ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

បេសកជន​អាមេរិក កូរ៉េខាងត្បូង ​និង​ជប៉ុន ​ជួប​ប្រជុំ​គ្នា​ដើម្បី​ពិភាក្សា​ពី​ភាព​តានតឹង​នុយក្លេអ៊ែរ​របស់​កូរ៉េខាងជើង


បាតុករ​កាន់​បដា​ខណៈ​ប៉ូលិស​ឈរ​យាម​ក្នុង​អំឡុង​បាតុកម្ម​មួយ​នៅ​ខាង​ក្រៅ​ក្រសួង​ការបរទេស​កូរ៉េខាងត្បូង ជា​ទី​កន្លែង​ប្រជុំ​ត្រីភាគី​រវាង​អាមេរិក កូរ៉េខាងត្បូង​ និង​ជប៉ុន នៅ​ក្នុង​រដ្ឋធានី​សេអ៊ូល កាល​ពី​ថ្ងៃ​ទី​៣ ខែ​មិថុនា ឆ្នាំ​២០២២។

ក្រុម​មន្ត្រីសហរដ្ឋ​អាមេរិក កូរ៉េ​ខាង​ត្បូង​និង​ជប៉ុន​បាន​ជួប​ប្រជុំ​គ្នា​នៅ​ក្នុង​រដ្ឋធានី​សេអ៊ូល​នៃ​ប្រទេស​កូរ៉េ​ខាង​ត្បូង​នៅ​ថ្ងៃ​សុក្រ​នេះ ​ដើម្បី​ពិភាក្សា​អំពី​បញ្ហា​កូរ៉េ​ខាង​ជើង​នៅ​ពេល​មាន​សញ្ញា​ថា ប្រទេស​ឯកោ​មួយ​នេះ​កំពុង​ប្រុងប្រៀប​រៀបចំធ្វើ​ការ​សាកល្បង​អាវុធ​នុយក្លេអ៊ែរ​ជា​លើក​ទី១​ចាប់​តាំង​ពី​ឆ្នាំ២០១៧មក។ នេះ​បើ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន Reuters។

បេសកជន​ពិសេស​របស់​សហរដ្ឋ​អាមេរិក​លោក Sung Kim បាន​ជួប​សមភាគី​កូរ៉េ​ខាង​ត្បូង​និង​ជប៉ុន​របស់​លោក​គឺ​លោក Kim Gunn និង​លោក Funakoshi Takehiro បន្ទាប់​ពី​ការ​វាយ​តម្លៃ​របស់​សហរដ្ឋ​អាមេរិក​ថា កូរ៉េ​ខាង​ជើង​បាន​ប្រុងប្រៀប​រៀបចំ​ទីកន្លែង​សាកល្បង​អាវុធ​នុយក្លែអ៊ែររបស់​ខ្លួន​នៅ​តំបន់ Punggye-ri សម្រាប់​អ្វី​ដែល​នឹង​ក្លាយ​ជា​ការ​សាកល្បង​អាវុធ​នុយក្លេអ៊ែរ​លើក​ទី៧របស់​ខ្លួន​នោះ។

លោក Kim បាន​ថ្លែង​នៅ​ឯ​ការ​បើក​កិច្ចប្រជុំ​នោះ​ថា៖ «យើង​កំពុង​ប្រុងប្រៀប​រៀបចំ​អ្វីៗ​ដែល​អាច​មាន​ឡើង​នៅ​ក្នុង​ការសម្រប​សម្រួល​ដ៏​ជិតស្និទ្ធ​ជាមួយ​សម្ពន្ធមិត្ត​ជប៉ុន​និង​កូរ៉េ​ខាង​ត្បូង​របស់​យើង»។

