បច្ចេកវិទ្យាបញ្ញាសិប្បនិម្មិតចេះនិពន្ធ ឬ Generative AI ដែលអាចបង្កើតសំណេរ រូបភាព និងមាតិកាដទៃទៀត តាមសារបញ្ជារបស់អ្នកប្រើប្រាស់ កំពុងតែផ្លាស់ប្តូររបៀបដែលមនុស្សធ្វើការ។ កម្មវិធីមួយនៅក្នុងចំណោមនោះគឺ កម្មវិធី ChatGPT ដែលទទួលបានអ្នកប្រើប្រាស់សកម្មប្រចាំខែរហូតដល់ ១០០លាននាក់នៅក្នុងរយៈពេលតែត្រឹមពីរខែដំបូងប៉ុណ្ណោះ ចាប់តាំងពីការដាក់ចេញឲ្យប្រើប្រាស់នៅខែវិច្ឆិកា ឆ្នាំ២០២២។ កម្មវិធី ChatGPT បានក្លាយជាកម្មវិធីដែលមានកំណើនអ្នកប្រើប្រាស់លឿនជាងគេបង្អស់នៅក្នុងប្រវត្តិសាស្រ្ត។ ក្រុមអ្នកជំនាញព្យាករណ៍ថា ទីផ្សារការងារនៅលើសាកលលោកនឹងប្រឈមនឹងការផ្លាស់ប្តូរយ៉ាងសំខាន់មួយ ខណៈបច្ចេកវិទ្យាបញ្ញាសិប្បនិម្មិតនិងស្វ័យប្រវត្តិកម្មត្រូវបានដាក់បញ្ចូលនៅតាមវិស័យនានា។
