ភ្ជាប់​ទៅ​គេហទំព័រ​ទាក់ទង

ស.រ.អា.​ស្វាគមន៍​ការ​លើកលែង​ទោស​លោក​សម រង្ស៊ី

  • សុខ ខេមរា

លោកស្រី​ជែន សាគី​ (Jen Psaki)​ អ្នកនាំពាក្យ​ក្រសួង​ការ​បរទេស​ស.រ.អា.​ថ្លែង​ក្នុង​សន្និសីទ​ព័ត៌មាន​នៅ​ក្រសួង​ការបរទេស។​​
ស.រ.អា.​បាន​ស្វាគមន៍​ចំពោះការ​លើកលែង​ទោស​ដល់​លោក​សម រង្ស៉ី​ ដើម្បី​ឲ្យលោក​បាន​វិលត្រឡប់​ទៅ​កម្ពុជា​វិញ​ តែនៅ​តែ​ទទូច​ថា​ ការ​ប្រកួត​ប្រជែង​ក្នុងការបោះឆ្នោត​ចាំបាច់​ត្រូវមាន​ការ​ចូលរួម​ពីលោក​សម រង្ស៉ី​ មេដឹកនាំ​ក្រុម​ជំទាស់។​

លោក ​សម​ រង្ស៉ី​បាន​សម្រេច​ចិត្ត​នៅ​សប្តាហ៍​នេះ​ចូលទៅ​ប្រទេស​កម្ពុជា​ បើទោះ​ ជា​ត្រូវគេ​ចាប់ដាក់​គុក​១១ឆ្នាំ​ពីបទ​ទាក់ទង​នឹង​បញ្ហា​ព្រំដែន​ក្តី​ ក្រោយពី​លោក និទេរទេស​ខ្លួនអស់​រយៈពេល​ជាង​បីឆ្នាំ។​ តែក្រោយ​មក​ ការ​សម្រប​សម្រួល​នយោបាយ​ចុងក្រោយ​មួយ​បាន​កើតឡើង​ឈាន​ដល់ការ​លើកលែង​ទោស​លោកនៅ​ក្រោម​អ្វីមួយ​ដែល​ភាគី​ជម្លោះ​ផ្នែក​នយោបាយ​ទាំង​ពីរ​គឺ​លោក​សម រង្ស៉ី​នៃ​គណបក្ស​ជំទាស់ ​និង​លោក​នាយក​រដ្ឋមន្ត្រី ​ហ៊ុន សែន​នៃ​គណបក្ស​គ្រប់គ្រង​ប្រទេស ​បាន​ពន្យល់​ស្រដៀងគ្នា​ថា​ ជា​ការ​បង្រួប​បង្រួម​ជាតិ​ឲ្យ​មាន​ការ​បោះ​ឆ្នោត​មួយ​ប្រកប​ដោយ​សេរី ​ពហុបក្ស​តាម​បែប​ប្រជាធិបតេយ្យ។​

ទោះជា​យ៉ាងណា​ក៏ដោយ ​កាលពី​ថ្ងៃសុក្រ​នេះ​ក្រសួង​ការបរទេស​ស.រ.អា.​បាន ស្វាគមន៍​ចំពោះ​ការ​វិល​ត្រឡប់​របស់​លោក​សម ​រង្ស៊ី​ទៅកម្ពុជា ​តែចង់​ឃើញ​លោក​សម រង្ស៉ី​បាន​ចូលរួម​ប្រកួត​ប្រជែង​ក្នុង​ការ​បោះឆ្នោត។​

លោកស្រី​ជែន សាគី​ (Jen Psaki)​ អ្នកនាំពាក្យ​ក្រសួង​ការ​បរទេស​ស.រ.អា.​បានថ្លែង​ប្រាប់​អ្នក​យក​ព័ត៌មាន​ក្នុង​រដ្ឋ​ធានី​វ៉ាស៊ីន​តោន​ថា៖​ «យើងសុំ​ស្វាគមន៍​ការ​សម្រេច​ចិត្ត​ទទួល​យក​សំណើ​របស់​លោក​នាយក​រដ្ឋមន្ត្រី​ហ៊ុន សែនសុំឲ្យ​មាន​ការ​លើកលែង​ទោស​ពី​ព្រះ​មហាក្សត្រ​ដល់​មេដឹក​នាំ​គណបក្ស​ជំទាស់​គឺលោក​ សម រង្ស៉ី ​ដើម្បី​ឲ្យ​លោក​បាន​វិល​ទៅកាន់​ប្រទេស​កម្ពុជា​ដោយ​គ្មានការ​ចាប់ដាក់​គុក។​ យើង​អំពាវនាវ​ដល់​រដ្ឋាភិបាល​ប្រទេស​កម្ពុជា​សម្រប​សម្រួល​ឲ្យមាន​បរិយាកាស​ប្រកប​ដោយ​សុវត្ថិភាព​ដើម្បី​ការ​វិល​ត្រឡប់​របស់​លោក​សម រង្ស៉ី ​ហើយ​អនុញ្ញាត​ឲ្យ​លោក​ចូលរួម​ក្នុង​ការ​បោះឆ្នោត​ដ៏​មាន​សារៈ​សំខាន់​និង​ដោយ​គ្មាន​ការ​រិតត្បិត»។​