នៅ​ឆ្នាំ​នេះ កូរ៉េ​ខាង​ជើង​បាន​សាកល្បង​កាំជ្រួច​បាល់លីស្ទិក​ជា​ច្រើន​ដង រួម​ទាំង​កាំជ្រួច​បាល់លីស្ទិក​អន្តរទ្វីប​ដ៏​ធំ​បំផុត​របស់​ខ្លួន​ ដែល​ជា​ការរំលោភ​ការ​ដាក់​ទណ្ឌកម្ម​របស់​អង្គការ​សហប្រជាជាតិ។

កាលពី​សប្តាហ៍​មុន សហរដ្ឋ​អាមេរិក​បាន​អំពាវនាវ​ឱ្យ​មាន​ការ​ដាក់​ទណ្ឌកម្ម​របស់​អង្គការ​សហប្រជាជាតិ​កាន់តែ​ច្រើន​ឡើង​ថែម​ទៀត​លើ​កូរ៉េ​ខាង​ជើង ​អំពី​ការ​បាញ់​បង្ហោះ​កាំជ្រួច​មីស៊ីល​បាល់លីស្ទិក​របស់​ខ្លួន ក៏ប៉ុន្តែ​ចិន​និង​រុស្ស៊ី​បាន​បោះឆ្នោត​វ៉េតូ​ប្រឆាំង​នឹង​សំណើ​នេះ​ដែល​បាន​ធ្វើ​ឱ្យ​មាន​ការ​បែកបាក់​នៅ​ក្នុង​ក្រុមប្រឹក្សា​សន្តិសុខ​អង្គការ​សហប្រជាជាតិ ​ស្តីពី​បញ្ហា​កូរ៉េ​ខាង​ជើង​លើកទី១ ចាប់តាំង​ពី​ក្រុមប្រឹក្សា​នេះ​បាន​ចាប់​ផ្តើម​ដាក់​ទណ្ឌកម្ម​លើ​កូរ៉េខាងជើង​ក្នុង​ឆ្នាំ២០០៦មក នៅ​ពេល​ដែល​កូរ៉េ​ខាង​ជើង​បាន​ធ្វើ​ការសាកល្បង​អាវុធ​នុយក្លេអ៊ែរ​លើក​ទី១របស់​ខ្លួន​នៅ​ពេល​នោះ។

លោក Funakoshi នៃ​ប្រទេស​ជប៉ុន​បាន​បញ្ជាក់​ពី​តម្រូវការ​នៃ​ការសម្រប​សម្រួល​គ្នា ដោយ​បាន​សន្យា«ធ្វើ​ឱ្យ​ប្រសើរ​ឡើង​ភាព​កំញ៉ើញ​នៅ​ក្នុង​តំបន់ រួម​ទាំង​កិច្ច​សហប្រតិបត្តិការ​សន្តិសុខ​ត្រីភាគី​ផង​ដែរ»។

ក្រុម​មន្ត្រី​ទាំង​នោះ​បាន​និយាយ​ថា ទ្វារ​សម្រាប់​ការ​សន្ទនា​ជា​មួយ​កូរ៉េខាងជើងបាន​បើក​ចំហរ​ហើយ​ពួកគេ​បាន​សម្តែង​នូវ​ក្តី​បារម្ភ​អំពី​ស្ថានភាព​ជំងឺ​កូវីដ១៩នៅ​ក្នុង​ប្រទេស​កូរ៉េ​ខាង​ជើង​ផង​ដែរ។

អនុ​រដ្ឋមន្ត្រី​ការបរទេស​សហរដ្ឋ​អាមេរិក​លោក​ស្រី Wendy Sherman បាន​និយាយក្នុង​ពេល​កន្លង​ទៅ​ថា សហរដ្ឋ​អាមេរិក​នឹង​មិន​ភ្ជាប់​បញ្ហាជំនួយ​មនុស្សធម៌​សម្រាប់កូរ៉េ​ខាង​ជើង​ស្តី​ពីការ​ប្រយុទ្ធ​ប្រឆាំង​ជំងឺ​កូវីដ១៩​របស់​គេ​ទៅ​នឹងបញ្ហា​អាវុធ​នុយក្លេអ៊ែរ​នោះ​ទេ៕

XS
SM
MD
LG