ក្រុមសមាជិកមេធាវីមានត្រចៀកថ្លង់ចំនួន១៣នាក់នឹងចូលរួមជាសមាជិកគណៈមេធាវីរបស់តុលាការកំពូលសរអាក្នុងពិធីមួយដែលគេនឹងរៀបចំនៅសប្តាហ៍ខាងមុខ។
សមាគមគណៈមេធាវីសម្រាប់មេធាវីដែលមានត្រចៀកថ្លង់និងពិបាកស្តាប់ឮហៅថា (DHHBA) និយាយថានេះជាក្រុមមេធាវីត្រចៀកថ្លង់ចំនួនធំបំផុតដែលត្រូវបានអនុញាតិឲ្យចូលធ្វើការក្នុងសមាជិកគណៈមេធាវីរបស់តុលាការកំពូលក្នុងរយៈពេលតែមួយ។
ពិធីដាក់បញ្ចូលពួកគេដែលនឹងត្រូវធ្វើនៅថ្ងៃទី១៩ ខែមេសាខាងមុខនេះ គឺជាពិធីពិសេសមួយ ដែលនៅក្នុងនោះក្រុមមេធាវីទាំងនេះត្រូវគេអនុញាតិឲ្យប្រើប្រាស់ទូរស័ព្ទដៃក្នុងរយៈពេលកំណត់ជាក់លាក់ដើម្បីអានឯកសារក្នុងពេលដំណើរការនីតិវិធីតុលាការនានា។ ទូរស័ព្ទដៃនិងគ្រឿងអេឡិចត្រូនិចនានា ជាធម្មតាត្រូវគេហាមឃាត់មិនឲ្យយកចូលក្នុងតុលាការទេ។
លោក Anat Maytal នាយកនៃសមាគមមេធាវីដែលមានត្រចៀកថ្លង់និងពិបាកស្តាប់ DHHBA បានថ្លែងថាកាដាក់បញ្ចូលក្រុមមេធាវីរបស់លោកគឺដើម្បីបង្កើតជាទំលាប់បទដ្ឋានមួយដែលអាចលើកទឹកចិត្តដល់ជនពិការឬអ្នកមានត្រចៀកថ្លង់ក្នុងការស្វែងរកអាជីពផ្នែកច្បាប់ ហើយនឹងបង្ហាញពីវិជ្ជាជីវៈច្បាប់និងបើកឱកាសដល់មជ្ឈដ្ឋានចំរុះ៕
