កំណត់និពន្ធ៖ តើបញ្ញាសិប្បនិម្មិត ឬ AI អាចបំផ្លាញមនុស្សជាតិបានទេ? មន្ត្រីជាន់ខ្ពស់សហរដ្ឋអាមេរិកបានថ្លែងថា រដ្ឋាភិបាលសហរដ្ឋអាមេរិកកំពុងធ្វើការជាមួយក្រុមហ៊ុន AI ឈានមុខគេ និងយ៉ាងហោចណាស់ប្រទេសចំនួន ២០ ដើម្បីបង្កើតវិធានការការពារដើម្បីកាត់បន្ថយហានិភ័យដែលអាចកើតមាន ស្របពេលផ្តោតលើការច្នៃប្រតិដ្ឋថ្មីនៃបច្ចេកវិទ្យា AI។
លោក Nathaniel Fick ឯកអគ្គរដ្ឋទូតសហរដ្ឋអាមេរិកទទួលបន្ទុកពិ សេសលើគោលនយោបាយឌីជីថល និងអ៊ីនធឺណិតបានថ្លែងប្រាប់ VOA កាលពីថ្ងៃទី២៥ ខែកក្កដា អំពីការប្តេជ្ញាចិត្តដោយស្ម័គ្រចិត្តពីក្រុមហ៊ុន AI ឈានមុខគេក្នុងការធានាសុវត្ថិភាព និងតម្លាភាពជុំវិញការអភិវឌ្ឍ AI
កម្មវិធី AI ដែលចេះនិពន្ធ ឬ Generative AI ដ៏ពេញនិយមមួយគឺកម្មវិធី ChatGPT ដែលមិនអាចចូលប្រើបាននៅក្នុងប្រទេសចិន។ ប្រសិនបើវាអាចប្រើបាននៅចិនវិញ ហើយអ្នកប្រើប្រាស់សួរសំណួររសើបផ្នែកនយោបាយជាភាសាចិនកុកងឺដូចជា «តើការសម្លាប់រង្គាលនៅទីលាន Tiananmen ឆ្នាំ ១៩៨៩ ជាអ្វី?» អ្នកប្រើប្រាស់នឹងទទួលបានព័ត៌មានដែលត្រូវបានរដ្ឋាភិបាលក្រុងប៉េកាំងត្រួតពិនិត្យយ៉ាងដិតដល់។
ប៉ុន្តែកម្មវិធី ChatGPT ដែលបង្កើតឡើងដោយក្រុមហ៊ុន OpenAI ដែលមានមូលដ្ឋាននៅសហរដ្ឋអាមេរិក មិនអាចប្រើប្រាស់បាននៅក្នុងប្រទេសចិននោះទេ។
ប្រទេសចិនបានបង្កើតច្បាប់គ្រប់គ្រង AI ដែលចេះនិពន្ធរបស់ខ្លួនរួចហើយ។ បទប្បញ្ញត្តិថ្មីនឹងចូលជាធរមាននៅថ្ងៃទី ១៥ ខែសីហាខាងមុខ។ ប្រព័ន្ធឆាតស្វ័យប្រវត្តិ ឬ ឆាតបត់ (chatbots) របស់ចិនត្រូវបានគេរាយការណ៍ថា មានភ្ជាប់ការត្រួតពិនិត្យមកជាស្រាប់ដើម្បីបញ្ចៀសពាក្យគន្លឹះរសើប។
លោក Fick បានប្រាប់ VOA ក្នុងសម្តីដើមថា «ខ្ញុំគិតថា ការអភិវឌ្ឍប្រព័ន្ធទាំងនេះពិតជាទាមទារឱ្យមានមូលដ្ឋានគ្រឹះនៃការបើកចំហ អន្តរប្រតិបត្តិការ ការជឿទុកចិត្តបាននៃទិន្នន័យ។ ហើយវិធីសាស្រ្តគ្រប់គ្រងផ្តាច់ការពីលើចុះក្រោមដែលកំណត់លំហូរព័ត៌មានគ្រប់ពេលនឹងប៉ះពាល់ដល់សមត្ថភាពរបស់រដ្ឋាភិបាល និងក្រុមហ៊ុន ក្នុងការទ្រទ្រង់នូវភាពច្នៃប្រតិដ្ឋថ្មីក្នុងបច្ចេកវិទ្យា AI»។
ខាងក្រោមជាសម្រង់នៃបទសម្ភាសន៍មួយដែលត្រូវបានកែសម្រួលដើម្បីឱ្យមានខ្លឹមសារខ្លីនិងច្បាស់៖
VOA៖ ក្រុមហ៊ុន AI ឈានមុខគេចំនួន ៧ បានធ្វើការសន្យាចំនួន ៨ អំពីអ្វីដែលពួកគេនឹងធ្វើជាមួយនឹងបច្ចេកវិទ្យារបស់ពួកគេ។ តើការប្តេជ្ញាចិត្តទាំងនេះមានន័យយ៉ាងណា?
