មន្ត្រីយោធាសហរដ្ឋអាមេរិក និងមន្ត្រីយោធាកូរ៉េខាងត្បូងបានឯកភាពគ្នាលុបចោលការធ្វើសមយុទ្ធយោធារួមគ្នា ដែលគ្រោងនឹងធ្វើឡើងនៅខែសីហាខាងមុខនេះ។
អ្នកនាំពាក្យក្រសួងការពារជាតិអាមេរិកអ្នកស្រី Dana White បានបញ្ជាក់អះអាងអំពីវិធានការនេះកាលពីថ្ងៃចន្ទម្សិលមិញ។ ប៉ុន្តែ អ្នកស្រីបានបន្ថែមថា ការធ្វើសមយុទ្ធយោធានៅក្នុងមហាសមុទ្រប៉ាស៊ីហ្វិកជាមួយបណ្ដាប្រទេសផ្សេងទៀតនឹងនៅតែបន្តដដែល។
ប្រធានាធិបតីអាមេរិកលោក Donald Trump បានសន្យាថានឹងបញ្ចប់ការធ្វើសមយុទ្ធនេះ បន្ទាប់ពីលោកបានជួបប្រជុំជាប្រវត្តិសាស្ត្រជាមួយនឹងមេដឹកនាំកូរ៉េខាងជើងលោក Kim Jong Un កាលពីសប្ដាហ៍មុនមក។
កាលពីឆ្នាំមុន សមយុទ្ធដែលមានឈ្មោះថា «អ្នកការពារសេរីភាព Ulchi» នេះត្រូវបានធ្វើឡើងរយៈពេល ១១ ថ្ងៃនិងមានការចូលរួមពីទាហានអាមេរិក ១ ម៉ឺន ៧ ពាន់ ៥ រយនាក់ និងទាហានកូរ៉េខាងត្បូងជាង ៥ ម៉ឺននាក់ ក៏ដូចជាមានការចូលរួមពីទាហានមកពីប្រទេសអូស្ត្រាលី ចក្រភពអង់គ្លេស កាណាដា និងកូឡុំប៊ីផងដែរ។
ក្រសួងការពារជាតិកូរ៉េខាងត្បូងក៏បានចេញសេចក្ដីប្រកាសបញ្ជាក់ផងដែរថា៖ «ប្រទេសកូរ៉េខាងត្បូង និងសហរដ្ឋអាមេរិកបានឯកភាពគ្នាផ្អាកសកម្មភាពដែលត្រៀមរៀបចំឡើងទាំងអស់ទាក់ទិននឹងការធ្វើសមយុទ្ធយោធាអ្នកការពារសេរីភាព ដែលគ្រោងនឹងធ្វើឡើងនៅខែសីហាខាងមុខនេះ»។
កាលពីថ្ងៃអាទិត្យកន្លងទៅនេះ លោក Trump បានបញ្ជាក់នៅលើ Twitter ថា វាជាគំនិតរបស់លោកនៅក្នុងការលុបចោលការធ្វើសមយុទ្ធនេះ នៅពេលដែលរដ្ឋាភិបាលអាមេរិក និងរដ្ឋាភិបាលកូរ៉េខាងជើងកំពុងចរចាគ្នាដោយ «ស្មោះត្រង់» ដើម្បីអនុវត្តកិច្ចព្រមព្រៀងលុបបំបាត់អាវុធនុយក្លេអ៊ែរនៅឧបទ្វីបកូរ៉េដែលលោក និងលោក Kim Jong Un បានចុះហត្ថលេខានៅក្នុងប្រទេសសិង្ហបុរី៕
