ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​ដក​តំណែង​សមាជិក​ឧត្តម​ក្រុម​ប្រឹក្សា​ពិគ្រោះ​យោបល់​ ក្រោយ​ទំនាស់​ពាក្យ​សម្តី​ជាមួយ​មន្រ្តី​ក្រសួង​បរិស្ថាន


លោក សុខ សុវណ្ណវឌ្ឍនាសាប៊ុង ប្រធានគណបក្សខ្មែរក្រោក អំឡុងពេលផ្ដល់បទសម្ភាសដល់ VOA នៅខុទ្ទកាល័យរបស់លោក ក្នុងរាជធានីភ្នំពេញ កាលពីថ្ងៃទី០២ ខែមេសា ឆ្នាំ២០២០ ។ (អូន ឆេងប៉រ/VOA)

លោក ​សាយ ឈុំ​ ប្រមុខ​រដ្ឋ​ស្តីទី​បាន​សម្រេច​បញ្ឈប់​មុខ​តំណែង​លោក​ សុខសុវណ្ណ វឌ្ឍនា​សាប៊ុង ​ប្រធាន​គណបក្ស​ខ្មែរក្រោក​ជា​ទេស​រដ្ឋមន្ត្រី​ក្នុង​ឧត្តម​ក្រុម​ប្រឹក្សា​ពិគ្រោះ ​និង​ផ្តល់​យោបល់​ កាល​ពី​ថ្ងៃ​ទី​៤ ​ខែ​ឧសភា​ក្រោយ​មាន​ទំនាស់​ពាក្យ​សម្តី​ជាមួយ​មន្រ្តី​ក្រសួង​បរិស្ថាន។​

លោក​ សុខសុវណ្ណ វឌ្ឍនា​សាប៊ុង​ ដែល​ភាគ​ច្រើន​គេ​ស្គាល់​ថា ​William Guang ​មាន​តួនាទី​ជា​សមាជិក​ក្រុម​ប្រឹក្សា​ពិគ្រោះ និង​ផ្តល់​យោបល់ ​ដែល​បង្កើត​ដោយ​រដ្ឋាភិបាល​របស់​លោក​នាយក​រដ្ឋមន្រ្តី ​ហ៊ុន សែន​ នៅ​ពេល​អវត្តមាន​គណបក្ស​សង្រ្គោះ​ជាតិ​ ដែល​ត្រូវ​បាន​តុលាការ​កំពូល​រំលាយ​ចោល។​

ការ​ដក​តំណែង​នេះ​ធ្វើ​ឡើង​តែ​ពីរ​ថ្ងៃ​ប៉ុណ្ណោះ​ បន្ទាប់​ពី​មេ​ដឹកនាំ​គណបក្ស​វ័យ​ក្មេង​រូប​នេះ​ ចុះ​ទៅ​ស្រាវ​ជ្រាវ​ទំនាស់​ដីធ្លី​មួយ​ក្នុង​ឧទ្យាន​ជាតិ​ព្រះ​សីហនុ​រាម​ ក្នុង​ខេត្ត​ព្រះសីហនុ។​

លោក ​សាប៊ុង​ ប្រាប់​VOA​នៅថ្ងៃ​អង្គារ​នេះ​ថា ​លោក​មិន​បាន​ដឹង​មូល​ហេតុ​នៅ​ពី​ក្រោយ​ការ​បញ្ចប់​តំណែង​នេះ​ទេ ​ប៉ុន្តែ​លោក​ថា​នេះ​ជា​ការ​សម្រេច​ចិត្ត​របស់​លោក​នាយក​រដ្ឋមន្ត្រី​ហ៊ុន សែន។​

«ខ្ញុំ​អត់​ដឹង​ទេ​ ព្រោះ​អ្នក​ថា​ បញ្ចប់​គឺ​សម្តេច​អគ្គ​មហា​សេនាបតី​តេជោ​ ហើយ​ខ្ញុំ​គ្រាន់​តែ​ដឹង​ថា​ ខ្ញុំ​ធ្វើការ​តាម​តួនាទី​ និង​ភារកិច្ច​ប៉ុណ្ណោះ។ ​ប៉ុន្តែ​ខ្ញុំ​ទទួល​យក​ អត់​អី​ទេ»។​

