ប្រធានាធិបតីអ៊ូសបេគីស្ថានលោក Shavkat Mirziyoyev បាននិយាយកាលពីថ្ងៃអាទិត្យថា មានមនុស្សស្លាប់ក្នុងចំណោមជនស៊ីវិល និងមន្ត្រីអនុវត្តច្បាប់ បន្ទាប់ពីមានការតវ៉ាដ៏កម្រនៅក្នុងប្រទេសនៅអាស៊ីកណ្តាលនេះ ហើយអ្នកនយោបាយប្រឆាំងនិរទេសខ្លួនបាននិយាយថា យ៉ាងហោចណាស់មនុស្ស៥នាក់ស្លាប់។ នេះបើតាមទីភ្នាក់ងារសារព័ត៌មាន Reuters។
ដោយឡែកមន្ត្រីរដ្ឋាភិបាលក្នុងតំបន់បានប្រាប់គេហទំព័រព័ត៌មាន Uzbek ថា មនុស្សរាប់ពាន់នាក់ត្រូវបានបញ្ជូនទៅមន្ទីរពេទ្យ។ នៅក្នុងសេចក្តីថ្លែងការណ៍តាមអ៊ីនធឺណិត លោក Mirziyoyev បាននិយាយថា ក្រុមកុបកម្មបានធ្វើ«សកម្មភាពបំផ្លិចបំផ្លាញ» នៅក្នុងទីក្រុង Nukus រដ្ឋធានីតំបន់ Karakalpakstan ភាគពាយ័ព្យ ដោយគប់ដុំថ្ម ដុតភ្លើង និងវាយប្រហារប៉ូលិស។
លោកបានថ្លែងថា៖ «ជាអកុសល មានជនរងគ្រោះក្នុងចំណោមជនស៊ីវិល និងមន្ត្រីអនុវត្តច្បាប់។ សេចក្តីថ្លែងការណ៍នេះមិនបានបញ្ជាក់ពីតួលេខ និងស្ថានភាពមនុស្សរងគ្រោះទេ។ លោក Sultanbek Ziyayev រដ្ឋមន្ត្រីក្រសួងសុខាភិបាលនៃសាធារណៈរដ្ឋ Karakalpakstan បានប្រាប់គេហទំព័រព័ត៌មាន Daryo.uz ថា មន្ទីរពេទ្យក្នុងទីក្រុង Nukus ពោរពេញដោយអ្នកជំងឺដែលរងរបួស នៅពេលដែលក្រុមអ្នកតវ៉ាប៉ះទង្គិចជាមួយកងកម្លាំងសន្តិសុខ។ បើតាមគេហទំព័រនេះ លោកបាននិយាយថា៖ «អ្នករបួសរាប់ពាន់នាក់ត្រូវបានបញ្ជូនទៅមន្ទីរពេទ្យទទួលការព្យាបាល»។
រូបថតពីទីក្រុង Nukus ចេញផ្សាយកាលពីថ្ងៃអាទិត្យដោយគេហទំព័រព័ត៌មានមួយទៀតគឺKun.uz បានបង្ហាញរូបភាពរបាំងផ្លូវ ឡានដឹកទំនិញឆេះ និងវត្តមានយោធាដ៏ច្រើន រួមទាំងរថពាសដែក។ វីដេអូដែលបានចែករំលែកនៅលើប្រព័ន្ធផ្សព្វផ្សាយសង្គមបានបង្ហាញមនុស្សយ៉ាងហោចណាស់ពីរនាក់រងរបួសធ្ងន់ដោយត្រូវគេសែងដោយកាន់ដៃនិងជើង។ ជនរងគ្រោះម្នាក់ហូរឈាមតាមពោះ ចំណែកម្នាក់ទៀតស្រែកយំ។
វីដេអូមួយទៀតបង្ហាញពីយុវជនម្នាក់ក្រាបលើជនរងគ្រោះដែលទំនងជាស្លាប់នៅតាមផ្លូវ ដោយស្រែកថា «គាត់ស្លាប់ហើយ» រួចបុរសនោះរត់រកកន្លែងជ្រក ពេលមានស្នូរកាំភ្លើង។ ទីភ្នាក់ងារព័ត៌មាន Reuters មិនអាចផ្ទៀងផ្ទាត់ភ្លាមៗអំពីវីដេអូនោះទេ។ អ្នកនយោបាយប្រឆាំងដែលនិរទេសខ្លួនគឺលោក Pulat Ahunov បានប្រាប់ទីភ្នាក់ងារព័ត៌មាន Reuters ថា ដោយផ្អែកតាមការធ្វើទំនាក់ទំនងជាមួយប្រភពក្នុងស្រុក និងភស្តុតាងវីដេអូ យ៉ាងហោចណាស់មនុស្ស៥នាក់ត្រូវបានសម្លាប់។ លោកបាននិយាយថា មានរបាយការណ៍មិនបានបញ្ជាក់អំពីអ្នកស្លាប់រាប់សិបនាក់ទៀត។
លោក Ahunov បាននិយាយថា ប្រជាជនមិនអាចទៅណាមកណាដើម្បីបានព័ត៌មានបន្ថែមទេ ដោយសារស្ថានភាពអាសន្នកំណត់ដោយអាជ្ញាធរ។ អ៊ូសបេគីស្ថានជាសារណរដ្ឋចំណុះអតីតសហភាពសូវៀតដែលគ្រប់គ្រងយ៉ាងតឹងរ៉ឹង ហើយរដ្ឋាភិបាលធ្វើការបង្ក្រាបយ៉ាងតឹងរ៉ឹងលើការប្រឆាំងគ្រប់ទម្រង់។
នេះគឺជាភាពចលាចលលើកទីពីរនៅប្រទេសនេះក្នុងឆ្នាំនេះ បន្ទាប់ពីប្រតេសកាហ្សាក់ស្ថានបានបង្ក្រាបការតវ៉ាទ្រង់ទ្រាយធំកាលពីខែមករា ហើយរុស្ស៊ី និងសាធារណរដ្ឋចំណុះអតីតសហភាពសូវៀតផ្សេងទៀតបានបញ្ជូនទាហានទៅជួយអាជ្ញាធរស្តារសណ្តាប់ធ្នាប់ឡើងវិញ។ ការតវ៉ានៅក្នុងប្រទេសអ៊ូសបេគីស្ថានបណ្តាលមកពីការផ្លាស់ប្តូររដ្ឋធម្មនុញ្ញដែលនឹងធ្វើឱ្យរដ្ឋ Karakalpakstan បាត់បង់ឋានៈស្វយ័ត។ លោកប្រធានាធិបតីបានដកផែនការនោះវិញកាលពីថ្ងៃសៅរ៍៕
រាយការណ៍ដោយលោក Olzhas Auyezov នៅក្រុង Almaty និងលោក Mark Trevelyan នៅទីក្រុងឡុងដ៍
