នៅពេលដែលទំនងជានឹងចាញ់ការបោះឆ្នោតប្រធានាធិបតីសហរដ្ឋអាមេរិក លោកប្រធានាធិបតី Donald Trump បេក្ខជនប្រធានាធិបតីខាងគណបក្សសាធារណរដ្ឋ កំពុងទាមទារឲ្យគេជឿពីការលើកឡើងជាច្រើនឆ្នាំមកហើយរបស់លោកថា មានការក្លែងបន្លំសន្លឹកឆ្នោតយ៉ាងច្រើននៅក្នុងការបោះឆ្នោតជ្រើសរើសប្រធានាធិបតីក្នុងសប្ដាហ៍នេះ។
លោក Trump បានថ្លែងនៅក្នុងសេតវិមានកាលពីល្ងាចថ្ងៃព្រហស្បតិ៍ ខណ:ពេលដែលជ័យជម្នះនៃការបោះឆ្នោតនៅក្នុងរដ្ឋសំខាន់ៗ ចាប់ផ្ដើមងាកទៅរកគូប្រជែងរបស់លោកវិញនោះ យ៉ាងដូច្នេះថា៖ «នេះគឺជាករណីដែលពួកគេព្យាយាមលួចបន្លំនៅក្នុងការបោះឆ្នោត»។
ការអះអាងដោយគ្មានមូលដ្ឋានដែលថា ការបោះឆ្នោតកាលពីថ្ងៃអង្គារ ដែលជាការប្រជែងគ្នារវាងលោក Trump និងលោក Joe Biden បេក្ខជនប្រធានាធិបតីមកពីគណបក្សប្រជាធិបតេយ្យ ពុករលួយ ហើយសន្លឹកឆ្នោតកំពុងត្រូវបានគេលួចបន្លំ រងការរិះគន់ពីគណបក្សប្រជាធិបតេយ្យផង និងពីសមាជិកជាច្រើននៃគណបក្សសាធារណរដ្ឋផងដែរ។
សមាជិកព្រឹទ្ធសភានៃគណបក្សសាធារណរដ្ឋប្រចាំរដ្ឋ Pennsylvania លោក Pat Toomey បានថ្លែងនៅក្នុងកម្មវិធីទូរទស្សន៍ CBS This Morning ថា៖ «សុន្ទរកថារបស់លោកប្រធានាធិបតីកាលពីយប់មិញរំខានដល់ខ្ញុំខ្លាំងណាស់ ព្រោះលោកប្រធានាធិបតី បានធ្វើការចោទប្រកាន់ខ្លាំងៗដោយគ្មានភស្តុតាងទាល់តែសោះ»។
សមាជិកព្រឹទ្ធសភានៃគណបក្សសាធារណរដ្ឋប្រចាំរដ្ឋ Utah លោក Mitt Romney ដែលជាបេក្ខជនប្រធានាធិបតីកាលពីឆ្នាំ ២០១២ និងជាអ្នករិះគន់លោក Trump មួយរូប បាននិយាយថា លោកប្រធានាធិបតី គឺត្រូវ ក្នុងការទាមទារឲ្យមានការរាប់សន្លឹកឆ្នោតឡើងវិញ និងទាមទារឲ្យមានការស៊ើបអង្កេត នៅពេលមានភស្តុតាង ប៉ុន្តែលោក Trump ខុស ដែលនិយាយថា ការបោះឆ្នោតមានការក្លែងបន្លំ ពុករលួយ និងត្រូវបានគេលួចបន្លំ»។
ក៏ប៉ុន្តែ អ្នកគាំទ្រលោកប្រធានាធិបតី Trump ការពារការលើកឡើងរបស់លោក។ លោក Kevin McCarthy មេដឹកនាំសំឡេងភាគតិចនៃរដ្ឋសភាខាងគណបក្សសាធារណរដ្ឋ បានថែ្លងលើកញ្ចក់ទូរទស្សន៍ Fox News ថា៖ «លោកប្រធានាធិបតី Trump បានឈ្នះការបោះឆ្នោតនេះ ដូច្នេះអ្នករាល់គ្នាដែលកំពុងស្ដាប់ សូមកុំនៅស្ងៀមស្ងាត់អំពីរឿងនេះ»៕