លោក ​សាប៊ុង​ បាន​ដឹក​នាំ​ប្រតិភូ​គណបក្ស​របស់​លោក​ទៅ​កាន់​ខេត្ត​ព្រះ​សីហនុ​ កាល​ពី​សប្តាហ៍​មុន​ ហើយ​មាន​លិខិត​បេសក​កម្ម​ចេញ​ដោយ​លោក ​ឈឹម ផលវរុណ​ ប្រធាន​លេខាធិការដ្ឋាន​នៃ​ក្រុម​ប្រឹក្សា​នេះ។ ប្រតិភូ​របស់​លោក ​មាន​បំណង​ចូល​ទៅ​សិក្សា​ទីតាំង​ដែល​មាន​ទំនាស់​ដីធ្លី​មួយ​កន្លែង​ស្ថិត​ក្នុង​តំបន់​ឧទ្យានជាតិ​ព្រះ​សីហនុ​រាម។​

ក្នុង​ឃ្លីប​វីដេអូ​មួយ​មាន​រយៈ​ពេល​ជិត​២០​នាទី​ ដែល​បង្ហោះ​នៅ​ទំព័រ​ហ្វេសប៊ុក​ឈ្មោះ​William Guang ​ដែល​មាន​លោក​សុខ សុវណ្ណ វឌ្ឍនាសាប៊ុង​ ជា​ម្ចាស់​នោះ​ ​មេដឹកនាំ​គណបក្ស​ខ្មែរ​ក្រោក​រូប​នេះ ​និយាយ​ថា​ ក្រុម​មន្ត្រី​បរិស្ថាន​មិន​អនុញ្ញាត​ឲ្យ​លោក​ចូល​ទីតាំង​ដែល​មាន​ទំនាស់។

ក្នុង​វីដេអូ​ដដែល​នោះ​ លោក​ សាប៊ុង ​បាន​អាន​ត្រួសៗ​ពាក្យ​បណ្តឹង​មួយ​សន្លឹក​របស់​ពលរដ្ឋ​៤​រូប​តំណាង​ឲ្យ​ប្រជា​ពលរដ្ឋ​ចំនួន​១៣៥​គ្រួសារ​ ដែល​អះអាង​ថា ​មាន​វិវាទ​ដីធ្លី​ក្នុង​ភូមិ​ស្មាច់​ដែង​ ឃុំ​រាម​ ស្រុក​ព្រៃ​នប់​ ខេត្ត​ព្រះ​សីហនុ។​

មាន​របាយ​ការណ៍​ថា​ ក្នុង​ទំនាស់​ដី​ធ្លី​នោះ​មាន​អំពើ​ហិង្សា​និង​ការ​បង្ខាំង​ពលរដ្ឋ។​

មុន​ពេល​ដក​តំណែង​នេះ ​ ក្រសួង​បរិស្ថាន​ចេញ​លិខិត​ប្រតិកម្ម​មួយ​ចុះ​ថ្ងៃ​ទី​៣ ​ខែ​ឧសភា ​ដោយ​ចោទ​លោក​សាប៊ុង​ថា​ មិន​យល់​បែប​បទ​ការ​ងារ​រដ្ឋបាល​សាធារណៈ។​ក្រសួង​ហៅ​លោក ​សាប៊ុង​ថា​មាន​«ចរិត​ក្រអឺត​ក្រទម​និង​ការ​ប្រើប្រាស់​ពាក្យ​សម្តី​ប្រមាថ​ មួល​បង្កាច់ ​ចោទ​ប្រកាន់​ ដោយ​គ្មាន​មូលដ្ឋាន​គ្មាន​ភស្តុតាង​ច្បាស់​លាស់»។​

