ប្រទេសកូរ៉េខាងត្បូងបានអបអរសាទរលោក Joe Biden ខាងគណបក្សប្រជាធិបតេយ្យដែលត្រូវបានព្យាករណ៍ថាឈ្នះការបោះឆ្នោតប្រធានាធិបតីសហរដ្ឋអាមេរិក។
ប្រធានាធិបតីកូរ៉េខាងត្បូងលោក Moon Jae In បានសរសេរសារខ្លីមួយនៅលើ Twitter នៅថ្ងៃអាទិត្យនេះ ដោយបង្ហាញការគាំទ្រចំពោះលោក Biden និងអនុប្រធានាធិបតីជាប់ឆ្នោតអ្នកស្រី Kamala Harris។
លោក Moon Jae In បានសរសេរដូច្នេះថា៖ «អបអរសាទរចំពោះលោក Joe Biden និងអ្នកស្រី Kamala Harris។ សម្ព័ន្ធភាពរបស់យើងគឺរឹងមាំ ហើយទំនាក់ទំនងរវាងប្រទេសយើងទាំងពីរគឺរឹងមាំដូចថ្ម។ ខ្ញុំទន្ទឹងរង់ចាំធ្វើការជាមួយអ្នកដើម្បីគុណតម្លៃរួមគ្នារបស់យើង»។
លោកបានសរសេរបន្ថែមថា៖ «ខ្ញុំមានក្ដីរំពឹងខ្ពស់នៃការធ្វើឲ្យប្រសើរឡើង និងការបើកឲ្យមានការអភិវឌ្ឍនៅពេលអនាគតនៃទំនាក់ទំនងទ្វេភាគីរបស់យើង។ តោះធ្វើដំណើរទាំងអស់គ្នា»៕
