ប្រទេសកូរ៉េខាងត្បូងបានចាក់វ៉ាក់សាំងកូវីដ១៩ ជូនពលរដ្ឋបានតែ ៣% ប៉ុណ្ណោះ ក្នុងចំណោមប្រជាពលរដ្ឋសរុបចំនួន ៥២ លាននាក់របស់ខ្លួន ប៉ុន្តែមានគោលបំណងធ្វើយ៉ាងណាសម្រេចឲ្យបាននូវភាពស៊ាំដោយប្រយោលនៃជំងឺកូវីដ១៩ នៅត្រឹមខែវិច្ឆិកាខាងមុខ។
សហរដ្ឋអាមេរិកបានសន្យាជួយរដ្ឋាភិបាលក្រុងសេអ៊ូលនៅក្នុងរឿងនេះតាមរយៈភាពជាដៃគូផ្នែកវ៉ាក់សាំង។
ប្រធានាធិបតីសហរដ្ឋអាមេរិកលោក Joe Biden បានប្រកាសនៅក្នុងអំឡុងពេលជួបពិភាក្សាជាមួយនឹងប្រធានាធិបតីកូរ៉េខាងត្បូងលោក Moon Jae In នៅសេតវិមានកាលពីថ្ងៃសុក្រថា៖ «យើងអាចបង្កើនការផ្គត់ផ្គង់វ៉ាក់សាំងកូវីដ១៩ ជាសាកល។ យើងនឹងពង្រឹងសមត្ថភាពរបស់យើងនៅក្នុងការប្រយុទ្ធប្រឆាំងនឹងជំងឺកូវីដ១៩ និងឆ្លើយតបចំពោះការគំរាមកំហែងជីវសាស្ត្រដទៃទៀតនៅពេលអនាគត»។
មេដឹកនាំទាំងពីរក៏បានផ្ដោតផងដែរលើបញ្ហាប្រែប្រួលអាកាសធាតុ សន្តិសុខក្នុងតំបន់ និងកម្មវិធីអាវុធនុយក្លេអ៊ែររបស់ប្រទេសកូរ៉េខាងជើង។
លោក Biden បានបញ្ជាក់ថា៖ «ប្រទេសយើងទាំងពីរក៏មានឆន្ទៈរួមផងដែរនៅក្នុងការប្រឡូកផ្នែកការទូតជាមួយនឹងប្រទេសកូរ៉េខាងជើង ដើម្បីចាត់វិធានការផ្អែកលើហេតុផលជាក់ស្ដែង ដែលនឹងកាត់បន្ថយភាពតានតឹង នៅពេលដែលយើងឈានទៅរកគោលបំណងចុងក្រោយរបស់យើងនៅក្នុងការលុបបំបាត់អាវុធនុយក្លេអ៊ែរនៅលើឧបទ្វីបកូរ៉េ»។
លោក Moon បានច្រានចោលនូវគំនិតដែលថាមានការយល់ឃើញផ្សេងគ្នានូវភាពបន្ទាន់ ដោយលោកបានសង្កត់ធ្ងន់ថា ប្រទេសទាំងពីរមានគំនិតស្របគ្នាអំពីពេលវេលាសម្រាប់ការលុបបំបាត់អាវុធនុយក្លេអ៊ែរនៅលើឧបទ្វីបកូរ៉េ។
លោក Moon បានថ្លែងដូច្នេះថា៖ «រដ្ឋាភិបាលសហរដ្ឋអាមេរិកបានប្រកាសរួចស្រេចហើយអំពីគោលការណ៍នៃការចរចាជាមួយប្រទេសកូរ៉េខាងជើង។ គោលការណ៍នោះមានលក្ខណៈជាក់លាក់តាមក្បួនខ្នាតដែលអាចសម្រេចបានបណ្ដើរៗមួយជំហានម្ដងៗ និងអាចបត់បែនបាន»។
ប៉ុន្តែ អ្នកវិភាគនានាបាននិយាយថា ក្ដីរំពឹងនៅក្នុងការរារាំងមហិច្ឆតានុយក្លេអ៊ែររបស់មេដឹកនាំកូរ៉េខាងជើងលោក Kim Jong Un ហាក់ដូចជាមិនសូវមានពន្លឺអ្វីទាល់តែសោះ។
អ្នកស្រី Sue Mi Terry អ្នកស្រាវជ្រាវជាន់ខ្ពស់ផ្នែកកិច្ចការកូរ៉េនៃមជ្ឈមណ្ឌលសិក្សាយុទ្ធសាស្ត្រនិងកិច្ចការអន្តរជាតិ (CSIS) បាននិយាយថា៖ «ទាក់ទិននឹងបញ្ហាកូរ៉េខាងជើង យើងឃើញថា វាហាក់ដូចជាគ្មានសន្ទុះទាល់តែសោះ។ វាហាក់ដូចជាគ្មានដំណោះស្រាយណាមួយដែលអាចរំពឹងបាននោះឡើយ»។
