ប្រទេសកូរ៉េខាងត្បូងបានបញ្ជាក់ថា ប្រទេសកូរ៉េខាងជើងបានបាញ់គ្រាប់ផ្លោងកាំភ្លើងធំជាច្រើនគ្រាប់ដែលធ្លាក់នៅជិតព្រំដែនសមុទ្ររវាងប្រទេសទាំងពីរកាលពីល្ងាចថ្ងៃអង្គារ គឺក្នុងពេលមួយថ្ងៃក្រោយមក បន្ទាប់ពីកូរ៉េខាងត្បូងបានចាប់ផ្ដើមធ្វើសមយុទ្ធយោធាប្រចាំឆ្នាំនៅក្នុងតំបន់។
ក្រុមនាយសេនាធិការកងទ័ពកូរ៉េខាងត្បូងបានបញ្ជាក់នៅក្នុងសេចក្ដីថ្លែងការណ៍មួយនៅថ្ងៃពុធនេះថា កូរ៉េខាងជើងបានបាញ់គ្រាប់ផ្លោងប្រហែល ១០០ គ្រាប់ចេញពីមាត់សមុទ្រខាងលិចរបស់ខ្លួន និងប្រហែល ១៥០ គ្រាប់ទៀតចេញពីមាត់សមុទ្រខាងកើតរបស់ខ្លួន។
រដ្ឋាភិបាលកូរ៉េខាងត្បូងបានលើកឡើងថា យោធាកូរ៉េខាងត្បូងបានផ្សាយសារជាច្រើនដងដោយស្នើឱ្យកូរ៉េខាងជើងបញ្ឈប់ការបាញ់នេះ។ គេមិនឃើញមានសេចក្ដីរាយការណ៍ណាមួយថាមានអំពើហិង្សាកើតឡើងរវាងប្រទេសទាំងពីរនោះទេ។
កូរ៉េខាងត្បូងថា គ្រាប់ផ្លោងទាំងនោះមិនបានធ្លាក់ចូលក្នុងដែនទឹករបស់ខ្លួននោះទេ ប៉ុន្តែបានធ្លាក់ចូលក្នុងតំបន់ទ្រនាប់ដែនសមុទ្រដែលប្រទេសកូរ៉េទាំងពីរបានបង្កើតឡើងនៅក្រោមកិច្ចព្រមព្រៀងអន្តរកូរ៉េឆ្នាំ ២០១៨ ដែលមានបំណងកាត់បន្ថយជម្លោះដោយផ្ទាល់។
នេះគឺជាលើកទីពីរហើយដែលប្រទេសកូរ៉េខាងជើងបានបាញ់គ្រាប់ផ្លោងចូលក្នុងតំបន់ទ្រនាប់ទាំងនេះតាំងពីថ្ងៃសុក្រសប្ដាហ៍មុនមក ដែលនៅពេលនោះប្រទេសនេះបានបាញ់គ្រាប់ផ្លោងរាប់រយគ្រាប់ចូលទៅទីនោះ។
កាលពីថ្ងៃចន្ទ យោធាកូរ៉េខាងត្បូងបានចាប់ផ្ដើមធ្វើសមយុទ្ធប្រចាំឆ្នាំរបស់ខ្លួនរយៈពេល ១២ ថ្ងៃ ដើម្បីពង្រឹងសមត្ថភាពប្រតិបត្តិការរបស់ខ្លួនឱ្យបានមុតស្រួចជាងមុន។ យោធាកូរ៉េខាងត្បូងបានបញ្ជាក់ថា ទាហានសហរដ្ឋអាមេរិកមួយចំនួនក៏កំពុងចូលរួមនៅក្នុងសមយុទ្ធនេះផងដែរ៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន Associated
