សហរដ្ឋអាមេរិកបានបញ្ជូនក្រុមប្រតិបត្តិនាវាជើងទឹករបស់ខ្លួនទៅកាន់ឧបទ្វីបកូរ៉េ ដើម្បីបង្កើនវត្តមានរបស់ខ្លួននៅទីនោះ និងដើម្បីផ្ញើសារទៅកាន់ប្រទេសកូរ៉េខាងជើង ដែលកាលពីសប្ដាហ៍មុន បានធ្វើការសាកល្បងគ្រាប់ផ្លោងមីស៊ីលរបស់ខ្លួន ទោះបីជាសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិបានហាមឃាត់ការសាកល្បងដូចនេះក៏ដោយ។
ក្រុមប្រតិបត្តិនាវាជើងទឹកដែលមានឈ្មោះថា Carl Vinson នេះ បានឈប់សំចតរយៈពេលខ្លីនៅក្នុងប្រទេសសិង្ហបុរី និងមានគម្រោងធ្វើដំណើរបន្តទៅកាន់ប្រទេសអូស្ត្រាលី ប៉ុន្តែនៅពេលនោះត្រូវបានទីបញ្ជាការសហរដ្ឋអាមេរិកប្រចាំតំបន់ប៉ាស៊ីហ្វិកបញ្ជាឲ្យធ្វើដំណើរឆ្ពោះទៅកាន់ទិសខាងជើងវិញ។
លោកមេបញ្ជាការ Dave Benham ប្រធានប្រតិបត្តិការប្រព័ន្ធផ្សព្វផ្សាយសម្រាប់ក្រុមនាវាជើងទឹកទី ៣ របស់ទីបញ្ជាការសហរដ្ឋអាមេរិកប្រចាំតំបន់ប៉ាស៊ីហ្វិក បានប្រាប់ VOA ថា៖ «ក្រុមនាវាជើងទឹកទី ៣ នេះ មានប្រតិបត្តិការទៅមុខក្នុងគោលបំណងមួយគឺដើម្បីការពារផលប្រយោជន៍សហរដ្ឋអាមេរិកនៅក្នុងតំបន់មហាសមុទ្រប៉ាស៊ីហ្វិកខាងលិច»។
លោកបានបន្ថែមថា៖ «ការគំរាមកំហែងទីមួយនៅក្នុងតំបន់ គឺកូរ៉េខាងជើងដដែល ដោយសារតែប្រទេសនេះ មានកម្មវិធីសាកល្បងមីស៊ីលដែលព្រហើន ខ្វះការទទួលខុសត្រូវ និងបង្កភាពវឹកវរ និងថែមទាំងមានគោលបំណងបន្តសម្រេចឲ្យបាននូវសមត្ថភាពអាវុធនុយក្លេអ៊ែររបស់ខ្លួនទៀតផង»។
នៅថ្ងៃអាទិត្យនេះ ប្រព័ន្ធផ្សព្វផ្សាយរដ្ឋរបស់កូរ៉េប្រទេសខាងជើង បានដកស្រង់សម្ដីរបស់មន្ត្រីក្រសួងការបរទេសកូរ៉េខាងជើងមួយរូប ដែលបាននិយាយថា កូរ៉េខាងជើងនឹងបង្កើនសមត្ថភាពការពារប្រទេសរបស់ខ្លួន ដើម្បីការពារទប់ទល់នឹងការវាយប្រហារតាមអាកាស ដូចនឹងការវាយប្រហារដែលសហរដ្ឋអាមេរិកបានអនុវត្តប្រឆាំងនឹងរដ្ឋាភិបាលស៊ីរី កាលពីប៉ុន្មានថ្ងៃកន្លងមកនេះ៕
