ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាមេរិក កូរ៉េ​ខាងត្បូង និង​ជប៉ុន​សន្យា​ពង្រឹង​កិច្ច​សហប្រតិបត្តិការ​ដើម្បី​កម្លា​រារាំង​កូរ៉េ​ខាងជើង


អនុរដ្ឋមន្ត្រីការបរទេសជប៉ុនលោក Takeo Mori អនុ​រដ្ឋមន្ត្រី​ការបរទេស​សហរដ្ឋ​អាមេរិក​អ្នកស្រី Wendy Sherman និងអនុ​រដ្ឋមន្ត្រី​ការបរទេស​កូរ៉េ​ខាង​ត្បូង​លោក Cho Hyun-dong ចាប់ដៃបង្ហាញសាមគ្គីភាព នៅក្នុងកិច្ចប្រជុំរវាងប្រទេសទាំង ៣ នៅទីក្រុងតូក្យូ ប្រទេសជប៉ុន ថ្ងៃទី ២៦ ខែតុលា ឆ្នាំ២០២២។

សហរដ្ឋ​អាមេរិក ប្រទេស​កូរ៉េ​ខាង​ត្បូង និង​ប្រទេស​ជប៉ុន​ បាន​សន្យា​ពង្រឹង​កិច្ច​សហប្រតិបត្តិការ​និង​បង្កើន​វិធានការ​កម្លា​រារាំង​នានា មុន​ពេល​ប្រទេស​កូរ៉េ​ខាង​ជើង​អាច​ធ្វើ​ការ​សាកល្បង​អាវុធ​នុយក្លេអ៊ែរ​ណា​មួយ។

ការ​ប្ដេជ្ញាចិត្ត​នេះ​បាន​ធ្វើ​ឡើង​នៅ​ក្នុង​អំឡុង​ជំនួប​មួយ​នៅ​ថ្ងៃ​ពុធ​នេះ​ក្នុង​ទីក្រុង​តូក្យូ​នៃ​ប្រទេស​ជប៉ុន​រវាង​អនុ​រដ្ឋមន្ត្រី​ការបរទេស​នៃ​ប្រទេស​ទាំង ៣។

អនុ​រដ្ឋមន្ត្រី​ការបរទេស​កូរ៉េ​ខាង​ត្បូង​លោក Cho Hyun-dong បាន​និយាយ​ថា៖ «យើង​ឯកភាព​គ្នា​ថា ទំហំ​នៃ​ការ​ឆ្លើយតប​ដែល​មិន​អាច​ប្រៀប​បាន ​គឺ​ជា​ការ​ចាំបាច់ ប្រសិនបើ​ប្រទេស​កូរ៉េ​ខាងជើង​ជំរុញ​ទៅ​មុខ​នូវ​ការ​សាកល្បង​អាវុធ​នុយក្លេអ៊ែរ​លើក​ទី ៧ [របស់​ខ្លួន]»។

កាលពី​ថ្ងៃ​អង្គារ ប្រធានាធិបតី​កូរ៉េ​ខាង​ត្បូង​លោក Yoon Suk Yeol បាន​និយាយ​ថា រដ្ឋាភិបាល​កូរ៉េ​ខាងជើង​បាន​បញ្ចប់​ការ​រៀបចំ​សម្រាប់​ការ​សាកល្បង​អាវុធ​នុយក្លេអ៊ែរ ដែល​ការ​សាកល្បង​លើក​នេះ​នឹង​ក្លាយជា​ការ​សាកល្បង​លើក​ទី ៧ របស់​កូរ៉េ​ខាង​ជើង​តាំងពី​ឆ្នាំ ២០០៦ មក។

អនុ​រដ្ឋមន្ត្រី​ការបរទេស​ជប៉ុន​លោក Takeo Mori បាន​និយាយ​ថា៖ «ដោយសារតែ​អាច​មាន​ការ​បង្ក​ហេតុ​បន្ថែម​ទៀត [ពី​ប្រទេស​កូរ៉េ​ខាងជើង] ដែល​ក្នុង​នោះ​រួម​មាន​ទាំង​ការ​សាកល្បង​អាវុធ​នុយក្លេអ៊ែរ​ផង​ដែរ យើង​បាន​ឯកភាព​គ្នា​ថា … យើង​នឹង​ពង្រឹង​សមត្ថភាព​កម្លា​រារាំង​របស់​យើង​នៅ​ក្នុង​តំបន់ … ហើយ​ធ្វើការ​ជិតស្និទ្ធ​ជាមួយ​គ្នា​ ដោយ​ឈរ​លើ​ទស្សនៈ​នៃ​កិច្ច​ប្រឹងប្រែង​ការទូត»។

អនុ​រដ្ឋមន្ត្រី​ការបរទេស​សហរដ្ឋ​អាមេរិក​អ្នកស្រី Wendy Sherman បាន​ជំរុញ​ប្រទេស​កូរ៉េ​ខាង​ជើង​ឱ្យ «បញ្ឈប់​ការ​បង្ក​ហេតុ​បន្ថែម​ទៀត» និង​បាន​បញ្ជាក់​ថា សហរដ្ឋ​អាមេរិក​នៅតែ​តាំងចិត្ត​ធ្វើការ​ចរចា​ដោយ​គ្មាន​លក្ខខណ្ឌ​ទុក​ជា​មុន។

អ្នកស្រី Sherman ក៏​បាន​បញ្ជាក់​ឡើង​វិញ​ផង​ដែរ​អំពី​ការ​តាំងចិត្ត «យ៉ាង​រឹងមាំ​ដូច​ដែក» ដើម្បី​ការពារ​ប្រទេស​ជប៉ុន​និង​កូរ៉េ​ខាងត្បូង ដោយ​អ្នកស្រី​បាន​និយាយ​ថា ប្រទេស​ទាំង​នេះ «បាន​ច្របាច់​បញ្ចូល​គ្នា​យ៉ាង​ជាក់​ច្បាស់​ដោយសារ​ផល​ប្រយោជន៍​សន្តិសុខ​រួម»៕

XS
SM
MD
LG