លេខាធិការរដ្ឋ Georgia សហរដ្ឋអាមេរិក កាលពីថ្ងៃពុធម្សិលមិញ បានបញ្ជាឲ្យធ្វើការរាប់សន្លឹកឆ្នោតឡើងវិញនៃការបោះឆ្នោតដែលមានលក្ខណៈប្រកៀកប្រកិតគ្នារវាងលោកប្រធានាធិបតី Donald Trump និងលោក Joe Biden ដែលគេព្យាករណ៍ថាឈ្នះការបោះឆ្នោត។
ដោយសន្លឹកឆ្នោតស្ទើរតែទាំងអស់ត្រូវបានរាប់នៅក្នុងរដ្ឋ Georgia លោក Biden កំពុងនាំមុខលោក Trump ចំនួន ១៤.១១២ សំឡេង នៃសន្លឹកឆ្នោតសរុបទាំងអស់ជិត ៥ លានសំឡេង ដែលបានបោះនៅក្នុងរដ្ឋនោះ។
លោក Brad Raffensperger លេខាធិការរដ្ឋ Georgia បាននិយាយថា លោកចង់ឲ្យលោក Trump ឈ្នះការបោះឆ្នោតនេះ ក៏ប៉ុន្តែលោកបានជំទាស់ទៅនឹងការអះអាងរបស់គណបក្សសាធារណរដ្ឋដែលថា ការរាប់សន្លឹកឆ្នោតនៅរដ្ឋ Georgia មានភាពមិនប្រក្រតី។ ចាប់តាំងពីឆ្នាំ ១៩៩២ មក បេក្ខជនប្រធានាធិបតីខាងគណបក្សប្រជាធិបតេយ្យមិនដែលឈ្នះនៅក្នុងរដ្ឋ Georgia នោះទេ។
លោក Raffensperger បាននិយាយថា លោកនឹងអញ្ជើញទាំងអ្នកសង្កេតការណ៍របស់គណបក្សប្រជាធិបតេយ្យនិងអ្នកសង្កេតការណ៍របស់គណបក្សសាធារណរដ្ឋ ឲ្យមកមើលការរាប់សន្លឹកឆ្នោតឡើងវិញនេះ ដោយសារតែមាន «ការប្រជែងខ្លាំង»។
សន្លឹកឆ្នោតនឹងត្រូវស្កេនឡើងវិញនៅក្នុងកុំព្យូទ័រនៅក្នុងរដ្ឋនោះ បន្ថែមពីលើការត្រួតពិនិត្យដោយមនុស្សលើសន្លឹកឆ្នោតនីមួយៗ។ នេះជាដំណើរការមួយដែលមន្ត្រីរៀបចំការបោះឆ្នោតសង្ឃឹមថា នឹងអាចបញ្ចប់ នៅត្រឹមថ្ងៃទី ២០ ខែវិច្ឆិកាខាងមុខ។
លោក Raffensperger បានបញ្ជាក់ថា៖ «ដំណើរការនេះនឹងជួយកសាងទំនុកចិត្ត»៕
