ប្រែសម្រួលដោយ ឌី ខាំបូលី
គោលនយោបាយការបរទេស នៅក្នុងរដ្ឋបាលអាណត្តិទីមួយរបស់លោកប្រធានាធិបតី បារ៉ាក់ អូបាម៉ា ត្រូវបានគ្របដណ្តប់ដោយអ្វីដែលគេហៅថា«ការតម្រង់ទិសឡើងវិញ» ដែលជាគោលនយោបាយមួយ ដែលមានបំណងធ្វើឱ្យប្រសើរឡើងនូវទំនាក់ទំនងរវាងរដ្ឋាភិបាលទីក្រុង វ៉ាស៊ីនតោន និងទីក្រុងម៉ូស្គូ (Moscow) ដែលបានធ្លាក់ចុះដល់ចំណុចទាបនៅក្នុងអំឡុងពេលពីរបីឆ្នាំចុងក្រោយនៃរដ្ឋបាលរបស់លោកប្រធានាធិបតី ហ្សក ដាប់ប៊ែលយ៉ូ ប៊ូស (George W. Bush)។
គោលនយោបាយ «ការតម្រង់ទិសឡើងវិញ» ពិតជានាំមកនូវលទ្ធផលរឹងមាំមានដូចជាសន្ធិសញ្ញាគ្រប់គ្រងអាវុធយុទ្ធសាស្រ្តចម្បងមួយ ដើម្បីកាត់បន្ថយចំនួននៃអាវុធនុយក្លេអ៊ែររយៈពេលវែងរបស់ភាគីទាំងពីរ។ ទីក្រុងម៉ូស្គូ ក៏អនុញ្ញាតឱ្យកងកម្លាំងសហរដ្ឋអាមេរិក ឆ្លងកាត់តាមប្រទេសរុស្សី ក្នុងការធ្វើដំណើរចេញចូលប្រទេសអាហ្គានីស្ថាន (Afghanistan)។ រុស្សីក៏បានបោះឆ្នោតនៅឯអង្គការសហប្រជាជាតិ ដើម្បីដាក់ទណ្ឌកម្មតឹងរឹងជាងមុនទៅលើរដ្ឋាភិបាលទីក្រុងតេហ៍រ៉ង់(Tehran) ជុំវិញការចោទប្រកាន់អំពីកម្មវិធីអាវុធនុយក្លេអ៊ែររបស់ប្រទេសនេះ។
ប៉ុន្តែ ក្រុមអ្នកវិភាគនិយាយថា ទំនាក់ទំនងរវាងប្រទេសទាំងពីរកំពុងធ្លាក់ចុះដុនដាបសារជាថ្មីម្តងទៀត។
លោក ស្ទីហ្វិន ចូនស៍ (Stephen Jones) ដែលជាអ្នកជំនាញស្តីពីប្រទេសរុស្សី នៃមហាវិទ្យាល័យ ម៉ោនត៍ ហូលីយ៉ូក (Mount Holyoke College) ក្នុងរដ្ឋម៉ាសាជូសេត (Massachusetts) និយាយយ៉ាងដូច្នេះថា។
«វាច្បាស់ណាស់ដែលថា ទំនាក់ទំនងស្ថិតនៅក្នុងស្ថានភាពមិនល្អនាពេលឥឡូវនេះ ហើយខ្ញុំគិតថា វាច្បាស់ណាស់ថា នេះជាអ្វីមួយ ដែលទាក់ទងនឹងការឡើងកាន់ដំណែងរបស់លោក ពូទីន (Putin) ជាប្រធានាធិបតី សម្រាប់អណត្តិទីបី។»
លោក វ្លាឌីមៀ ពូទីន (Vladimir Putin) ត្រូវបានបោះឆ្នោតជ្រើសរើសជាប្រធានាធិបតី កាលពីខែឧសភាឆ្នាំមុន ជំនួសលោកឌីមីទ្រី មេដវីដេហ្វ (Dmitri Medvedev) ដែលមិនបានចូលរួមប្រកួតប្រជែងក្នុងការបោះឆ្នោត។ បច្ចុប្បន្ននេះ លោក មេដវីដេហ្វ គឺជានាយករដ្ឋមន្រ្តីនៃប្រទេសរុស្សី។
