លោក Nicolas Maduro ប្រធានាធិបតីវេណេស៊ុយអេឡា បានចុះខ្សោយកាលពីថ្ងៃសៅរ៍នៅពេលសមាជិកម្នាក់នៃមេបញ្ជាការដ្ឋានកងទ័ពអាកាសឈប់ទទួលស្គាល់រដ្ឋាភិបាលសង្គមនិយមរបស់លោក ហើយទទួលស្គាល់មេដឹកនាំប្រឆាំងគឺលោក Juan Guaido ជាប្រធានាធិបតីអន្តរកាល។
ឧត្តមសេនីយ៍ Francisco Yanez ក៏បានអំពាវនាវឱ្យសមាជិកយោធាដទៃទៀតចុះចូលនៅថ្ងៃដែលលោក Guaido និងលោក Maduro បានអំពាវនាវឱ្យមានការធ្វើបាតុកម្មនៅក្នុងប្រទេសនៅអាមេរិកខាងត្បូងនេះនៅពេលពិភពលោកដាក់សម្ពាធឲ្យលោក Maduro ចុះចេញពីតំណែង។ ក្នុងបទសម្ភាសន៍ក្នុងកម្មវិធី VOA លោក Noticias លោក Guaido និយាយថា លោកបានផ្តល់ការលើកលែងទោសនិងការធានាដល់មន្រ្តីយោធាជាន់ខ្ពស់ជាផ្នែកមួយនៃកិច្ចខិតខំប្រឹងប្រែងទូលំទូលាយដើម្បីធ្វើការផ្ទេរអំណាចឲ្យចប់។
អ្នកគាំទ្រលោក Guaido គ្រោងធ្វើបាតុកម្មតាមផ្លូវនៅថ្ងៃសៅរ៍ដើម្បីគាំទ្រការអំពាវនាវរបស់លោកឲ្យមានការបោះឆ្នោតមុនកំណត់និងបង្កើតរដ្ឋាភិបាលអន្តរកាលមួយ។ គណបក្សសង្គមនិយមរបស់ Maduro បានប្រារព្ធខួប២០ឆ្នាំនៃបដិវត្តន៍ Bolivarian ដែលនាំឱ្យលោក Hugo Chavez ឡើងកាន់អំណាចជាប្រធានាធិបតីដែលបានស្លាប់មុនលោក Maduro ឡើងក្តាប់អំណាច។
បាតុកម្មបាននេះបង្ហាញពីភាពតានតឹងកាន់តែខ្លាំងឡើងនៅសប្តាហ៍ទី២នៅវេណេស៊ុយអេឡា ហើយវាកើតឡើងមុនថ្ងៃកំណត់នៅថ្ងៃអាទិត្យដែលបណ្តាប្រទេសអឺរ៉ុបសំខាន់ៗកំនត់ឲ្យលោក Maduro ប្រកាសការបោះឆ្នោតមុនថ្ងៃកំណត់។ ប្រទេសអង់គ្លេស បារាំង អាល្លឺម៉ង់ និងអេស្ប៉ាញបាននិយាយថា ពួកគេនឹងធ្វើតាមស.រ.អា.ក្នុងការទទួលស្គាល់លោក Guaido ប្រធានសភាជាតិ ឲ្យធ្វើជាប្រធានាធិបតីវេណេស៊ុយអេឡា អន្តរកាលប្រសិនបើនៅថ្ងៃអាទិត្យនេះ លោក Maduro មិនបញ្ជាឲ្យមានការបោះឆ្នោតថ្មីទេនោះ៕