លោកស្រី​ទទូច​ចង់ឲ្យ​រដ្ឋាភិបាល​កម្ពុជា​ធ្វើតាម​សំណើ​១៨​ចំណុច​របស់​អ្នក​រាយ ការណ៍​ពិសេស​អ.ស.ប.​ផ្នែក​សិទ្ធិ​មនុស្សគឺលោក​សូរីយា ​ស៊ូប៊ែឌី​ កាលពី​ឆ្នាំ​ទៅ​ទាក់ទង​នឹង​ការ​កែទម្រង់ប្រព័ន្ធ​បោះឆ្នោត។​
បញ្ហា​ចូល​ក្នុង​ប្រទេស​របស់​លោក ​សម រង្ស៉ី​ដោយ​គ្មាន​ការ​ចាប់ខ្លួន​នោះ​ត្រូវបាន​ ដោះស្រាយជា​ជំហ៊ាន​ដំបូង​ដោយ​ការ​លើកលែង​ទោស​ពី​ព្រះ​មហាក្សត្រ ​ហើយ តែ​សំណួរ​ដែល​ក្រុម​អ្នក​វិភាគ​កំពុង​ចោទ​សួរ​គឺ​ ថា​តើ​លោក​សម រង្ស៉ី​ ដែលគណ បក្ស​សង្រ្គោះជាតិ​របស់​លោក​ដាក់​ឲ្យ​ឈរឈ្មោះ​ជា​បេក្ខជន​នាយក​រដ្ឋមន្ត្រី​ដើម្បី ត​ទល់​ជាមួយ​នឹង​លោក​នាយក​រដ្ឋមន្ត្រី​ហ៊ុន សែន​នោះ​អាច​ឈរឈ្មោះ​បាន​ទេ?​

លោក ​គល់ បញ្ញា ​នាយក​អង្គការ​ឃ្លាំមើល​ការបោះឆ្នោត​ឈ្មោះ​ថា​ ខុមហ្វ្រែល​ បាន​អះអាង​ថា ការ​វិលត្រឡប់​របស់​លោក​សម រង្ស៉ី​គ្រាន់តែ​អាច​ធ្វើ​ឲ្យ​ស្ថាន​កាណ៍​មាន​លក្ខណៈប្រសើរខ្លះ​ តែមិនអាច​ធ្វើឲ្យ​ការ​បោះឆ្នោត​មាន​លក្ខណ​យុត្តិធម៌​ទេ ​បើ​លោក​សម រង្ស៉ី​មិនបាន​ចូលរួម​ប្រកួត​ដោយ​ផ្ទាល់។​

លោក​និយាយ​ថា៖​«មាន​បញ្ហា​មួយ​ត្រង់​ថា ​មេដឹកនាំ​គណបក្ស​ប្រឆាំង​ហ្នឹង​គាត់​មិនមែន​ជាអ្នក​ប្រកួត ​បានន័យ​ថា ​គាត់​មិនមែន​ជា​បេក្ខជន​ប្រកួត។​ នេះជា​ចំណុច​ខ្វះខាត​មួយ​ធំ​ដែរ ​នៅក្នុង​ការ​ប្រកួត​ប្រជែង​ការ​បោះឆ្នោត​នេះ។​ គ្រាន់តែ​ថា​ គាត់​បាន​មក​ចូលរួម​គាំទ្រ​គណបក្ស​គាត់​ក្នុង​ការងារ​ឃោសនា​ ក្នុង​ការងារ​លើក​ទឹក​ចិត្ត​ឲ្យអ្នក​បោះឆ្នោត​ មក​គាំទ្រ​គាត់​ តែគាត់​មិនជា​តួប្រកួតដើម្បី​ឲ្យបាន​តំណែង​ ឬ​អាសនៈ​ជា​នាយក​រដ្ឋមន្ត្រី ​ឬ​ក៏ជា​សមាជិក​អ្នក​តំណាង​រាស្ត្រ»។​