លោក Fick៖ នៅពេលដែលយើងគិតអំពីអភិបាលកិច្ចនៃព្រំដែនបច្ចេកវិទ្យាថ្មីនៃបញ្ញាសិប្បនិម្មិតនេះ គោលដៅរបស់យើងគួរតែរក្សាទុកការច្នៃប្រតិដ្ឋថ្មីរបស់យើង និងធានាថា យើងអាចបន្តរក្សាភាពជាអ្នកដឹកនាំជាសាកលក្នុងការអភិវឌ្ឍឧបករណ៍ AI ដ៏ខ្លាំងក្លា ពីព្រោះអត្ថប្រយោជន៍នៃការចូលរួមសហការដោះស្រាយបញ្ហាប្រឈមរួមគ្នានៅជុំវិញពិភពលោក គឺធំធេងណាស់។
ការប្តេជ្ញាចិត្តទាំងនេះចែកចេញជា ៣ ប្រភេទធំៗ។ ទី ១ ក្រុមហ៊ុនមានកាតព្វកិច្ចធានាថា ផលិតផលរបស់ពួកគេមានសុវត្ថិភាព។ ទី ២ ក្រុមហ៊ុនមានទំនួលខុសត្រូវក្នុងការធានាថា ផលិតផលរបស់ពួកគេមិនអាចលួចចូលបាន។ ទី ៣ ក្រុមហ៊ុនមានកាតព្វកិច្ចធានាថា ផលិតផលរបស់ពួកគេទទួលបានការទុកចិត្តពីមនុស្សជុំវិញពិភពលោក។ ដូច្នេះហើយ យើងត្រូវការមធ្យោបាយសម្រាប់ឲ្យអ្នកមើល អ្នកប្រើប្រាស់ បញ្ជាក់ថាតើមាតិកាជាសំឡេង ឬជារូបភាពណាមួយត្រូវបានបង្កើតដោយ AI ឬអត់ និងថាតើវាពិត ឬអត់។ នេះហើយជាអត្ថន័យនៃការប្តេជ្ញាចិត្តទាំងនេះ។
VOA៖ តើរដ្ឋាភិបាលសហរដ្ឋអាមេរិកនឹងផ្គត់ផ្គង់មូលនិធិដល់ការធ្វើតេស្តសុវត្ថិភាពមួយចំនួនដែលធ្វើឡើងដោយក្រុមហ៊ុនទាំងនោះដែរ ឬទេ?
លោក Fick៖ រដ្ឋាភិបាលសហរដ្ឋអាមេរិកចាប់អារម្មណ៍យ៉ាងខ្លាំងក្នុងការធានាថា ក្រុមហ៊ុននិងគំរូពាណិជ្ជកម្មទាំងនេះ និងផលិតផលរបស់ពួកគេមានសុវត្ថិភាព មិនអាចលួចចូលបាន និងផ្តល់ការទុកចិត្ត។ យើងទន្ទឹងរង់ចាំធ្វើជាដៃគូជាមួយក្រុមហ៊ុនទាំងនេះនៅពេលណាមួយដើម្បីធ្វើកិច្ចការនោះ។ ច្បាស់ណាស់ វាក៏អាចរួមបញ្ចូលភាពជាដៃគូផ្នែកហិរញ្ញវត្ថុផងដែរ។
VOA៖ សេតវិមានបានកំណត់ការការពារជំងឺមហារីក និងការកាត់បន្ថយការប្រែប្រួលអាកាសធាតុជាវិស័យចំនួន ២ ដែលចង់ឱ្យក្រុមហ៊ុន AI ផ្តោតកិច្ចខិតខំប្រឹងប្រែងរបស់ខ្លួនលើ។ តើលោកអាចនិយាយអំពីការប្រកួតប្រជែងរបស់សហរដ្ឋអាមេរិកជាមួយចិនលើបច្ចេកវិទ្យា AI បានដែរឬទេ? តើការប្រកួតប្រជែងជាមួយចិនជាអាទិភាពរបស់រដ្ឋបាលលោក Biden ដែរឬទេ?
