ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋមន្ត្រី​ហិរញ្ញវត្ថុ​ស.រ.អា.​ថា លោក Trump ពេញចិត្ត​នឹង​យក​ពន្ធ​គយ​លើ​ទំនិញ​ចិន​បន្ថែម​ទៀត ប្រសិនបើ​សម្រេច​មិន​បាន​កិច្ច​ព្រមព្រៀង


លោក Steven Mnuchin និយាយ​ជាមួយ​នឹង​ប្រតិភូ​នៅ​ក្នុង​កិច្ចប្រជុំ​រដ្ឋមន្ត្រី​ហិរញ្ញវត្ថុ G-20 នៅ​ក្នុង​ក្រុង Fukuoka ប្រទេស​ជប៉ុន កាលពី​ថ្ងៃទី៨ ខែមិថុនា ឆ្នាំ២០១៩។

រដ្ឋមន្ត្រី​ក្រសួង​ហិរញ្ញវត្ថុ​សហរដ្ឋ​អាមេរិក​លោក Steven Mnuchin បាន​និយាយ​កាល​ពី​ថ្ងៃ​អាទិត្យ​ម្សិលមិញ​ថា លោក​ប្រធានាធិបតី Donald Trump នឹង «ពេញចិត្ត​ជា​ទី​បំផុត‍» នៅ​ក្នុង​ការ​យក​ពន្ធ​គយ​លើ​ទំនិញ​បន្ថែម​ទៀត​ដែល​នាំ​ចូល​ពី​ប្រទេស​ចិន ប្រសិនបើ​លោក​មិន​អាច​សម្រេច​បាន​កិច្ច​ព្រមព្រៀង​ពាណិជ្ជកម្ម​ជាមួយ​នឹង​ប្រធានាធិបតី​ចិន​លោក Xi Jinping។

ប្រធានាធិបតី​នៃ​ប្រទេស​ទាំង​ពីរ​គ្រោង​នឹង​ជួប​ចរចា​គ្នា​នៅ​ចុង​ខែ​នេះ​នៅ​ឯ​កិច្ច​ប្រជុំ​នៃ​ក្រុម​ប្រទេស G20 នៅ​ក្នុង​ប្រទេស​ជប៉ុន។

លោក Mnuchin បាន​ប្រាប់​ទូរទស្សន៍ CNBC ដូច្នេះ​ថា៖ «យើង​សម្រេច​បាន​ដំណើរ​វិវឌ្ឍ​ទៅ​មុខ​ជា​ច្រើន​បំផុត។ ខ្ញុំ​គិត​ថា យើង​មាន​នូវ​កិច្ច​ព្រមព្រៀង​មួយ​ដែល​ស្ទើរតែ​សម្រេច​បាន ៩០ ភាគរយ​រួច​ទៅ​ហើយ។ រដ្ឋាភិបាល​ចិន​មិន​យល់ស្រប​ចំពោះ​ចំណុច​មួយ​ចំនួន‍»។

លោក​បាន​បន្ថែម​ថា៖ «យើង​បាន​ឈប់​ចរចា​គ្នា‍»។ ជំហាន​បន្ទាន់​នៃ​កិច្ច​ព្រមព្រៀង​នេះ​គឺ​អាស្រ័យ​លើ​ការ​ប្រជុំ​រវាង​លោក Trump និង​លោក Xi Jinping នៅ​ក្នុង​ទីក្រុង Osaka ប្រទេស​ជប៉ុន នៅ​ឯ​កិច្ច​ប្រជុំ​នៃ​ក្រុម​មេដឹកនាំ​នៃ​បណ្ដា​ប្រទេស​សេដ្ឋកិច្ច​ធំៗ​នៅ​លើ​ពិភពលោក​ដែល​ហៅ​ថា​ក្រុម​ប្រទេស G20 ពី​ថ្ងៃ​ទី ២៨ ដល់​ទី ២៩ ខែ​មិថុនា​ខាង​មុខ​នេះ។

លោក Mnuchin បាន​បញ្ជាក់​បន្ថែម​ដូច្នេះ​ថា៖ «លោក​ប្រធានាធិបតី Trump នឹង​សម្រេច​ចិត្ត​លើ​រឿង​យក​ពន្ធ​គយ​លើ​ទំនិញ​ចិន បន្ទាប់ពី​ការ​ប្រជុំ​នៅ​ពេល​ខាង​មុខ​នេះ។ ខ្ញុំ​ជឿ​ថា ប្រសិនបើ​រដ្ឋាភិបាល​ចិន​មាន​ឆន្ទៈ​នៅ​ក្នុង​ការ​បន្ត​ទៅ​មុខ​នូវ​លក្ខខណ្ឌ​ដែល​យើង​បាន​ពិភាក្សា​កន្លង​មក នោះ​យើង​ប្រាកដ​ជា​សម្រេច​បាន​នូវ​កិច្ច​ព្រមព្រៀង។ ប៉ុន្តែ​ប្រសិនបើ​ពួកគេ​មិន​យល់ស្រប​ចំពោះ​រឿង​នេះ នោះ​យើង​នឹង​បន្ត​យក​ពន្ធ​គយ​បន្ថែម​ទៀត‍»។

លោក Trump បាន​ដំឡើង​ពន្ធ​គយ​លើ​ទំនិញ​ចិន​ដែល​មាន​ទឹក​ប្រាក់ ២០០ ពាន់​លាន​ដុល្លារ​រួច​មក​ហើយ ហើយ​ឥឡូវ​នេះ លោក​កំពុង​ពិចារណា​អំពី​ការ​យក​ពន្ធ​គយ​លើ​ទំនិញ​ចិន​ដែល​មាន​ទឹក​ប្រាក់ ៣២៥ ពាន់​លាន​ដុល្លារ​បន្ថែម​ទៀត៕

XS
SM
MD
LG