លោក Moon អន្ទះសាចង់ធ្វើយ៉ាងណាបន្សល់ទុកនូវកេរដំណែលជាអ្នកបង្កើតសន្តិភាពជាមួយកូរ៉េខាងជើង មុនពេលលោកបញ្ចប់អាណត្តិជាប្រធានាធិបតីនៅឆ្នាំក្រោយ។
ប៉ុន្តែ អាវុធនុយក្លេអ៊ែរនិងឃ្លាំងស្តុកប្រេងឥន្ធនៈរបស់កូរ៉េខាងជើងមានលក្ខណៈជឿនលឿនទៅមុខ ទោះបីជាទំនាក់ទំនងការទូតដោយផ្ទាល់ធ្លាប់ធ្វើឡើងរវាងអតីតប្រធានាធិបតីសហរដ្ឋអាមេរិកលោក Donald Trump និងលោក Kim Jong Un ក៏ដោយ។
រដ្ឋបាលរបស់លោក Biden បានបញ្ជាក់ថា ខ្លួននឹងបន្តសម្រេចឲ្យបាននូវ «វិធានការជាក់លាក់តាមក្បួនខ្នាតដែលអាចសម្រេចបាន» ជាមួយនឹងកូរ៉េខាងជើង ប៉ុន្តែមិនបានផ្ដល់សេចក្ដីលម្អិតបន្ថែមនោះទេ។
លោក Scott Snyder ប្រធានកម្មវិធីគោលនយោបាយសហរដ្ឋអាមេរិកកូរ៉េនៃក្រុមប្រឹក្សាទំនាក់ទំនងបរទេស (Council on Foreign Relations) បាននិយាយថា៖ «រដ្ឋបាលរបស់លោក Biden ចង់ឲ្យខ្លួនមានលំហច្រើនតាមដែលអាចធ្វើបាន ដើម្បីទុកឱកាសសម្រាប់ការចរចាជាមួយនឹងកូរ៉េខាងជើងផង និងធ្វើយ៉ាងណាមិនឲ្យមានការអាម៉ាស់មុខផងក្នុងករណីដែលកូរ៉េខាងជើងងាកទៅរកការបង្កហេតុឡើងវិញ»។
លោក Biden បានថ្លែងអំណរគុណដល់ក្រុមហ៊ុននានារបស់ប្រទេសកូរ៉េខាងត្បូងសម្រាប់ការវិនិយោគជាង ២៥ ពាន់លានដុល្លារនៅក្នុងសហរដ្ឋអាមេរិក និងបានអរគុណរដ្ឋាភិបាលក្រុងសេអ៊ូលសម្រាប់ការគាំទ្រចំពោះកិច្ចប្រឹងប្រែងរបស់លោកនៅក្នុងការកសាងខ្សែសង្វាក់ផ្គត់ផ្គង់ឲ្យមានភាពធន់។
លោក Moon គឺជាមេដឹកនាំបរទេសទីពីរ ដែលលោក Biden បានទទួលជួបពិភាក្សាទល់មុខ តាំងពីពេលដែលលោក Biden បានឡើងកាន់តំណែងជាប្រធានាធិបតីសហរដ្ឋអាមេរិកមក។
មេដឹកនាំបរទេសទីមួយដែលលោក Biden បានទទួលជួបពិភាក្សាទល់មុខ គឺនាយករដ្ឋមន្ត្រីជប៉ុនលោក Yoshihide Suga។ លោកទាំងពីរបានជួបពិភាក្សាគ្នាកាលពីខែមេសា។
នេះគឺជាសញ្ញាបង្ហាញឲ្យឃើញអំពីការផ្ដោតរបស់រដ្ឋាភិបាលក្រុងវ៉ាស៊ីនតោនលើសម្ព័ន្ធមិត្តអាស៊ី ស្របពេលដែលកំពុងប្រឈមនឹងប្រទេសចិនដែលកំពុងតែមានឥទ្ធិពលកាន់តែកើនឡើង។
អ្នកស្រី Sue Mi Terry នៃមជ្ឈមណ្ឌល CSIS បាននិយាយថា៖ «បរិយាកាសគឺល្អខ្លាំងណាស់រវាងប្រទេសទាំងពីរ។ ពួកគេពិតជាចង់បង្ហាញឲ្យឃើញនូវភាពខ្លាំងក្លានៃទំនាក់ទំនងសម្ព័ន្ធភាពរបស់ពួកគេ»។
កាលពីថ្ងៃទី ២១ ខែឧសភានោះផងដែរ លោក Biden បានប្រគល់មេដាយកិត្តិយសជូនលោក Ralph Puckett Jr. ដែលជាវរសេនីយ៍ឯកចូលនិវត្តន៍នៃកងទ័ពជើងគោកសហរដ្ឋអាមេរិក សម្រាប់ភាពក្លាហានលេចធ្លោក្នុងសម័យសង្គ្រាមកូរ៉េ។ នេះគឺជាលើកដំបូងហើយដែលមេដឹកនាំបរទេសបានចូលរួមនៅក្នុងពិធីដូចនេះ៕
ប្រែសម្រួលដោយលោក ឈឹម សុមេធ
