ភ្ជាប់​ទៅ​គេហទំព័រ​ទាក់ទង

អត្រា​គ្មាន​ការងារ​ធ្វើ​បាន​ធ្លាក់​ដល់​កម្រិត​ទាប​បំផុត​ចាប់​តាំង​ពី​ឆ្នាំ២០០៨


អត្រា​គ្មាន​ការងារ​ធ្វើ​របស់​អាមេរិក ខែសីហា ឆ្នាំ២០១៥។

អត្រា​មនុស្ស​គ្មាន​ការងារ​ធ្វើ​ក្នុង​ស.រ.អា.​បាន​ចុះ​ថយ​ដល់​កម្រិត​ទាប​បំផុតក្នុង​រយៈពេល​៧ឆ្នាំ​កន្លះ​ក្នុង​ខែសីហា​ដោយ​មាន​ចំនួន​៥.១ភាគរយ។​

តួលេខ​នេះ​ជា​ការ​ចុះថយ​២ភាគ១០​នៃ​មួយ​ភាគរយ​ពី​តួលេខ​កាល​ពី​ខែ​មុន។​ របាយការណ៍​កាល​ពី​ថ្ងៃ​សុក្រ​នៃ​ក្រសួង​ការងារ​ស.រ.អា.​ក៏​បាន​និយាយ​ដែរ​ថា​ សេដ្ឋកិច្ច​បានបង្កើត​ការងារ​ថ្មី​ចំនួន​១៧៣.០០០​ដែល​ជា​ចំនួន​តិច​ជាង​ការ​ទស្សន៍ទាយ​របស់​ក្រុម​សេដ្ឋវិទូ​ភាគច្រើន។

សេចក្តីរាយការណ៍​នេះ​បាននិយាយ​ថា​ វិស័យ​ថែរក្សា​សុខភាព និង​ផ្នែក​សេវាកម្ម​ហិរញ្ញវត្ថុ​មាន​ការ​ងារ​ច្រើន​ជាង​មុន​ ចំណែក​ឯ​វិស័យ​រុករក​រ៉ែ និង​ផ្នែក​ផលិត​ប្រដាប់ប្រដា​ប្រើប្រាស់​បាន​បាត់​បង់​ការងារ។

របាយការណ៍​នេះ​ជា​ផ្នែក​សំខាន់​មួយ​នៃ​ទិន្នន័យ​ដែល​ក្រុម​មេដឹកនាំ​ធនាគារ​កណ្តាល​ស.រ.អា.​នឹង​ពិចារណា​ នៅ​ពេល​ពួកគេ​សម្រេច​ថា​តើ​នៅ​ពេល​ណា​នឹង​បង្កើន​អត្រា​ការ​ប្រាក់​ហើយ​និង​បង្កើន​ប៉ុន្មាន​ភាគរយ។ ​អត្រា​ការ​ប្រាក់​នេះ​មាន​កម្រិតទាប​បំផុត​ចាប់តាំង​ពី​ឆ្នាំ២០០៨​មក​នៅក្នុង​ការ​ខិតខំ​ប្រឹងប្រែង​មួយ​ដើម្បី បង្កើន​ការ​លូតលាស់​សេដ្ឋកិច្ច​នៅ​ក្រោយ​មាន​វិបត្តិ​ហិរញ្ញវត្ថុ។​

ធនាគារ​កណ្តាល​ស.រ.អា.​ខិតខំ​ព្យាយាម​ចាត់ចែង​សេដ្ឋកិច្ច​ដើម្បី​ឱ្យ​បាន​សម្រេច​

ការ​មាន​ការងារ​ធ្វើ​ពេញ​លេញ ​និង​ធ្វើ​ឱ្យ​តម្លៃ​ទំនិញ​មាន​ស្ថិរភាព​ផងដែរ។

គេ​អាច​ឃើញ​ថា​ការ​ចុះថយ​នៃ​អត្រា​មនុស្ស​គ្មាន​ការងារ​ធ្វើជា​ភស្តុតាង​ដែល​ថា​សេដ្ឋកិច្ច​កំពុង​ងើប​ឡើង ហើយ​លែង​ត្រូវ​ការ​ការ​ជួយ​គាំទ្រ​ពី​អត្រា​ការ​ប្រាក់​ទាប​ទៀត​ហើយ ក៏​ប៉ុន្តែ​តួលេខ​នៃ​ការ​បង្កើត​ការងារ​ដែល​នាំ​ឱ្យ​មាន​ការ​ស្រងាក​ចិត្ត​ប្រហែល​គាំទ្រ​ទឡ្ហីករណ៍​ដែល​មិន​ចង់​ឱ្យ​មាន​ការ​តម្លើង​អត្រា​ការ​ប្រាក់​មួយ​រយៈពេល​សិន៕

XS
SM
MD
LG