ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

សហរដ្ឋ​អាមេរិក​នៅតែ​ចង់​ធ្វើ​ជា​ជម្រើស​ដៃគូ​សម្រាប់​តំបន់​អាមេរិក​ខាង​ត្បូង


លោក James Mattis រដ្ឋមន្ត្រី​ការពារ​ជាតិ​អាមេរិក​ថ្លែង​នៅ​ក្នុង​សន្និសីទ​កាសែត​មួយ​នៅ​ក្រសួង​ការពារ​ជាតិ​ក្នុង​ក្រុង​អូស្លូ ប្រទេស​ន័រវែស កាលពី​ថ្ងៃទី១៤ ខែកក្កដា ឆ្នាំ២០១៨។

មន្ត្រី​ជាន់​ខ្ពស់​សហរដ្ឋ​អាមេរិក​នានា​បាន​ធ្វើ​ទស្សនកិច្ច​ទៅ​កាន់​តំបន់​អាមេរិក​ខាង​ត្បូង​នៅ​ក្នុង​រយៈពេល​ប៉ុន្មាន​សប្ដាហ៍​ថ្មីៗ​នេះ ដើម្បី​បង្ហាញ​ពី​កម្លាំង​នៃ​សម្ព័ន្ធ​ភាព​រវាង​បណ្ដា​ប្រទេស​នានា​នៅ​ទ្វីប​អាមេរិក ស្រប​ពេល​ដែល​គូ​ប្រជែង​នានា​របស់​សហរដ្ឋ​អាមេរិក​បាន​បង្កើន​ចំណាប់​អារម្មណ៍​របស់​ពួកគេ​នៅ​ក្នុង​តំបន់។

រដ្ឋមន្ត្រី​ការពារ​ប្រទេស​អាមេរិក​លោក Jim Mattis បាន​ប្រាប់​អ្នក​សារព័ត៌មាន​នៅ​ពេល​លោក​ធ្វើ​ដំណើរ​ទៅ​កាន់​ប្រទេស​ប្រេស៊ីល​កាល​ពី​ថ្ងៃ​អាទិត្យ​ម្សិលមិញ​ថា ការ​ប្រឡូក​ខ្លួន​របស់​ប្រទេស​រុស្ស៊ី និង​ចិន​នៅ​ក្នុង​តំបន់​អាមេរិក​ខាង​ត្បូង «មិន​ជះ​ឥទ្ធិពល​ណា​មួយ» ដល់​ទំនាក់ទំនង​រវាង​យោធា និង​យោធា​របស់​សហរដ្ឋ​អាមេរិក​ជាមួយ​នឹង​បណ្ដា​ប្រទេស​ដៃគូ​នៅ​តំបន់​នោះ​ទេ។

លោក Mattis បាន​និយាយ​ថា សហរដ្ឋ​អាមេរិក​គាំទ្រ «ការ​សម្រេច​ដោយ​សិទ្ធិ​អំណាច​ផ្ទាល់​ខ្លួន​របស់​បណ្ដា​ប្រទេស​អធិបតេយ្យ​នានា» ហើយ​ស្រប​ពេល​នោះ​ដែរ បាន​រំឭក​ឲ្យ​មាន​ការ​ប្រយ័ត្នប្រយែង​ចំពោះ «ការ​ជ្រៀតជ្រែក​របស់​បណ្ដា​ប្រទេស​ផ្សេង​ទៀត» ដែល​អាច​បណ្ដាល​ឲ្យ​មាន​បញ្ហា​ខូចខាត​កើត​ឡើង។

លោក Mattis បាន​បញ្ជាក់​ថា៖ «មាន​វិធី​ជា​ច្រើន​ដែល​អាច​ធ្វើ​ឲ្យ​ប្រទេស​មួយ​បាត់បង់​អធិបតេយ្យភាព​របស់​ខ្លួន​បាន។ វិធី​មួយ​ក្នុង​ចំណោម​នោះ​គឺ​អាច​កើត​ឡើង​បាន​តាម​រយៈ​ការ​ផ្ដល់​ជំនួយ និង​កម្ចី​ដ៏​ធំ​របស់​ប្រទេស​មួយ​ដល់​ប្រទេស​មួយ»។ លោក Mattis ថ្លែង​ដូច្នេះ​ចង់​សំដៅ​ដល់​កម្ចី​ចិន​ដែល​ផ្ដល់​ឲ្យ​ប្រទេស​មួយ​ចំនួន​ដូចជា​វ៉េណេស៊ុយអេឡា និង​ហ្វីលីពីន​ជា​ដើម។

ឥទ្ធិពល​របស់​ចិន​នៅ​តំបន់​អាមេរិក​ឡាទីន​បាន​កើន​ឡើង​ពី «ទស្សនៈ​បែប​អាជីវកម្ម​ទ្រង់ទ្រាយ​ធំ» ទៅ​ជា «ការ​បំពេញ​តម្រូវការ​របស់​ប្រជាពលរដ្ឋ​ចិន​នៅ​ក្នុង​ប្រទេស​ចិន» ដែល​នេះ​ជា​អ្វី​ដែល​រដ្ឋាភិបាល​ក្រុង​ប៉េកាំង​ប្រើប្រាស់​ដើម្បី​ពង្រីក​កិច្ច​សហប្រតិបត្តិការ​សន្តិសុខ។ ចំណែក​ឯ​តួនាទី​របស់​រុស្ស៊ី​នៅ​ក្នុង​តំបន់​អាមេរិកឡាទីន​វិញ «គឺ​ប៉ះពាល់​ជា​ពិសេស​ដល់​ផល​ប្រយោជន៍​ផ្នែក​សន្តិសុខ​របស់​សហរដ្ឋ​អាមេរិក​តែ​ម្ដង»។ នេះ​បើ​តាម​ការ​បញ្ជាក់​របស់​លោក Jason Marczak ប្រធាន​មជ្ឈមណ្ឌល​អាមេរិកឡាទីន Adrienne Arsht នៃ​អង្គការ Atlantic Council៕

XS
SM
MD
LG