លោក រ៉ាឈែល ឌែនប័រ (Rachel Denber) នៃអង្គការ«ឃ្លាំមើលសិទ្ធិមនុស្ស» និយាយថា លោក ពូទីន បានធ្វើការវាយបង្រ្កាបខាងនយោបាយដ៏អាក្រក់បំផុត ចាប់តាំងពីសម័យសហភាពសូវៀត មកម្ល៉េះ។
«នៅក្នុងរយៈពេល២១ឆ្នាំរបស់ខ្ញុំចំពោះការត្រួតពិនិត្យមើលស្ថានភាពសិទ្ធិមនុស្សនៅរុស្សី ខ្ញុំមិនដែលឃើញការវាយបង្ក្រាបរួមគ្នាខ្លាំងក្លា ទៅលើសង្គមស៊ីវិលទាំងមូលបែបនេះទេ។»
សភារុស្សី ដែលគ្រប់គ្រងដោយគណបក្សនយោបាយដែលគាំទ្រលោក ពូទីន គឺគណបក្ស រួបរួមរុស្សី (United Russia) បានអនុម័តច្បាប់ជាច្រើន ដែលបានដាក់កម្រិតលើសិទ្ធិមនុស្ស។ លោក ឌែនប័រ និយាយថា ច្បាប់ទាំងនេះរួមមាន ការដាក់កម្រិតទៅលើការធ្វើបាតុកម្ម ការពង្រីកនិយមន័យនៃពាក្យក្បត់ជាតិ ការបង្កើនការរឹតបន្តឹងទៅលើខ្លឹមសារអត្ថបទនៅក្នុងប្រព័ន្ធអ៊ីនធឺណិត និងច្បាប់ដែលរឹតបន្តឹងការគ្រប់គ្រងទៅលើអង្គការក្រៅរដ្ឋាភិបាល។
រដ្ឋាភិបាលរុស្សី ក៏បានបណ្តេញទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (US Agency for International Development) ដែលជាអង្គការមួយ ដែលបានជួយផ្តល់មូលនិធិដល់អង្គការសង្គមស៊ីវិលរបស់រុស្សីល្បីៗមួយចំនួន ដូចជាអង្គការ ហ្គូឡូស (Golos) ដែលជាអង្គការរាប់សន្លឹកឆ្នោតឯករាជ្យតែមួយគត់ក្នុងទីក្រុងម៉ូស្គូ និងអង្គការមេមូរៀល (Memorial) ដែលអង្គការសិទ្ធិមនុស្សនាំមុខគេមួយរបស់ប្រទេសនេះ។
នៅសហរដ្ឋអាមេរិក រដ្ឋសភាបានអនុម័តច្បាប់មួយ ដែលគេហៅថា «ច្បាប់ម៉ាហ្គនីតស្គី» ដែលយកឈ្មោះតាមលោក ស័រហ្គី ម៉ាហ្គនីតស្គី (Sergei Magnitsky) ដែលជាមេធាវីមួយរូប ដែលបានស្លាប់នៅក្នុងពន្ធនាគារកាលពីឆ្នាំ២០០៩ បន្ទាប់ត្រូវទទួលរងទារុណកម្មតាមការអះអាងសម្រាប់ការបកអាក្រាតអំពីការលួចបន្លំពន្ធយ៉ាងធំបំផុតមួយ នៅក្នុងប្រវត្តិសាស្រ្តរបស់រុស្សី។ បញ្ញាត្តិរបស់រដ្ឋសភា បានដាក់ការរឹត បន្តឹងទៅលើសកម្មភាពហិរញ្ញវត្ថុ និងបដិសេធមិនផ្តល់ទិដ្ឋាការសហរដ្ឋអាមេរិកឱ្យជនជាតិរុស្សីណា ដែលមានជាប់ពាក់ព័ន្ធនៅក្នុងការរំលោភសិទ្ធិមនុស្ស៕
