នកបម្រើការ​ខាង​ផ្នែក​សុខាភិបាល​កាន់​បដា​ស្រែក​ប្រឆាំង​នឹង​លោក​ប្រធានាធិបតី​ថ្មី​លោក Ranil Wickremesinghe ក្នុង​អំឡុង​បាតុកម្ម​មួយ​នៅ​រដ្ឋធានី​កូឡុំបូ កាល​ពី​ថ្ងៃ​ទី​២៣ ខែ​កក្កដា ឆ្នាំ​២០២២។

លោក Ganeshan Wignarjara សមាជិក​ស្រាវជ្រាវ​ជាន់​ខ្ពស់​នៅ​វិទ្យាស្ថាន​សិក្សា​កិច្ចការ​អាស៊ី​ខាង​ត្បូង​នៃ​សាកលវិទ្យាល័យ​ជាតិ​សិង្ហបុរី (National University of Singapore) បាន​ថ្លែង​ថា ជម្រើស​តែ​មួយ​គត់​សម្រាប់​ប្រទេស​ស្រីលង្កា​គឺ​ត្រូវ​ស្នើ​សុំ​ប្រាក់​ជំនួយ​សង្គ្រោះ​ពី​អង្គការ​រូបិយវត្ថុ​អន្តរជាតិ (IMF)។

លោកWignarjara និយាយ​ថា៖ «សេដ្ឋកិច្ច​ស្រីលង្កា​កំពុង​ប្រឈម​នឹង​ហានិភ័យ​នៃ​ការ​ដួល​រលំ បន្ទាប់ពី​ស្រីលង្កា​ខកខាន​មិន​បាន​សង​បំណុល​របស់​ខ្លួន។ កំណើន​សេដ្ឋកិច្ច​ស្រីលង្កា​ឥឡូវ​នេះ​ស្ថិត​ក្នុង​កម្រិត​ពី -៤% ទៅ -៦% នៅ​ក្នុង​ឆ្នាំ​នេះ ហើយ​អតិផរណា​ស្ថិត​ក្នុង​ចន្លោះ​ពី ៥០% ទៅ ៧០% នៅ​ឆ្នាំ​នេះ។ វិបត្តិ​នេះ​បាន​បង្ក​ឱ្យ​ពលរដ្ឋ​ចំនួន​ប្រហែល ៧៥០.០០០ នាក់​ធ្លាក់​ក្នុង​ភាព​ក្រីក្រ។ ដូច្នេះ វា​ជា​ស្ថានភាព​ដ៏​អាក្រក់​នៅ​ក្នុង​ប្រទេស​ស្រីលង្កា»។

អ្នក​ស៊ើបអង្កេត​បាន​និយាយ​ថា ប្រាក់​រាប់​ពាន់​លាន​ដុល្លារ​អាមេរិក​ត្រូវ​បាន​មនុស្ស​របស់​លោក Rajapaksa ផ្ទេរ​ចេញ​ទៅ​គណនី​ធនាគារ​នៅ​ក្រៅ​ប្រទេស។ ករណី​នេះ​នាំ​ឱ្យ​មាន​ការ​អំពាវនាវ​ឱ្យ​បើក​ការ​ស៊ើបអង្កេត​ឯករាជ្យ​មួយ​លើ​ទ្រព្យសម្បត្តិ​របស់​ក្រុម​គ្រួសារ​លោក Rajapaksa និង​ឱ្យ​មាន​កម្មវិធី​ស្តារ​ទ្រព្យសម្បត្តិ​ឡើង​វិញ បើ​ទោះបីជា​ការ​ធ្វើ​បែប​នេះ​ត្រូវ​ចំណាយ​ពេល​ច្រើន​ឆ្នាំ​ក៏ដោយ។ ក្រុម​គ្រួសារ​របស់​លោក Rajapaksa បាន​ច្រានចោល​ការ​ចោទ​ប្រកាន់​នេះ៕

ពាក្យក្នុងសារព័ត៌មាន៖ Emulate
សូម​រង់ចាំ

No media source currently available

0:00 0:01:29 0:00
XS
SM
MD
LG