ភ្ជាប់​ទៅ​គេហទំព័រ​ទាក់ទង

ក្រសួង​ការបរទេស​ស.រ.អា.​បញ្ចេញ​សារអេឡិកត្រូនិក​​របស់​លោកស្រី​ Clinton


លោកស្រី Hillary Rodham Clinton បេក្ខនារី​សម្រាប់​តំណែង​ប្រធានាធិបតី​មកពី​គណបក្ស​ប្រជាធិបតេយ្យ​ មាន​ប្រសាសន៍​ទៅកាន់​បុគ្គលិក​សុខភាព​ ក្នុង​អំឡុង​ទស្សនកិច្ច​របស់​លោក​ស្រី​ទៅ​កាន់ ​Center For New Horizons កាលពីថ្ងៃទី​២០ ខែឧសភា ឆ្នាំ២០១៥។

ក្រសួង​ការបរទេស​ស.រ.អា.​បាន​បញ្ចេញ​តាម​ប្រព័ន្ធ​អ៊ីនធឺណិ​ត​នូវសារ​អេឡិកត្រូនិក​របស់​អតីត​រដ្ឋ​មន្ត្រី​ការបរទេស​លោកស្រី Hillary Clinton ​ចំនួន​២៩៦​ ដែល​និយាយ​ទាក់ទង​នឹង​ការ​វាយ​ប្រហារ​លើ​ទីតាំង​ការទូត​របស់​ស.រ.អា​ក្នុង​ក្រុង​ Benghazi នៃ​ប្រទេស​លីប៊ី​ កាលពី​ឆ្នាំ​២០១២។

អ្នក​នាំ​ពាក្យ​ក្រសួង​ការ​បរទេស​ លោក​ស្រី​ Marie Harf ​បាន​និយាយ​ក្នុង​សេចក្តី​ថ្លែង​ការណ៍​ចេញផ្សាយ​កាល​ពី​ព្រឹក​ថ្ងៃ​សុក្រ​សប្តាហ៍​មុនថា «ឯកសារដែល​សាធារណជន​អាច​មើល​បាន​ចាប់​ពី​ថ្ងៃ​នេះ​ទៅ​ ត្រូវ​បាន​បញ្ជូន​ទៅ​កាន់​គណៈកម្មាធិការ​ពិសេស​តាំង​ពី​ប៉ុន្មាន​ខែ​មុន​នេះ​ ដែល​ឯកសារ​ទាំង​នេះ​មាន​ចន្លោះ​ពេល​២ឆ្នាំ​ ហើយ​វា​ទាក់​ទិន​នឹង​សន្តិសុខ​ និង​ការ​វាយប្រហារ​លើ​អគារ​ក្រសួង​ការ​បរទេស​ក្នុង​ក្រុង​ Benghazi»។

សេចក្តី​ថ្លែង​ការណ៍​បាន​បន្ត​ថា​៖ «សារ​អេឡិកត្រូនិក​ដែល​យើង​បញ្ចេញ​ថ្ងៃនេះ​ មិន​បាន​កែប្រែ​នូវ​ការពិត​សំខាន់ៗ​ ឬ​ការ​យល់​ឃើញ​របស់​យើង​អំពី​ព្រឹត្តិការណ៍ នៅ​មុន​ពេល​ការ​វាយប្រហារ​ ក្នុង​ពេល​វាយប្រហារ​ ឬ​ក្រោយ​ពេលវាយប្រហារ​នោះ​ទេ​ ដែល​ត្រូវ​បាន​គេ​ដឹង​ចាប់​តាំង​ពី​មាន​របាយការណ៍​ពី​គណៈកម្មាការ​ត្រួតពិនិត្យ​ការ​ទទួល​ខុសត្រូវ​ ទៅ​លើ​ការ​វាយប្រហារ​នៅ​ក្រុង Benghazi ដែល​របាយការណ៍​នោះ​ត្រូវ​បាន​ចេញ​ផ្សាយ​ជិត​ពីរ​ឆ្នាំ​កន្លះ​មក​ហើយ»។

សេចក្តី​ថ្លែងការណ៍​បាន​សរសេរ​បន្តថា​ ក្រសួង​ការបរទេស​កំពុង​បន្ត​ត្រួត​ពិនិត្យ​មើល​សារ​អេឡិកត្រូនិកដែល​នៅ​សេសសល់​ចំនួន​៥៥.០០០​ទំព័រ​ទៀត​ ដែល​ចេញ​ដោយ​លោកស្រី Clinton កាល​ពី​ឆ្នាំ​មុន ហើយ​ក្រសួង​ក៏​នឹង​បញ្ចេញ​ឯកសារ​ទាំង​នោះ​ជា​សាធារណៈតាម​រយៈ​គេហទំព័រ​របស់​ក្រសួង​ការបរទេស​ក្នុង​ផ្នែក​ «ច្បាប់ស្តី​ពី​សេរីភាព​ក្នុង​ការ​ទទួល​បាន​ព័ត៌មាន» ដែល​អាច​បើក​មើល​មួយ​ទំព័រ​ម្តងៗ។

