ការិយាល័យគ្រប់គ្រងទ្រព្យសម្បត្តិបរទេសនៃក្រសួងហិរញ្ញវត្ថុសហរដ្ឋអាមេរិកកាលពីថ្ងៃទី ៨ ខែធ្នូបានប្រកាសដាក់ទណ្ឌកម្មលើបុគ្គលចំនួន ២០ នាក់នៅក្នុងប្រទេសចំនួន ៩ សម្រាប់ការរំលោភសិទ្ធិមនុស្ស។
ក្នុងចំណោមបុគ្គលដែលរងទណ្ឌកម្មនេះ បុគ្គលចំនួន ១៣ នាក់មានតួនាទីពាក់ព័ន្ធនៅក្នុងការប្រព្រឹត្តិឬអនុញ្ញាតឱ្យមានការប្រព្រឹត្តិការរំលោភសេពសន្ថវៈនិងទម្រង់ផ្សេងៗទៀតនៃអំពើហិង្សាផ្លូវភេទនៅសាធារណរដ្ឋអាហ្វ្រិកកណ្តាល សាធារណរដ្ឋប្រជាធិបតេយ្យកុងហ្គោ ហៃទី និងស៊ូដង់ខាងត្បូង។
បន្ថែមពីលើនេះ មន្ត្រីតាលីបង់ (Taliban) ២ នាក់នៅអាហ្វហ្គានីស្ថានត្រូវបានដាក់ទណ្ឌកម្មចំពោះការរំលោភបំពានពាក់ព័ន្ធនឹងការគាបសង្កត់លើសិទ្ធិរបស់ស្ត្រីនិងកុមារី។ នៅអ៊ីរ៉ង់ មន្ត្រីស៊ើបការណ៍សម្ងាត់ ២ នាក់ត្រូវបានដាក់ទណ្ឌកម្មសម្រាប់ការបង្ក្រាបលើអ្នកប្រឆាំងនឹងរដ្ឋាភិបាលនិងលើបាតុកម្មសន្តិវិធី។
មន្ត្រីរដ្ឋាភិបាលចិន ២ នាក់នៅខេត្ត Xinjiang ក៏ត្រូវបានដាក់ទណ្ឌកម្មផងដែរសម្រាប់ការរំលោភសិទ្ធិមនុស្សធ្ងន់ធ្ងរលើក្រុមជាតិសាសន៍ភាគតិចកាន់សាសនាអ៊ិស្លាមអ៊ុយហ្គ័រ (Uyghur)។
នៅក្នុងការប្រកាសអំពីទណ្ឌកម្មទាំងនេះ ក្រសួងហិរញ្ញវត្ថុសហរដ្ឋអាមេរិកបានកត់សម្គាល់អំពីខួបទី ៧៥ នៃសេចក្ដីប្រកាសជាសាកលស្ដីពីសិទ្ធិមនុស្សដែលជា «ឯកសារដ៏សំខាន់ចារអំពីសិទ្ធិមនុស្សនិងសេរីភាពមូលដា្ឋនសម្រាប់បុគ្គលគ្រប់រូប»។
សេចក្តីប្រកាសជាសាកលស្ដីពីសិទ្ធិមនុស្សនេះត្រូវបានព្រាងឡើងដោយអ្នកតំណាងមកពីគ្រប់តំបន់ទាំងអស់នៅលើពិភពលោក ហើយត្រូវបានប្រកាសជាសាធារណៈដោយមហាសន្និបាតអង្គការសហប្រជាជាតិនៅទីក្រុងប៉ារីសនៃប្រទេសបារាំងកាលពីថ្ងៃទី ១០ ខែធ្នូ ឆ្នាំ ១៩៤៨។
ក្រសួងហិរញ្ញវត្ថុសហរដ្ឋអាមេរិកក៏បានកត់សម្គាល់ផងដែរថា ប្រធានាធិបតីសហរដ្ឋអាមេរិកលោក Joe Biden បានចាត់ទុកការជំរុញឱ្យមានការទទួលខុសត្រូវចំពោះអំពើហិង្សាផ្លូវភេទដែលពាក់ព័ន្ធនឹងជម្លោះថាជាអាទិភាពកំពូលមួយ ដោយលោកបានចុះអនុស្សរណៈមួយកាលពីឆ្នាំមុនដើម្បីពង្រឹងកិច្ចប្រឹងប្រែងរបស់រដ្ឋាភិបាលអាមេរិកនៅក្នុងការប្រយុទ្ធប្រឆាំងនឹងអំពើទាំងនេះតាមរយៈការប្រើប្រាស់មធ្យោបាយហិរញ្ញវត្ថុ ការទូត និងផ្លូវច្បាប់។
នៅក្នុងសេចក្តីប្រកាសនោះ រដ្ឋមន្ត្រីហិរញ្ញវត្ថុអាមេរិកអ្នកស្រី Janet Yellen បានថ្លែងថា ការប្តេជ្ញារបស់សហរដ្ឋអាមេរិកក្នុងការលើកកម្ពស់សិទ្ធិមនុស្សគឺជារឿងដ៏សំខាន់បំផុត។
អ្នកស្រីបានថ្លែងថា ទណ្ឌកម្មដែលត្រូវបានប្រកាសកាលពីថ្ងៃទី ៨ ខែធ្នូនោះនិងទណ្ឌកម្មផ្សេងៗទៀតក្នុងពេលមួយឆ្នាំកន្លងមក «សង្កត់ធ្ងន់អំពីការប្តេជ្ញាដ៏ម៉ឺងម៉ាត់របស់សហរដ្ឋអាមេរិកនៅក្នុងការជំរុញឱ្យមានការទទួលខុសត្រូវចំពោះការរំលោភសិទ្ធិមនុស្សនិងនៅក្នុងការការពារប្រព័ន្ធហិរញ្ញវត្ថុសហរដ្ឋអាមេរិកពីបុគ្គលដែលប្រព្រឹត្តិអំពើអាក្រក់ជាក់ស្ដែងទាំងនេះ»៕
ព័ត៌មានខ្លះនៅក្នុងសេចក្តីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន Reuters។
ប្រែសម្រួលដោយអ្នកនាង ស្រេង លក្ខិណា
