ភ្ជាប់​ទៅ​គេហទំព័រ​ទាក់ទង

អាមេរិក​នឹង​ជួយ​រក្សា​ឲ្យ​មាន​ទំនាក់​ទំនង​រួម​គ្នា​នៅ​អឺរ៉ុប​ក្រោយ​ការ​ចាក​ចេញ​របស់​អង់គ្លេស


រដ្ឋ​មន្ត្រី​ការ​បរទេស​អង់គ្លេស​ Boris Johnson (ឆ្វេង) និង​រដ្ឋ​មន្ត្រីការ​បរទេស​អាមេរិក John Kerry ថ្លែង​ក្នុង​សន្និសីទ​សារព័ត៌មាន​នៅ​ការិយាល័យ​ការបរទេស​ក្នុង​ទីក្រុង​ឡុងដ៍​ កាល​ពី​ថ្ងៃទី​១៩ ខែ​កក្កដា។

លោក​រដ្ឋមន្ត្រី​ការបរទេស​ស.រ​.អា. ​John Kerry ​បាន​មាន​ប្រសាសន៍​ថា​ស.រ.អា.​នឹង​ជួយ​ធ្វើ​ឱ្យ​ប្រាកដ​ប្រជា​ឱ្យ​មាន​សម្ព័ន្ធភាព​ខ្លាំង​មួយ​រវាង​ស.រ.អា.​ ប្រទេស​អង់គ្លេស​ និង​សហភាព​អឺរ៉ុប​ នៅ​ក្រោយ​ប្រទេស​អង់គ្លេស​ចាក​ចេញ​ពី​សហភាព​នេះ​ដែល​មានប្រទេស​ជាតិ​២៨​ជា​សមាជិក។

លោក ​Kerry ​បាន​មាន​ប្រសាសន៍​ថា​ ស.រ.អា.​ ពឹង​ពាក់​លើ​ប្រទេស​អង់គ្លេស​មួយ​ដែល​ខ្លាំង។ លោក​បាន​មាន​ប្រសាសន៍​ដូច្នេះ​នៅ​ក្នុង​សន្និសីទ​កាសែត​រួម​គ្នា​មួយ​កាល​ពី​ថ្ងៃ​អង្គារ​នៅ​ក្នុង​ក្រុង​ឡុងដ៍​ ជា​មួយ​សមភាគី​អង់គ្លេស​របស់​លោកគឺ​លោក Boris Johnson ​ដែល​ជា​រដ្ឋមន្ត្រី​ការបរទេស​អង់គ្លេស​ទើប​បាន​ទទួល​ការ​តែង​តាំង​កាល​ពី​ពេល​ថ្មីៗ​នេះ។

លោក ​Kerry ​បាន​មាន​ប្រសាសន៍​បន្ថែម​ថា៖ «ប្រទេស​អាមេរិក​គាំទ្រ​ខាងផ្លូវ​ចិត្ត​និង​ធ្វើ​អ្វី​ទាំង​អស់​ដែល​យើង​អាច​ធ្វើ​បាន​ដើម្បី​លើក​ទឹក​ចិត្ត​និង​ជួយ​នៅ​ក្នុង​ការ​អភិវឌ្ឍន៍​នៃ​អន្តរកាល​ដ៏​រលូន​បំផុត​ និង​នៅ​ក្នុង​ទំនាក់​ទំនងរួម​គ្នា​និង​កិច្ច​សហប្រតិបត្តិការ​ខ្ពស់​រវាង​ប្រទេស​អង់គ្លេស​និង​សហភាព​អឺរ៉ុប»។

នៅ​ក្នុង​ឱកាស​ដំណើរ​ទស្សនកិច្ច​របស់​លោក​ទៅ​កាន់​ក្រុង​ឡុងដ៍​ លោក​ Kerry និង​លោក ​Johson ​នឹង​ជួប​ជាមួយ​ពួក​អ្នកតំណាង​សហភាព​អឺរ៉ុប​ដើម្បី​ពិភាក្សា​គ្នា​អំពី​សង្គ្រាម​ក្នុង​ប្រទេស​ស៊ីរី​ដែល​មាន​រយៈ​ពេល​៥​ឆ្នាំ​មក​ហើយ​ ដែល​សង្គ្រាម​នេះ​បាន​បំផុស​គំនិត​ឱ្យ​មាន​ការ​លេច​ឡើង​នៃ​ពួក​រដ្ឋ​ឥស្លាម​ និង​បាន​រួមចំណែក​ដល់​វិបត្តិ​ជន​ភៀស​ខ្លួន​ដ៏​អាក្រក់​បំផុត​របស់​ពិភពលោក។​

លោក​ Kerry ​និង​លោក ​Johnson ​ក៏​នឹង​ជួប​ជាមួយរដ្ឋមន្ត្រី​ការបរទេស​នៃ​ប្រទេស​អរ៉ាប៊ី​សាអូឌីត​ និង​ប្រទេស​អេមីរ៉ាត​អារ៉ា់ប់​រួម ដើម្បី​ពិភាក្សា​គ្នា​អំពី​ជម្លោះ​នៅ​ក្នុង​ប្រទេស​យេម៉ែន​ ផង​ដែរ៕

XS
SM
MD
LG