ក្រសួង​បរិស្ថាន​បញ្ជាក់​ថា ​ គ្មាន​ការ​ប្រើប្រាស់​ហិង្សា​ និង​បង្ខាំង​ពលរដ្ឋ​ដូច​ការ​លើក​ឡើង​របស់​លោក​សុខ សុវណ្ណ​ វឌ្ឍនា​សាប៊ុង​នោះ​ឡើយ។ ក្រសួង​ក៏​បាន​ចោទ​ក្រុម​ពលរដ្ឋ​ដែល​មាន​វិវាទ​ដីធ្លី​ ហើយ​មក​ពឹង​ឲ្យ​លោក​សុខ សុវណ្ណ​ វឌ្ឍនាសាប៊ុង​ជួយ​នោះ​ថា​ ជា«ក្រុម​ជន​ទន្ទ្រាន​កាន់​កាប់​ដីធី្ល​ខុស​ច្បាប់​ ដោយសារ​តែ​ដី​ដែល​ពលរដ្ឋ​ចោទ​ថា​មាន​ទំនាស់​នោះ​ត្រូវ​បាន​ចុះ​បញ្ជី​ដី​រដ្ឋ​រួច​ហើយ»។​

ក្រសួង​បរិស្ថាន​ដែល​ស្ថិត​ក្រោម​ការ​ដឹកនាំ​របស់​លោក​សាយ សំអាល់ ​ដែល​ជាកូន​ប្រុស​របស់​លោក​សាយ ឈុំ​ បាន​ដាក់​ការ​ស្តី​បន្ទោស​មេដឹកនាំ​គណ​បក្សខ្មែរ​ក្រោក​ថា​ មក​បំពេញ​ការងារ​«ដោយ​មិន​ដឹង​ទិស​តំបន់​ ដែល​ការណ៍​នេះ​បាន​ធ្វើ​ឲ្យ​ខូច​ផល​ប្រយោជន៍​សង្គម​ជាតិ​ និង​បង្កើត​នូវភាព​អនាធិប​តេយ្យ»។​

បើ​តាម​ក្រសួង​បរិស្ថាន​ ដី​នេះ​ស្ថិត​ក្នុង​តំបន់​វិនិយោគ​អភិវឌ្ឍន៍​របស់​ក្រុមហ៊ុន ​អេវើ​ហ្គ្រីន ​និង​ក្រុមហ៊ុន ​យិៈ ចៀ។​

លោក​នេត្រ ភក្ត្រា ​រដ្ឋ​លេខាធិការ ​និង​ជា​អ្នក​នាំពាក្យ​ក្រសួង​បរិស្ថាន ​បដិសេធ​មិន​អត្ថាធិប្បាយ​លើ​បញ្ហា​នេះ។​

លោក​សុខ សុវណ្ណ​ វឌ្ឍនា​សាប៊ុង ​អះអាង​ថា​ អ្វីដែល​លោក​បាន​ធ្វើ​នោះ ​គឺ​ស្រប​ទៅ​តាម​ឯកសារ​គតិយុត្តិ​នានា​ស្តីពី​ការ​រៀបចំ​ និង​ការ​ប្រព្រឹត្តទៅ​របស់​ឧត្តម​ក្រុម​ប្រឹក្សា ​ ហើយ​ថា​បេសក​កម្ម​របស់​លោក​គឺ​ជា​ដំណើរ​ឈ្វេង​យល់អំពី​ទំនាស់​តាម​បណ្តឹង​របស់​ប្រជា​ពលរដ្ឋ។​

«ពលរដ្ឋ​អត់​មាន​ប្តឹង​រឿង​ក្រុមហ៊ុន​អីផង។​ ពលរដ្ឋ​ប្តឹង​មក​ ​ យើង​អត់​មាន​ វាយ​តម្លៃ​វិនិច្ឆ័យ​ទេ។​ យើង​ចុះ​ទៅ​ស្រាវ​ជ្រាវ​ហ្នឹង​ ប៉ុន្តែ​ការ​ស្រាវ​ជ្រាវ​របស់​យើង​បាន​អាក់​ខាន»។​

លោក​មាស នី​ អ្នក​វិភាគ​នយោបាយ ​មាន​ប្រសាសន៍​ថា​ ​តួនាទី​នៅ​ក្នុង​ឧត្តម​ក្រុមប្រឹក្សា​ដែល​ផ្តួចផ្តើម​ដោយ​លោក​នាយក​រដ្ឋមន្ត្រី​ហ៊ុន សែន ​នេះ​មាន​ភាព​ផុយស្រួយ​ប្រសិន​បើ​សមាជិក​រូប​ណា​នៃ​ស្ថាប័ន​នេះ​ លូកដៃ​ចូល​រឿង​រសើប​ដែល​ពាក់​ព័ន្ធ​នឹង​បញ្ហា​ដីធ្លី​ និង​ធនធាន​រ៉ែ​ជាដើម។​

