លោករដ្ឋមន្រ្តីការពារប្រទេសសហរដ្ឋអាមេរិក Ash Carter បានមានប្រសាសន៍ថា សហរដ្ឋអាមេរិកនឹងមិនពឹងផ្អែកឯកសារសង្គ្រាមត្រជាក់នៅក្នុងការដោះស្រាយជាមួយប្រទេសរុស្ស៊ីទេ ក៏ប៉ុន្តែ ជាជំនួសទៅវិញ នឹងពឹងផ្អែកលើការរួមផ្សំខាងឧបករណ៍យោធា និងមិនមែនយោធាដើម្បីតទល់ការឈ្លានពានរបស់រុស្ស៊ីនៅក្នុងប្រទេសអ៊ុយក្រែន។
លោកបានថ្លែងនៅក្នុងទីក្រុងបែរឡាំង (Berlin) កាលពីថ្ងៃច័ន្ទមុនពេលធ្វើដំណើរទៅកាន់ប្រទេសអេស្តូនី (Estonia) ដើម្បីចូលរួមកិច្ចប្រជុំជាមួយរដ្ឋមន្រ្តីការពារប្រទេសអេស្តូនី ប្រទេសឡេតូនី (Latvia) និង ប្រទេសលីទុយអានី (Lithuania) ដែលត្រូវបានគេបង្ខំឲ្យចូលក្នុងសហភាពសូវៀតកាលពីពេលមុន។
លោករដ្ឋមន្រ្តីការពារប្រទេស Carter បានមានប្រសាសន៍ថា សហរដ្ឋអាមេរិកនឹងរួមវិភាគទានកងទ័ពប្រតិបត្តិការពិសេស ការស៊ើបការណ៍សម្ងាត់ និងឧបករណ៍យោធាដល់កងទ័ពប្រតិកម្មរហ័សថ្មីរបស់អង្គការអូតង់ មួយផ្នែកដើម្បីជួយអឺរ៉ុបតទល់នឹងការឈ្លានពានណាមួយរបស់រុស្ស៊ី។
លោកមានប្រសាសន៍បន្តទៀតថា យើងគ្មានបំណងចង់វិលត្រឡប់ទៅកាន់សង្គ្រាមត្រជាក់ ឬជម្លោះថ្មីជាមួយរុស្ស៊ីទៀតទេ ហើយថា ការដាក់ទណ្ឌកម្មសេដ្ឋកិច្ចប្រឆាំងប្រទេសរុស្ស៊ីមានបំណងធ្វើឲ្យប៉ះពាល់សេដ្ឋកិច្ចកាន់តែខ្លាំងលើរដ្ឋាភិបាលទីក្រុងម៉ូស្គូ។
លោក Carter នឹងជួបជាមួយរដ្ឋមន្រ្តីការពារប្រទេសរបស់អង្គការអូតង់នៅថ្ងៃពុធ និងថ្ងៃព្រហស្បតិ៍ខាងមុខនេះនៅក្នុងទីក្រុងព្រុចសែល (Brussels) ដើម្បីពិភាក្សាផែនការនានាពាក់ព័ន្ធនឹងរុស្ស៊ី បន្ទាប់ពីការយកឧបទ្វីប Crimea នៃប្រទេសអ៊ុយក្រែនធ្វើជាឧបសម្ព័ន្ធរបស់ខ្លួនហើយនិងការគាំទ្រខាងយោធាដល់ពួកទាមទារបំបែករដ្ឋនៅក្នុងប្រទេសអ៊ុយក្រែន៕
