អ្នកវិទ្យាសាស្ត្រជាង៤០០នាក់ ចូលរួមក្នុងកិច្ចប្រជុំរយៈពេល២ថ្ងៃ កាលពីថ្ងៃទី១២ ខែកុម្ភៈ នៅក្នុងក្រុងហ្សឺណែវដោយផ្ទាល់ និងតាមរយៈវីដេអូ ដើម្បីស្វែងរកយុទ្ធសាស្ត្រស្រាវជ្រាវ ក្នុងការពន្លឿនការអភិវឌ្ឍវីធីព្យាបាលទប់ស្កាត់ការរីករាលដាលនៃមេរោគដ៏កាចសាហាវមួយនេះ។
ប្រធានអង្គការសុខភាពពិភពលោក WHO លោក Tedros Adhanom Ghebreyesus និយាយថា លោកមិនគិតថា អ្នកវិទ្យាសាស្ត្រនឹងអាចផ្តល់ចម្លើយភ្លាមៗដើម្បីឆ្លើយតបទៅនឹងសំណួរជាច្រើនពាក់ព័ន្ធនឹងមេរោគកូរ៉ូណាថ្មីនេះនោះទេ។ ប៉ុន្តែលោកនិយាយថា លោករំពឹងថា ពួកគេនឹងផ្តល់ផ្លូវណែនាំសម្រាប់ការស្រាវជ្រាវទៅលើអ្វីដែលត្រូវធ្វើដើម្បីបញ្ចប់ជំងឺដែលឆ្លងរាលដាលដ៏លឿនមួយនេះ។
លោកនិយាយថា ការផលិតវ៉ាក់សាំង និងវិធីព្យាបាលដើម្បីការពារមនុស្សមិនឱ្យឆ្លងមេរោគ និងព្យាបាលអ្នកដែលឆ្លងមេរោគនេះ គឺជារឿងសំខាន់។ ប៉ុន្តែលោកបានកត់សម្គាល់ថា ការផលិតវ៉ាក់សាំងនេះត្រូវការពេលវេលា ហើយនេះមានន័យថា មេរោគនេះនឹងបន្តឆ្លងរាលដាលឥតឈប់ឈរនៅជុំវិញពិភពលោក។
លោក Tedros Adhanom Ghebreyesus ថ្លែងថា៖ «ប៉ុន្តែនៅក្នុងពេលនេះ មិនមានន័យថា យើងមិនអាចការពារខ្លួនបាននោះទេ។ មានវិធីសាស្ត្រអន្តរាគមន៍ផ្នែកសុខភាពសាធារណៈជាមូលដ្ឋានជាច្រើន ដែលយើងអាចប្រើប្រាស់បាននៅពេលនេះ និងដែលអាចបង្ការការឆ្លងជំងឺនេះបាននៅពេលនេះ។ ជាឧទាហរណ៍ វ៉ាក់សាំងលើកដំបូងអាចនឹងបង្កើតបានក្នុងរយៈពេល១៨ខែ ដូច្នេះ យើងត្រូវធ្វើអ្វីៗគ្រប់យ៉ាងនៅពេលនេះ ដោយប្រើប្រាស់វិធីសាស្ត្រដែលមានដើម្បីប្រយុទ្ធប្រឆាំងនឹងមេរោគមួយនេះ»។
លោក Tedros និយាយថា WHO កំពុងជួយប្រទេសនានាត្រៀមខ្លួនសម្រាប់ការរាលដាលនៃជំងឺដែលអាចកើតមាន ដោយពង្រឹងនូវសមត្ថភាពការតេស្តពិសោធន៍របស់ពួកគេ ដើម្បីឱ្យពួកគេអាចរកឃើញមេរោគនេះបានលឿន។ លោកនិយាយថា បុគ្គលិកសុខាភិបាលរាប់ពាន់កំពុងទទួលការបណ្តុះបណ្តាលពីរបៀបព្យាបាលអ្នកជំងឺ។ លោកបានបន្ថែមថា ពលរដ្ឋនានាអាចការពារខ្លួនរបស់ពួកគេបានដោយប្រើប្រាស់វិធីសាស្ត្រសាមញ្ញជាច្រើន ដែលរួមមានការលាងដៃជាមួយនឹងសាប៊ូ និងទឹក និងនៅឱ្យឆ្ងាយពីមនុស្សដែលក្អក និងកណ្ដាស់។
លោកនិយាយថាអង្គការសុខភាពពិភពលោក WHO និងទីភ្នាក់ងារពាក់ព័ន្ធផ្សេងទៀតបានយល់ស្របដាក់ឈ្មោះឱ្យមេរោគកូរ៉ូណាប្រភេទថ្មីនេះថា COVID-19។ ចាប់ពីថ្ងៃនេះទៅ មេរោគមួយនេះនឹងត្រូវបានគេហៅថា COVID-19។
លោក Tedros និយាយថា៖ «យើងត្រូវតែរកឈ្មោះណាដែលមិនជាប់ពាក់ព័ន្ធនឹងទីកន្លែង សត្វ បុគ្គល ឬក្រុមមនុស្សណាមួយ និងឈ្មោះដែលអាចអានបាន និងពាក់ព័ន្ធទៅនឹងជំងឺនោះ។ ការដាក់ឈ្មោះឱ្យនេះគឺចាំបាច់ ដើម្បីការពារមិនឲ្យមានការប្រើប្រាស់ឈ្មោះផ្សេងទៀត ដែលមិនត្រឹមត្រូវ ឬមានការរើសអើង»។
លោក Tedros កំពុងអំពាវនាវឱ្យប្រទេសនានាធ្វើការគាំទ្រដល់ការស្វែងរកថវិកាចំនួន៦៧៥លានដុល្លាររបស់ WHO។ លោកនិយាយថា ទឹកប្រាក់នេះត្រូវការជាចាំបាច់ដើម្បីជួយដល់ប្រទេសក្រីក្រពង្រឹងប្រព័ន្ធសុខាភិបាលទន់ខ្សោយរបស់ពួកគេ ដើម្បីអាចឱ្យពួកគេការពារខ្លួនពីមេរោគដ៏គ្រោះថ្នាក់មួយនេះ។
លោកនិយាយថា ការវិនិយោគត្រូវតែធ្វើឡើងនៅពេលនេះ ដើម្បីបញ្ឈប់ការផ្ទុះឡើងនៃជំងឺនេះកុំឲ្យរាលដាលបន្ត។ ប្រសិនបើមេរោគនេះឆ្លងរាលដាលដល់ប្រទេសដែលមានប្រព័ន្ធសុខាភិបាលទន់ខ្សោយនោះ លោកព្រមានថា វានឹងបង្កចលាចលនៅជុំវិញពិភពលោក៕
