ភ្ជាប់​ទៅ​គេហទំព័រ​ទាក់ទង

មេដឹកនាំ​គណបក្ស​ប្រឆាំង​ក្នុង​ប្រទេស​វ៉េណេស៊ុយអេឡា​ជួប​ជាមួយ​នាយករដ្ឋមន្ត្រី​អេស្ប៉ាញ


អតីត​អភិបាលក្រុង​ Caracas លោក Antonio Ledezma(ឆ្វេង)​និង​នាយករដ្ឋមន្រ្តី​ Mariano Rajoy ជួប​ពិភាក្សា​គ្នា​នៅ​ទីក្រុង​ម៉ាឌ្រីត​ប្រទេស​អេស្ប៉ាញកាលពី​ថ្ងៃសៅរ៍​ទី១៨ វិច្ឆិកា ២០១៧។

មេដឹកនាំ​គណបក្ស​ប្រឆាំង​ដ៏​យូរ​អង្វែង​ក្នុង​ប្រទេស​វ៉េណេស៊ុយអេឡា​លោក Antonio Ledezma បាន​ជួប​ជាមួយ​នឹង​នាយករដ្ឋមន្ត្រី​អេស្ប៉ាញ​លោក Mariano Rajoy នៅ​ក្នុង​ទីក្រុង​ម៉ាឌ្រីដ ប្រទេស​អេស្ប៉ាញ​កាល​ពី​ថ្ងៃ​សៅរ៍​ម្សិលមិញ។

លោក​បាន​ធ្វើ​ដំណើរ​ទៅ​ដល់​ប្រទេស​អេស្ប៉ាញ​កាល​ពី​ព្រឹក​ថ្ងៃ​សៅរ៍​ម្សិលមិញ​ពី​ប្រទេស​កូឡុំប៊ី បន្ទាប់​ពី​បាន​គេច​ចេញ​ពី​ការ​ជាប់​ឃុំ​ក្នុង​គេហដ្ឋាន​នៅ​ក្នុង​ទីក្រុង​ការ៉ាកាស ប្រទេស​វ៉េណេស៊ុយអេឡា​មក។

មេដឹកនាំ​ទាំង​ពីរ​មិន​បាន​ថ្លែង​ជា​សាធារណៈ​អំពី​ជំនួប​របស់​ពួកគេ​នោះ​ទេ។

មុន​ពេល​ចាកចេញ​ពី​ប្រទេស​កូឡុំប៊ី លោក Antonio Ledezma បាន​និយាយ​ថា លោក​គ្រោង​នឹង «ធ្វើ​ដំណើរ​វែង​ឆ្ងាយ​បែប​សន្តិវិធី​ជា​អន្តរជាតិ» មួយ ក្នុង​គោល​បំណង​ប្រយុទ្ធ​ដើម្បី​សេរីភាព​នយោបាយ​នៅ​ក្នុង​ប្រទេស​វ៉េណេស៊ុយអេឡា។ លោក Antonio Ledezma ដែល​ធ្លាប់​ធ្វើ​ជា​ចៅហ្វាយ​ក្រុង​ការ៉ាកាស បាន​និយាយ​ថា លោក​បាន​និយាយ​តាម​ទូរស័ព្ទ​ជាមួយ​នឹង​ប្រធានាធិបតី​កូឡុំប៊ី​លោក Juan Manuel Santos ដែល​ជា​អ្នក​ផ្ដល់​ការ​គាំទ្រ​ចំពោះ​រូប​លោក។

លោក​បាន​និយាយ​នៅ​ពេល​លោក​ធ្វើ​ដំណើរ​ទៅ​ដល់​ប្រលាន​យន្តហោះ​ក្នុង​ទីក្រុង​ម៉ាឌ្រីដ​ថា៖ «ប្រទេស​វ៉េណេស៊ុយអេឡា​មិន​មែន​កំពុង​ស្ថិត​នៅ​មាត់​ជ្រោះ​នោះ​ទេ។ ប្រទេស​នេះ​បាន​ធ្លាក់​ចូល​ក្នុង​ជ្រោះ​ដ៏​ជ្រៅ​រួច​ទៅ​ហើយ»។

លោក Antonio Ledezma ដែល​បាន​ជាប់​ឃុំ​ក្នុង​គេហដ្ឋាន​របស់​លោក​តាំង​ពី​ឆ្នាំ ២០១៥ មក ពាក់ព័ន្ធ​នឹង​បទ​ចោទ​ប្រកាន់​ថា​រៀបចំ​គម្រោង​សម្ងាត់​ដើម្បី​ធ្វើ​រដ្ឋប្រហារ បាន​បញ្ជាក់​ថា លោក​បាន​រត់គេច​ពី​ការ​ជាប់​ឃុំ​នោះ​កាល​ពី​ថ្ងៃ​សុក្រ​ទៅ​កាន់​ប្រទេស​កូឡុំប៊ី​ដែល​នៅ​ក្បែរ​ខាង ដោយ​ឆ្លង​កាត់​ប៉ុស្តិ៍​ប៉ូលិស និង​យោធា​ជា​ច្រើន៕

XS
SM
MD
LG