សហរដ្ឋអាមេរិកបានព្រមាននៅថ្ងៃអង្គារនេះថា ប្រទេសរុស្ស៊ី «កំពុងបង្កើនកិច្ចប្រឹងប្រែងដើម្បីបើកការវាយប្រហារលើហេដ្ឋារចនាសម្ព័ន្ធស៊ីវិលនិងអាគាររដ្ឋាភិបាលរបស់ប្រទេសអ៊ុយក្រែននៅក្នុងពេលប៉ុន្មានថ្ងៃខាងមុខ»។
ស្ថានទូតសហរដ្ឋអាមេរិកប្រចាំរដ្ឋធានីកៀវ ប្រទេសអ៊ុយក្រែន បានប្រកាសដូច្នេះ បន្ទាប់ពីប្រធានាធិបតីអ៊ុយក្រែនលោក Volodymyr Zelenskyy បានធ្វើការព្រមានស្រដៀងគ្នានេះថា រុស្ស៊ីអាចធ្វើសកម្មភាពប្រឆាំងនឹងអ៊ុយក្រែននៅចំទិវាឯករាជ្យរបស់អ៊ុយក្រែននៅថ្ងៃពុធស្អែក។
ស្ថានទូតសហរដ្ឋអាមេរិកបានលើកឡើងដូច្នេះថា៖ «ការវាយប្រហាររបស់រុស្ស៊ីនៅអ៊ុយក្រែនបង្កការគំរាមកំហែងជាបន្តលើជនស៊ីវិលនិងហេដ្ឋារចនាសម្ព័ន្ធស៊ីវិល»។ ស្ថានទូតនេះបានបន្ថែមថា ពលរដ្ឋអាមេរិកាំងគួរតែចាកចេញពីអ៊ុយក្រែនប្រសិនបើអាច។
ថ្ងៃពុធស្អែកគឺជាទិវាឯករាជ្យលើកទី ៣១ របស់ប្រទេសអ៊ុយក្រែន បន្ទាប់ពីអ៊ុយក្រែនទទួលបានឯករាជ្យពីការដឹកនាំរបស់សហភាពសូវៀត ក៏ដូចជាខួប ៦ ខែតាំងពីពេលដែលរុស្ស៊ីបានធ្វើសង្គ្រាមប្រឆាំងនឹងអ៊ុយក្រែនមក។
នៅចំពេលដែលមានការព្រមាននេះ រដ្ឋាភិបាលអ៊ុយក្រែនបានលុបចោលនូវការប្រារព្ធទិវាឯករាជ្យនេះជាសាធារណៈ៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated Press ទីភ្នាក់ងារព័ត៌មាន AFP និងទីភ្នាក់ងារព័ត៌មាន Reuters។
