នៅថ្ងៃអង្គារនេះ ពលរដ្ឋអាមេរិកាំងចេញទៅបោះឆ្នោតពាក់កណ្ដាលអាណត្តិប្រធានាធិបតីដែលជាការបោះឆ្នោតមួយដែលអាចកំណត់អនាគតនយោបាយទាំងរបស់លោកប្រធានាធិបតី Joe Biden ផងនិងទាំងរបស់លោកអតីតប្រធានាធិបតី Donald Trump ផង។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
គណបក្សប្រជាធិបតេយ្យរបស់លោក Biden កំពុងប្រឈមនឹងការប្រឹងប្រែងយ៉ាងលំបាកដើម្បីធ្វើយ៉ាងណាឱ្យបាននៅបន្តគ្រប់គ្រងសភា ចំណែកឯគណបក្សសាធារណរដ្ឋរបស់លោក Trump វិញ បានធ្វើយុទ្ធនាការខ្លាំងក្លាលើបញ្ហាចម្បងៗនានាដូចជាបញ្ហាអតិផរណានិងបញ្ហាឧក្រិដ្ឋកម្មជាដើម។
លោក Trump ដែលបានផ្ដល់តម្រុយខ្លាំងក្លាថាលោកនឹងឈរឈ្មោះបោះឆ្នោតប្រធានាធិបតីនៅឆ្នាំ ២០២៤ ខាងមុខ បានបញ្ជាក់កាលពីថ្ងៃចន្ទថា លោកនឹងធ្វើការ «ប្រកាសដ៏ធំមួយ» នៅថ្ងៃទី១៥ ខែវិច្ឆិកាខាងមុខ រីឯលោក Biden វិញ បានធ្វើការអំពាវនាវលើកចុងក្រោយទៅកាន់ក្រុមអ្នកគាំទ្រគណបក្សប្រជាធិបតេយ្យឱ្យចេញទៅបោះឆ្នោតឱ្យបានច្រើន។
លោក Biden បានថ្លែងទៅកាន់ក្រុមអ្នកគាំទ្រនៅជិតរដ្ឋធានីវ៉ាស៊ីនតោនថា៖ «អំណាចគឺស្ថិតនៅក្នុងដៃរបស់អ្នក។ យើងដឹងយ៉ាងច្បាស់ថា លទ្ធិប្រជាធិបតេយ្យរបស់យើងកំពុងប្រឈមនឹងហានិភ័យ ហើយយើងដឹងថានេះគឺជាពេលដែលអ្នកអាចការពារវាបាន»។
ដោយការស្ទង់មតិបានបង្ហាញថា គណបក្សសាធារណរដ្ឋអាចនឹងដណ្ដើមគ្រប់គ្រងរដ្ឋសភាបាន គណបក្សដែលមានទំនោរស្ដាំនិយមជ្រុលនេះមានចំណាប់អារម្មណ៍នៅក្នុងការបង្កើតឧបសគ្គសម្រាប់រយៈពេលដែលនៅសេសសល់នៃអាណត្តិដឹកនាំរបស់លោក Biden តាមរយៈការស៊ើបអង្កេតខ្លាំងក្លានិងការប្រឆាំងចំពោះគម្រោងចំណាយរបស់លោក Biden។
លោក Biden បានប្រាប់អ្នកកាសែតកាលពីយប់ថ្ងៃចន្ទថា លោកជឿថា គណបក្សប្រជាធិបតេយ្យនឹងឈ្នះបានគ្រប់គ្រងព្រឹទ្ធសភា បើទោះបីជាលោកទទួលស្គាល់ថា «វាមានការពិបាក» នៅក្នុងការឈ្នះរក្សាបានការគ្រប់គ្រងរដ្ឋសភានិងថារយៈពេលដែលនៅសេសសល់នៃអាណត្តិទីមួយរបស់លោកនេះប្រហែលជាមាន «ការលំបាកជាងមុន» ក៏ដោយ៕