លោក​សម រង្ស៉ី​អាច​ចូលរួម​ការ​បោះឆ្នោត​បាន ​ប្រសិន​បើ​មាន​ការ​សម្រេច​ចិត្ត ខាង​នយោបាយ​បន្ត​ទៀត​ ព្រោះ​ការ​បោះឆ្នោត​ជា​រឿង​នយោបាយ។​ លោក​បាន លើក​យក​ឧទារហណ៍​នៅ​ក្នុង​ប្រទេស​ភូមា​មក​បញ្ជាក់។​ សហគមន៍​អន្តរជាតិ​ដែល​កំពុង​ផ្តោត​ការ​យកចិត្ត​ទុកដាក់​ពី​នយោបាយ​កម្ពុជា​នេះ​នឹង​មើល​ឃើញ​ការ​សម្រេច​ចិត្ត​របស់​កម្ពុជា​មុន​ប្រទេស​ភូមា​ចំពោះ​ការ​អនុញ្ញាត​ឲ្យ​មេដឹកនាំ​ជំទាស់បាន​ចូលរួម​ឬ​មិន​បាន។​

លោក​បណ្ឌិត​ពុទ្ធា ហង្ស ​នាយក​អង្គការ​ឃ្លាំមើល​ការ​បោះឆ្នោត​និចហ្វិច​ បាន អះអាង​ថា​ ការ​លើកលែង​ទោស​ដល់​លោក​ សម រង្ស៉ី​ជា​ការ​វិវត្តន៍​មួយ​ល្អ។​

លោក​និយាយថា៖ ​«ជាការណ៍​ពិត​បរិបទ​នយោបាយ​នៅ​កម្ពុជា​ ការ​ចរចា​ខាង​នយោបាយ​គឺ​ជា​ការ​ផ្តល់​កិត្តិយស​ដល់ភាគី​ទាំង​សង​ខាង។​ នេះយើង​មិន​និយាយ​ដល់​សម្ពាធ​ទេ។​ យើង​និយាយ​ថា​ ការ​ចរចា​ខាង​នយោបាយ​បាន​ទម្លាយ​ភាព​តាន​តឹង​រវាង​គណបក្ស​ជំទាស់​ហើយនឹង​គណបក្ស​កាន់​អំណាច»។​

លោក​ពុទ្ធា ហង្ស​អះអាង​ថា​ សហគមន៍​អន្តរជាតិ​និង​ប្រជា​ពលរដ្ឋ​អាច​ធូរស្រាល​ ចំពោះ​ការ​លើកលែង​ទោស​ដល់​លោក​សម រង្ស៉ី​ ជាជំហាន​សំខាន់​ដំបូង។

លោក​បន្តថា៖​ «ហើយ​ខ្ញុំគិតថា​ ប្រហែល​ជា​ឈាន​ទៅដល់​ការ​ដោះស្រាយ​ឲ្យ​មាន​ឈ្មោះ​លោក​សម រង្ស៉ី​នៅក្នុង​បញ្ជី​ឈ្មោះ​អ្នកបោះឆ្នោត​និង​ឈ្មោះ​ជា​បេក្ខជន​នាយក​រដ្ឋមន្ត្រី»។​

