សហរដ្ឋអាមេរិកនិងប្រទេសកូរ៉េខាងត្បូង កំពុងត្រៀមរៀបចំបង្កើត «ផែនការសង្គ្រាមប្រតិបត្តិការថ្មីមួយ» ដើម្បីទប់ទល់ឱ្យបានប្រសើរជាងមុននូវការគំរាមកំហែងកើនឡើងរបស់ប្រទេសកូរ៉េខាងជើង។
ផែនការថ្មីនេះ នឹងជំនួសឱ្យយុទ្ធសាស្ត្រដែលមានស្រាប់នៅពេលបច្ចុប្បន្ននេះ ដែលយុទ្ធសាស្ត្រទាំងនោះ មានបំណងឆ្លើយតបទៅនឹងភាពគឃ្លើនណាមួយដែលកូរ៉េខាងជើងអាចបង្កឡើង។
យុទ្ធសាស្ត្រទាំងនោះ ត្រូវបានតាក់តែងឡើងកាលពីប្រមាណ ១០ ឆ្នាំមុន ហើយមិនបានគ្របដណ្ដប់លើភាពជឿនលឿនផ្នែកយោធារបស់កូរ៉េខាងជើងនោះទេ។ នេះបើតាមការលើកឡើងរបស់មន្ត្រីជាន់ខ្ពស់ក្រសួងការពារជាតិអាមេរិក ដែលនិយាយក្នុងលក្ខខណ្ឌមិនបញ្ចេញឈ្មោះ។
មន្ត្រីក្រសួងការពារជាតិជាន់ខ្ពស់អាមេរិកមួយរូប បានប្រាប់ក្រុមអ្នកសារព័ត៌មានក្នុងពេលកំពុងធ្វើដំណើរទៅកាន់ទីក្រុងសេអ៊ូល ប្រទេសកូរ៉េខាងត្បូង ដើម្បីចូលរួមក្នុងការប្រជុំរវាងរដ្ឋមន្ត្រីក្រសួងការពារជាតិអាមេរិកលោក Lloyd Austin និងមន្ត្រីកូរ៉េខាងត្បូងថា៖ «នេះគឺជារឿងត្រឹមត្រូវដែលយើងត្រូវធ្វើ។ ប្រទេសកូរ៉េខាងជើងបានពង្រីកសមត្ថភាពយោធារបស់ខ្លួន។ បរិយាកាសយុទ្ធសាស្រ្តបានផ្លាស់ប្តូរក្នុងរយៈពេលប៉ុន្មានឆ្នាំកន្លងទៅនេះ»។
មន្ត្រីរូបនេះបានពណ៌នាថា ដំណើរការធ្វើបច្ចុប្បន្នភាពលើផែនការដែលមានស្រាប់នេះគឺជា «កិច្ចប្រឹងប្រែងដែលមានលក្ខណៈធំធេងនិងស៊ីជម្រៅ» ដោយពុំមានកំណត់កាលបរិច្ឆេទថា នឹងត្រូវបញ្ចប់នៅពេលណានោះទេ។
មន្ត្រីក្រសួងការពារជាតិសហរដ្ឋអាមេរិក បានតាមដានការសាកល្បងអាវុធរបស់កូរ៉េខាងជើងតាំងពីខែកញ្ញាមក។ ការសាកល្បងទាំងនោះ មានដូចជាការសាកល្បងមីស៊ីលស្វ័យនាំផ្លូវ គ្រាប់ផ្លោងមីស៊ីលរយៈចម្ងាយខ្លី គ្រាប់ផ្លោងមីស៊ីលដែលបាញ់ចេញពីនាវាមុជទឹក និងអ្វីដែលកូរ៉េខាងជើងអះអាងថា ជាយានដែលហោះលឿនជាងសំឡេង៕