«វា​ធ្លាប់​មាន​បទ​ពិសោធន៍​មុនៗ​មក​ឲ្យតែ​ សមាជិក​ឧត្តម​ក្រុម​ប្រឹក្សា​នេះ​ នរណា​ម្នាក់​ហ៊ាន​លូក​ទៅ​រក​កន្លែង​ណា​មួយ​ដែល​វា​ជា​កន្លែង​រសើប​ ដូច​ជា​បញ្ហា​ ដីធ្លី​ ឬ​ក៏រ៉ែ​អី​ហ្នឹង​ គឺ​បើ​មិន​មាន​ការ​ព្រមាន​ទេ​ ក៏​អាច​មាន​ជា​ លេច​ឮ​ជា​ពាក្យ​ យើង​ហៅ​ថា​ ជា​ពាក្យ​ព្រមាន​ខ្លះៗ​ ពី​ក្នុង​រដ្ឋាភិបាល។​ ដូច្នេះសម្រាប់​ការ​បញ្ឈប់​លោក​សាប៊ុង​នេះ​ ខ្ញុំ​មើល​ទៅ​វា​សម្រាប់​ខ្ញុំ​ មិន​មាន​អី​ដែល​ជា​ការ​ភ្ញាក់​ផ្អើល​ទេ»។​

លោក​ ម៉ម សូណង់ដូ ​ប្រធាន​គណបក្ស​សំបុក​ឃ្មុំ​សង្គម​ប្រជា​ធិបតេយ្យ​ ដែល​ជា​សមាជិក​មួយ​រូប​នៃ​ក្រុម​ប្រឹក្សា​នេះ​មាន​ប្រសាសន៍​ថា​ លោក​មាន​ការ​ភ្ញាក់​ផ្អើល​ចំពោះ​ការ​បញ្ចប់​តំណែង​របស់​លោក សាប៊ុង។​

កាល​ពី​ខែ​មិថុនា​ ឆ្នាំ​២០១៩​លោក​នាយក​រដ្ឋ​មន្ត្រី ​ហ៊ុន សែន ​បាន​សម្ដែង​ការ​មិន​ពេញ​ចិត្ត​ម្ដង​រួច​មក​ហើយ​ចំពោះ​ «ឧត្តម​ក្រុម​ប្រឹក្សា​ពិគ្រោះ​និង​ផ្ដល់​យោបល់»​ ដោយ​សារ​សមាជិក​ខ្លះ​នៃ​ស្ថាប័ន​នេះ​ហាក់​ដើរ​ហួស​តួនាទី​ក្នុង​ការ​កោះ​ហៅ​រដ្ឋ​មន្ត្រី​ និង​ជ្រៀត​ជ្រែក​ចូល​កិច្ចការ​នគរបាល​ និង​យោធា​ជា​ដើម។​

ប៉ុន្តែ​ក្នុង​សន្និបាត​មួយ​កាល​ពី​ដំណាច់​ខែ​ធ្នូ​ ឆ្នាំ​២០១៩​ របស់​ឧត្តម​ក្រុម​ប្រឹក្សា​នេះ ​ លោក ​ហ៊ុន សែន ​បាន​សរសើរ​ស្ថាប័ន​នេះ​ថា​ ​បំពេញ​តួនាទី​ល្អ​ជាង​រដ្ឋ​សភា ​ដែល​មាន​បក្ស​ជំទាស់​ទៅ​ទៀត​ ហើយ​លោក​ថា​ ចង់​បន្ត​អាណត្តិ​ស្ថាប័ន​នេះ​ ក្រោយ​ឆ្នាំ​២០២៣​ត​ទៅ​មុខ​ទៀត៕

តួលេខនៃករណីឆ្លងជំងឺកូវីដ១៩

XS
SM
MD
LG