សារអេឡិកត្រូនិកទាំង​នោះ​ គឺ​ជា​ចំណុច​នៃ​វិវាទ​មួយ​ បន្ទាប់​ពី​គេ​បាន​រក​ឃើញ​ថា​ លោក​ស្រី​ Clinton ​ដែល​ជា​បេក្ខនារី​ឈរ​ឈ្មោះ​បោះឆ្នោត​ប្រធានាធិបតី​ឆ្នាំ២០១៦​ និង​ដែល​បាន​ចាប់​ផ្តើម​យុទ្ធនាការ​ឃោសនា​ក្នុង​រដ្ឋ​ New Hampshire​ កាល​ពី​ថ្ងៃ​សុក្រ​ បាន​ប្រើ​ប្រាស់​សារអេឡិកត្រូនិក​ផ្ទាល់​ខ្លួន​របស់​លោកស្រី​ ដើម្បី​ផ្ញើ​ និង​ទទួល​សារ​ក្នុង​នាម​រដ្ឋមន្រ្តី​ក្រសួង​ការបរទេស។

ចៅក្រម​សហព័ន្ធ​ កាល​ពី​ថ្ងៃ​ព្រហស្បតិ៍ ​បាន​ស្នើ​ឲ្យ​ក្រសួង​ការបរទេសបង្ហាញ​កាល​បរិច្ឆេទ​មួយ​ក្នុង​ពេល​ប៉ុន្មាន​ថ្ងៃ​ខាង​មុខ​នេះ​ ក្នុង​ការ​ចេញ​ផ្សាយ​សារ​អេឡិកត្រូនិក​ចំនួន​៣០០ ​ដែល​និយាយ​ទាក់​ទិន​នឹង​ប្រតិបត្តិការ​ក្នុង​ក្រុង​ Benghazi ​ ទី​ដែល​ជនអាមេរិកាំង​បួននាក់​ ដែល​មាន​រួម​ទាំងឯកអគ្គរដ្ឋទូត​អាមេរិក​ផង​ ត្រូវ​បាន​សម្លាប់​ក្នុង​ការ​វាយប្រហារ​នោះ។ សារអេឡិកត្រូនិកជាច្រើន​ត្រូវ​បាន​បញ្ជូន​ទៅ​កាន់​គណៈកម្មាធិ​ការ​ពិសេស​របស់​សេតវិមាន​ដែល​កំពុង​តែ​ស៊ើប​អង្កេត​លើ​ហេតុការណ៍​នោះ។

កាសែត​ The New York Times​ បាន​ចេញ​ផ្សាយ​ផ្នែក​ខ្លះ​នៃ​សារអេឡិកត្រូនិក​តាម​ប្រព័ន្ធ​អ៊ីនធឺណិត​ កាលពី​ថ្ងៃទី​២១ ខែ​ឧសភា​នេះ។

នៅ​ខណៈ​ដែល​អ្នក​រិះគន់​លោក​ស្រី​ Clinton ​ចាប់​អារម្មណ៍​ជា​ពិសេស​លើ​សារអេឡិកត្រូនិក​អំពី​ហេតុការណ៍​ក្នុង​ក្រុង​ Benghazi ​ការ​ស៊ើបអង្កេត​មួយ​ចំនួន​ដែល​ត្រូវ​បាន​ធ្វើ​ឡើង​ដោយ​គណៈកម្មាធិការ​ពិសេសរបស់​សភា​មិន​បាន​រក​ឃើញ​ «​ភស្តុតាង​ឧក្រិដ្ឋកម្ម​មិន​អាច​ប្រកែក​បាន​»​ណាមួយ ដែល​ផ្សារ​ភ្ជាប់​លោក​ស្រី​ទៅ​នឹង​បរាជ័យ​ក្នុង​ការការពារ​ជន​អាមេរិកាំង​ដែល​ត្រូវ​បាន​សម្លាប់​នោះ​ទេ។

លោកស្រី​ Clinton​ ស្នើ​ឲ្យ​ក្រសួង​ការបរទេស​ បញ្ចេញ​សារ​អេឡិកត្រូនិកទាំង​នោះ​ឲ្យ​បាន​ឆាប់​តាម​តែអាច​ធ្វើ​ទៅ​បាន៕

ប្រែសម្រួល​ដោយ​ នៀម ឆេង

XS
SM
MD
LG