ប្រធានាធិបតីសហរដ្ឋអាមេរិកលោក Donald Trump និងប្រធានាធិបតីកូរ៉េខាងត្បូងលោក Moon Jae In កាលពីថ្ងៃចន្ទម្សិលមិញ បានឯកភាពគ្នាក្នុងការដកចេញនូវការដាក់កំហិតចំពោះក្បាលគ្រាប់បែកដែលសម្រាប់បន្តុបពីលើគ្រាប់មីស៊ីលរបស់កូរ៉េខាងត្បូង និងបានឯកភាពគ្នាក្នុងការជំរុញឲ្យមានការដាក់ទណ្ឌកម្មខ្លាំងក្លាជាងមុនទៀតប្រឆាំងនឹងរដ្ឋាភិបាលកូរ៉េខាងជើង។
ប្រធានាធិបតីកូរ៉េខាងត្បូងលោក Moon Jae In ក៏បានស្នើអង្គការសហប្រជាជាតិផងដែរឲ្យពិចារណារារាំងការដឹកជញ្ជូនប្រេងទៅកាន់ប្រទេសកូរ៉េខាងជើង។ នេះបើយោងតាមការបញ្ជាក់របស់មន្ត្រីរដ្ឋាភិបាលក្រុងសេអ៊ូល។
មន្ត្រីរដ្ឋាភិបាលសហរដ្ឋអាមេរិកមិនបានលើកឡើងពីការដាក់ទណ្ឌកម្មប្រេងប្រឆាំងនឹងរដ្ឋាភិបាលក្រុងព្យុងយ៉ាងនោះទេ ប៉ុន្តែពួកគេបាននិយាយថា លោក Donald Trump និងលោក Moon Jae In បានឯកភាពគ្នាគ្រប់ចំណុចសំខាន់ៗទាំងអស់នៅក្នុងកិច្ចសន្ទនាតាមទូរស័ព្ទរយៈពេល ៤០ នាទី កាលពីថ្ងៃចន្ទម្សិលមិញ គឺក្នុងរយៈពេលមួយថ្ងៃក្រោយមក បន្ទាប់ពីកូរ៉េខាងជើងបានបាញ់សាកល្បងមីស៊ីលឆ្លងទ្វីបបំពាក់ដោយក្បាលគ្រាប់នុយក្លេអ៊ែរ ដែលខ្លួនអះអាងថាជាគ្រាប់បែកអ៊ីដ្រូសែន ដែលការបាញ់បានបង្កឲ្យមានការតវ៉ានៅជុំវិញពិភពលោក។
សេចក្ដីប្រកាសរបស់សេតវិមានបានបញ្ជាក់ថា៖ «មេដឹកនាំទាំងពីរបានសង្កត់ធ្ងន់ថា ការបង្កហេតុរបស់កូរ៉េខាងជើងថ្មីបំផុតចុងក្រោយនេះបានបង្កឲ្យមានការគំរាមកំហែងធ្ងន់ធ្ងរដល់ពិភពលោកទាំងមូល។ មេដឹកនាំទាំងពីរបានឯកភាពគ្នាក្នុងការដាក់សម្ពាធឲ្យមានខ្លាំងក្លាបន្ថែមទៀតទៅលើរដ្ឋាភិបាលកូរ៉េខាងជើង ដោយប្រើប្រាស់គ្រប់មធ្យោបាយទាំងអស់ដែលមេដឹកនាំទាំងពីរអាចធ្វើបាន។ មេដឹកនាំទាំងពីរក៏បានសន្យាថានឹងពង្រឹងសមត្ថភាពយោធារួមគ្នាបន្ថែមទៀតផងដែរ»៕