លោក​សុខ ទូច ​សាកល​វិទ្យាធិការ​នៃ​សាកល​វិទ្យាល័យ​មួយ​បាន​អះអាង​ថា​ លោក​រំភើប​ចំពោះ​ការ​លើក​លែង​ទោស​ដល់​លោក​សម រង្ស៉ីដែល​ចេញពី​ការ​សម្រុះ​សម្រួល​នយោបាយ។​ លោក​អះអាង​ថា ​ដំណោះ​ស្រាយ​នយោបាយ​ដែល​ភាគី​ទាំងពីរ​បាន​សុខចិត្ត​សម្រប​សម្រួល​និង​ទទួល​យក​ការ​លើកលែង​ទោស​ដោយ​ឈរ​លើការ​បង្រួប​បង្រួមជាតិ​ ដោយសន្តិវិធីនេះ​ ​នឹងនាំ​ឲ្យ​ខ្មែរ​មាន​កិត្តិស័ព្ទ​ហើយ​វា​ជា​ដំណោះ​ស្រាយ​ឈ្នះ​ទាំងអស់​គ្នា​គឺ​ទាំង​ប្រជាជន​និង​ប្រជាជាតិ​ខ្មែរ។​ លោក​បន្ថែម​ថា ​អ្នក​នយោបាយ​មាន​ភាព​ចាស់ទុំ​ផ្នែក​នយោបាយ​ក្នុងការ​រក​ដំណោះ​ស្រាយ​ដោយ​សន្តិវិធី​ មិនប្រើ​អំពើ​ហិង្សា។ ​តែ​លោក​ថា ​នៅមាន​បញ្ហា​មួយ​ចុង​ក្រោយ​ទៀត​ទាក់ទង​នឹងការ​ចូលរួម​របស់​លោក​សម រង្ស៉ី​ក្នុង​ការ​ប្រកួត​ប្រជែង​ក្នុងការ​បោះឆ្នោត​ ថា​តើ​គ.ជ.ប.​នឹង​សើរើ​ច្បាប់​បាន​ឬ​យ៉ាង​ណា។​

លោក​និយាយថា៖​ «ខ្ញុំជឿ​ជាក់ថា​ បើដំណាក់​កាលនោះ​នឹង​ដោះស្រាយ​បាន​ទៀត​ យើង​ជឿ​ជាក់​ថា​ ភាព​ជោគជ័យ​នៃ​អ្នក​នយោបាយ​ ហើយ​ក្រោយ​ពីការ​បោះ​ឆ្នោត​ទៅ​ ពិភព​លោក​នឹង​ទទួល​ស្គាល់​អ្វីទៅ​ដែល​ហៅ​ថា​ លទ្ធិ​ប្រជាធិតេយ្យ​ដែល​កម្ពុជា​ចេះ​រក​ដំណោះ​ស្រាយ​ដោយ​ខ្មែរ​គ្នា​ឯង»។​

ទោះជា​យ៉ាងណា​ក៏ដោយ​ លោក ​ទេព នីថា ​អគ្គលេខា​ធិការ​គណៈ​កម្មាធិការ​ជាតិ​រៀបចំ​ការ​បោះឆ្នោត​ បាន​អះអាង​ថា​ នីតិវិធី​បច្ចុប្បន្ន​នៃ​ការ​ចុះឈ្មោះ​បោះ​ឆ្នោត​និង​ការ​ចុះ​បញ្ជី​បេក្ខជន​ត្រូវ​ចប់​ហើយ។​

លោក​និយាយថា៖​ «អញ្ចឹងទេ​តាមច្បាប់​ដែលមាន​ជា​ធរមាន​គឺគាត់​មិនអាច​បោះឆ្នោត​បាន​ ហើយ​មិនអាច​ឈរ​ឈ្មោះ​ជាបេក្ខជន​បាន​ទេ»។​

ការ​ប្រែប្រួល​យ៉ាងណា​ទៅមុខ​ទៀត​មិនមែន​ជា​សមត្ថកិច្ច​របស់​គ.ជ.ប.​ទេ។​ មេដឹក​នាំ​នយោបាយ​នានា​នឹង​បន្ត​ពិភាក្សា​គ្នាទៀត​ ក្រោយ​ពេល​លោក​សម រង្ស៉ី​ចូល​មក​ដល់​កម្ពុជា​នៅថ្ងៃ​ទី១៩ ​ខែកក្កដា​ឆ្នាំ​២១០៣។​ គណបក្ស​នយោបាយ​ចំនួន​៨​បាន​ចូលរួម​ប្រកួត​ប្រជែង​ក្នុង​ការ​បោះឆ្នោត​ ថ្ងៃ​ទី​២៨​ ខែ​កក្កដា​ឆ្នាំ​២០១៣។​ ពលរដ្ឋ​ខ្មែរជាង​៩លាន​នាក់​មាន​សិទ្ធិ​បោះឆ្នោត​ដើម្បី​ជ្រើស​អ្នក​តំណាង​រាស្ត្រ​ក្នុង​នីតិកាល​ទី៥ ​ហើយ​នឹង​បង្កើត​រដ្ឋាភិបាល​ថ្មីមួយ​ក្រោយ​លទ្ធផល​ការ​បោះឆ្នោត៕​

អត្ថបទ​ទាក់ទង

XS
SM
MD
LG