លោក Fick៖ យើងនឹងរំពឹងថា វិធីសាស្រ្តរបស់ចិនចំពោះបញ្ញាសិប្បនិម្មិត ឬ AI នឹងដូចទៅនឹងវិធីសាស្ត្រដែលសាធារណរដ្ឋប្រជាមានិតចិនប្រើនៅក្នុងផ្នែកផ្សេងៗទៀតនៃវិស័យបច្ចេកវិទ្យា។ ជាទូទៅ គេប្រើវិធីសាស្ត្រពីលើចុះក្រោម។ ជាទូទៅ មិនផ្តោតលើការបញ្ចេញមតិបើកចំហ មិនផ្តោតលើការបើកចំហចំពោះព័ត៌មាននោះទេ។ ហើយប្រព័ន្ធ AI ទាំងនេះ តាមលក្ខណៈរបស់ពួកវា ទាមទារឱ្យមានការបើកចំហ និងការទទួលបានបណ្តុំទិន្នន័យ និងព័ត៌មានធំៗ។
VOA៖ អ្នកជំនាញផ្នែកឧស្សាហកម្មមួយចំនួនបានព្រមានថា ប្រទេសចិនកំពុងចំណាយប្រាក់ច្រើនជាងសហរដ្ឋអាមេរិកដល់ទៅ ៣ ដងដើម្បីក្លាយជាអ្នកដឹកនាំផ្នែក AI ក្នុងពិភពលោក។ តើលោកអាចនិយាយអំពីមហិច្ឆតារបស់ចិនលើផ្នែក AI បានទេ? តើសហរដ្ឋអាមេរិកកំពុងតាមដានគូប្រកួតប្រជែងមួយនេះដែរ ឬទេ?
លោក Fick៖ យើងពិតជាបានតាមដានចំណុចមួយចំនួនដូចជា ការស្រាវជ្រាវនិងការអភិវឌ្ឍ និងចំនួនទឹកប្រាក់វិនិយោគ ប៉ុន្តែខ្ញុំចង់លើកឡើងថា ទាំងនេះគឺជាកិច្ចខិតខំប្រឹងប្រែងបង្កើត មិនមែនជាលទ្ធផលនោះទេ។ ហើយខ្ញុំគិតថា វាមិនមែនជារឿងចៃដន្យនោះទេដែលថា ក្រុមហ៊ុនឈានមុខគេក្នុងការស្រាវជ្រាវ AI គឺជាក្រុមហ៊ុនអាមេរិក។ ប្រព័ន្ធនវានុវត្តន៍របស់យើង គាំទ្រដោយគោលនយោបាយស្រាវជ្រាវនិងអន្តោប្រវេសន៍មូលដ្ឋានដែលទាក់ទាញអ្នកមានទេពកោសល្យ និងដោយគោលនយោបាយពន្ធនិងនិយ័តកម្មដ៏ល្អបំផុតក្នុងពិភពលោក ដែលលើកទឹកចិត្តដល់ការបង្កើត និងការរីកចម្រើន។
VOA៖ តើលោកមានមតិចុងក្រោយអ្វីទេអំពីហានិភ័យ? តើគំរូ AI អាចត្រូវបានប្រើដើម្បីបង្កើតអាវុធជីវសាស្ត្រដែរ ឬទេ? តើ AI អាចបំផ្លាញមនុស្សជាតិបានទេ?
លោក Fick៖ តាមបទពិសោធន៍របស់ខ្ញុំ ហានិភ័យ និងផលប្រយោជន៍ពិតជាមានទំនាក់ទំនងគ្នាក្នុងជីវិត និងក្នុងទីផ្សារហិរញ្ញវត្ថុ។ មានផលប្រយោជន៍ និងការសន្យាដ៏ធំនៅក្នុងបច្ចេកវិទ្យាទាំងនេះ ហើយច្បាស់ណាស់ ក្នុងពេលជាមួយគ្នា ក៏មានហានិភ័យសំខាន់ៗផងដែរ។ យើងត្រូវរក្សាគោលដៅរបស់យើង ការផ្តោតអារម្មណ៍របស់យើងលើភាពច្នៃប្រតិដ្ឋថ្មី និងការសន្យាទាំងអស់ដែលបច្ចេកវិទ្យាទាំងនេះនឹងនាំមក។ ក្នុងពេលជាមួយគ្នានេះ វាជាទំនួលខុសត្រូវរបស់យើងក្នុងនាមជារដ្ឋាភិបាល និងជាក្រុមហ៊ុន ដែលឈានមុខគេក្នុងវិស័យនេះ ដើម្បីដាក់វិធានការការពារដើម្បីកាត់បន្ថយហានិភ័យទាំងនោះ៕
ប្រែសម្រួលដោយលោក ប៉ូច រាសី និងលោក ចាប ចិត្រា
