ទីភ្នាក់ងារផ្ដល់ជំនួយអភិវឌ្ឍន៍សហរដ្ឋអាមេរិក ឬហៅកាត់ថា USAID បានចាប់ផ្ដើមគម្រោងថ្មីមួយ ដើម្បីការពារនិងលើកកម្ពស់សិទ្ធិរបស់ក្រុមអ្នកស្រឡាញ់ភេទដូចគ្នា អ្នកស្រឡាញ់មនុស្សទាំងពីរភេទ អ្នកកែភេទ និងអ្នកមានលក្ខណៈភេទមិនចំជាប្រុសឬស្រី (LGBTI) នៅកម្ពុជា។ នេះបើតាមសេចក្ដីប្រកាសព័ត៌មានមួយរបស់ស្ថានទូតអាមេរិកប្រចាំកម្ពុជានៅថ្ងៃពុធនេះ។
គម្រោងដែលគេដាក់ឈ្មោះថា «យើងដូចគ្នា» (We are the Same) ត្រូវបានប្រកាសនៅថ្ងៃពុធនេះ ដោយទីភ្នាក់ងារ USAID ក្នុងបំណងអប់រំ និងអភិវឌ្ឍន៍ក្នុងសកម្មភាព អនុវត្ត ហើយនឹងជួយដល់សកម្មភាពតស៊ូមតិ សកម្មភាពលើកកម្ពស់ការយល់ដឹងនានា និងពង្រឹងសិទ្ធិរបស់ក្រុម LGBTI នៅកម្ពុជា។
លោកស្រី Julie Chung ភារធារីស្ថានទូតអាមេរិកប្រចាំកម្ពុជា បានមានប្រសាសន៍តាមខ្លឹមសារដើមថា៖
«ខ្ញុំមានមោទនភាពដែលរដ្ឋាភិបាលសហរដ្ឋអាមេរិកគាំទ្រការខិតខំដើម្បីការពារសិទ្ធិ របស់ក្រុម LGBTI នៅក្នុងប្រទេស និងនៅបរទេស។ គម្រោងដូចជាគម្រោង “យើងដូចគ្នា» នេះ ឆ្លុះបញ្ចាំង ការប្ដេជ្ញាចិត្តរបស់យើងក្នុងការលុបបំបាត់ឧបសគ្គ ចំពោះសមភាព ហើយប្រឆាំងនឹងការរើសអើង និងហិង្សា ដោយសារភេទ ដែលគេស្រឡាញ់ និងអត្តសញ្ញាណយេនឌ័រ»។
សេចក្ដីថ្លែងការណ៍ដដែលបញ្ជាក់ថា គម្រោងនេះបញ្ជាក់ពីការប្តេជ្ញាចិត្តរបស់រដ្ឋាភិបាលសហរដ្ឋអាមេរិកចំពោះសិទ្ធិ របស់ក្រុម LGBTI ជាផ្នែកសំខាន់មួយសម្រាប់ទ្រទ្រង់សិទ្ធិមនុស្សទាំងនៅកម្ពុជា ទាំងនៅទូទាំងសាកលលោក។
ដោយសារការមាក់ងាយនិងការភ័យខ្លាច ប្រហែល ១ភាគ៣ នៃប្រជាជនកម្ពុជាក្នុងក្រុម LGBTI មិនដែលបើកចំហអំពីខ្លួនគេទេ ហើយចំនួនជាង១ ភាគ៥ ចង់អោយខ្លួនគេ ក្លាយជាមនុស្សស្រឡាញ់មនុស្សភេទផ្ទុយគ្នាដូច មនុស្សធម្មតា។ នេះបើតាមលទ្ធផលនៃការអង្កេតដែលចេញនៅខែធ្នូ ឆ្នាំ ២០១៥ ដោយអង្គការសហគមន៍ ឥន្ទធនូកម្ពុជា៕
