រដ្ឋាភិបាលក្រុងវ៉ាស៊ីនតោន បានព្រមានរដ្ឋាភិបាលក្រុងមូស្គូអំពីអ្វីដែលអ្នកសង្កេតការណ៍ខ្លះ ពណ៌នាថា ជាឧក្រិដ្ឋកម្មសង្គ្រាមដោយកងទ័ពរុស្ស៊ីនៅក្នុងប្រទេសអ៊ុយក្រែន។
ពួកមន្ត្រីសហរដ្ឋអាមេរិក បាននិយាយកាលពីថ្ងៃព្រហស្បតិ៍ថា រុស្ស៊ី កំពុង«ងាកទៅយុទ្ធសាស្ត្រកម្ទេចទីប្រជុំជនពលរដ្ឋ»ក្នុងប្រទេសអ៊ុយក្រែន នៅពេលដែលការចរចាកម្រិតខ្ពស់មួយរវាងភាគីច្បាំងគ្នានានាមិនមានការជឿនលឿនទៅមុខ។
អ្នកនាំពាក្យក្រសួងការបរទេសសហរដ្ឋអាមេរិកលោក Ned Price បាននិយាយថា៖ «យើង បានឃើញសេចក្តីរាយការណ៍ដែលអាចគួរឲ្យទុកចិត្តបានបំផុតពីការវាយប្រហារដោយចេតនាលើជនស៊ីវិល ដែលស្ថិតនៅក្រោមអនុសញ្ញាទីក្រុងហ្សឺណែវស្តីពីឧក្រិដ្ឋកម្មសង្គ្រាម»។ ទោះជាយ៉ាងណាក៏ដោយ លោកមិនបានចោទប្រកាន់រុស្ស៊ីចំៗពីការប្រព្រឹត្តឧក្រិដ្ឋកម្មបែបនេះ ទេ។
លោក Price បាននិយាយពីការឈ្លានពានរយៈពេល២សប្តាហ៍ថា៖ «ផែនការរបស់ប្រធានាធិបតីរុស្ស៊ីលោក Vladimir Putin ដណ្តើមកាន់កាប់យកអ៊ុយក្រែនឲ្យបានឆាប់រហ័ស ឥឡូវនេះ បានបញ្ជាក់យ៉ាងច្បាស់ថា ផែនការនេះ បានបរាជ័យ។ ដូច្នេះ លោក Putin ឥឡូវនេះ កំពុងងាកទៅរកយុទ្ធសាស្ត្រកម្ទេចទីប្រជុំជនពលរដ្ឋដើម្បីព្យាយាមបំបែកឆន្ទៈរបស់ពលរដ្ឋអ៊ុយក្រែន ដែលជារឿងលោក ពូទីនមិនអាចធ្វើបាន»។
រុស្ស៊ី បានច្រានចោលពីការដៅការវាយប្រហារលើពលរដ្ឋស៊ីវិលនៅក្នុងការឈ្លានពានរបស់ខ្លួនលើប្រទេសអ៊ុយក្រែន។
អនុប្រធានាធិបតីសហរដ្ឋអាមេរិកលោកស្រី Kamala Harris បានថ្លែងនៅក្នុងប្រទេសប៉ូឡូញថា លោកស្រី គាំទ្រការស៊ើបអង្កេតរបស់អង្គការសហប្រជាជាតិនៅក្នុងការឈ្លានពានរបស់រុស្ស៊ីលើប្រទេសអ៊ុយក្រែនដែលនឹងពិនិត្យមើល«ការចោទប្រកាន់ពីការរំលោភសិទ្ធិមនុស្សនិងការរំលោភបំពាននានា ហើយនិងឧក្រិដ្ឋកម្មពាក់ព័ន្ធផ្សេងទៀត»។
លោកស្រី Harris បានថ្លែងមុនជំនួបនៅក្នុងរដ្ឋធានីវ៉ាសូវីជាមួយប្រធានាធិបតីប៉ូឡូញលោក Andrzej Duda នៅក្នុងការបង្ហាញការគាំទ្ររបស់សហរដ្ឋអាមេរិកដល់សម្ពន្ធមិត្តរបស់អង្គការអូតង់នៅក្នុងតំបន់អឺរ៉ុបខាងកើត។
លោកស្រីអនុប្រធានាធិបតីសហរដ្ឋអាមេរិក មានប្រសាសន៍ទៀតថា៖ «ជាការពិត ត្រូវតែមានការស៊ើបអង្កេត ហើយយើងទាំងអស់គ្នា ត្រូវតែមើលអំពីបញ្ហានេះ»៕
