នាវាសហរដ្ឋងាមេរិកបានផ្អាកការស្វែងរកនាវិកម្នាក់ដែលត្រូវបានគេជឿជាក់ថាបានធ្លាក់ចេញពីនាវាក្នុងអំឡុងនៃកិច្ចប្រតិបត្តិការក្នុងសមុទ្រចិនខាងត្បូង។
លោកអនុសេនីយឯក Jeff Davis អ្នកនាំពាក្យក្រសួងការពារប្រទេសសហរដ្ឋអាមេរិកបានប្រាប់ពួកអ្នកយកព័ត៌មានកាលពីថ្ងៃសុក្រថា កិច្ចប្រតិបត្តិការស្វែងរកដែលទាក់ទិននឹងនាវារបស់ជប៉ុននិងចិនដែរនោះបានបញ្ឈប់កាលពីព្រឹកថ្ងៃសុក្រម្សិលមិញ។
នាវិកដែលកំពុងបាត់ខ្លួនជាសមាជិកនាវិកនៅលើនាវាពិឃាត USS Stethem បំពាក់ទៅដោយកាំជ្រួចមីស៊ីល។ គេបានជឿជាក់ថា នាវិកបាត់ខ្លួននោះបានឡើងទៅលើនាវាពិឃាតនោះប្រហែលម៉ោង៩ព្រឹកម៉ោងនៅក្នុងស្រុកកាលពីថ្ងៃអង្គារក្នុងអំឡុងពេលអ្វីដែលលោក Davis អ្នកនាំពាក្យក្រសួងការពារប្រទេសអាមេរិកបានហៅថា «កិច្ចប្រតិបត្តិការជាប្រចាំក្នុងដែនទឹកអន្តរជាតិ»ដែលស្ថិតនៅចម្ងាយប្រហែល២៦០គីឡូម៉ែត្រភាគខាងលិចឆកសមុទ្រ Subic ដែលស្ថិតនៅភាគខាងលិចនៃកោះ Luzon នៃប្រទេសហ្វីលីពីន។
យន្តហោះយាមល្បាតធុន P-3 Orionរបស់សហរដ្ឋអាមេរិកនិងឧទ្ធម្ភាគចក្រជប៉ុនបានហោះពីលើបេសកម្មរុករកនោះជាច្រើនដងនៅពីលើនាវាសហរដ្ឋអា មេរិកនិងនាវាជប៉ុន។ នាវាចំបាំងចិន២គ្រឿងដែលនៅជិតនោះក៏បានជួយនៅក្នុងការរុករកនោះដែរ។
លោក Davis អ្នកនាំពាក្យក្រសួងការពារប្រទេសសហរដ្ឋអាមេរិកបាននិយាយទៀតថា «យើងសូមវាយតម្លៃការខំប្រឹងប្រែងរបស់ជប៉ុននិងចិននៅក្នុងការជួយស្វែងរកនេះ ហើយនេះជាស្មារតីនៃជំនាញក្នុងការចាត់ចែងនាវាដ៏ល្អ»៕
