លោក Roberto Marrero នាយកខុទ្ទកាល័យរបស់លោក Juan Guaido មេដឹកនាំគណបក្សប្រឆាំងនៅក្នុងប្រទេសវ៉េណេស៊ុយអេឡាត្រូវបានដោះលែងចេញពីពន្ធនាគារក្នុងទីក្រុងការ៉ាកាសតែក្នុងរយៈពេលប៉ុន្មានម៉ោងបន្ទាប់ពីរដ្ឋាភិបាលបានប្រកាសថាលោកប្រធានាធិបតី Nicolas Maduro បានលើកលែងទោសអ្នកនយោបាយបក្សប្រឆាំងជាង១០០នាក់។
លោក Jorge Rodriguez រដ្ឋមន្ត្រីសារគមនាគមន៍របស់វ៉េណេស៊ុយអេឡាថ្លែងថា ចេតនារបស់រដ្ឋាភិបាលគឺដើម្បីពង្រឹងដំណើរការផ្សះផ្សារជាតិដើម្បីឱ្យបញ្ហានយោបាយដោះស្រាយបានតាមមធ្យោបាយសន្តិវិធី និងការបោះឆ្នោត។
លោក Guaido ដែលបានប្រកាសខ្លួនលោកថាជាប្រធានាធិបតី និងឥស្សរជនបក្សប្រឆាំងសំខាន់ៗជាច្រើនទៀតបានប្តេជ្ញាថានឹងធ្វើពហិការការបោះឆ្នោតដោយបារម្ភពីកង្វះតម្លាភាព។
លោក Henry Ramos Allup ប្រធានគណបក្សដែលយូរជាងគេរបស់វ៉េណេស៊ុយអេឡាគឺគណបក្សសកម្មភាពប្រជាធិបតេយ្យក៏ត្រូវបានលើកលែងទោសផងដែរ ក៏ដូចជាអ្នកដែលកំពុងជាប់ក្តីក្តាំសំខាន់ៗក្នុងតុលាការ និងអ្នកតំណាងរាស្ត្រដែលកំពុងរស់នៅនិរទេសខ្លួន៕
