ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

សហរដ្ឋ​អាមេរិក​និង​ស្លូវេនីនឹង​ចុះ​ហត្ថលេខាលើ​សេចក្តី​ប្រកាស​រួមអំពី​បច្ចេកវិទ្យា 5G


នាយករដ្ឋមន្រ្តីស្លូវេនីលោក Janez Jansa ចាប់ដៃជាមួយរដ្ឋមន្រ្តីការបរទេសអាមេរិកលោក Mike Pompeo អំឡុងពេលជំនួបមួយ ក្នុងក្រុង Bled ប្រទេសស្លូវេនី កាលពីថ្ងៃទី១៣ ខែសីហា ឆ្នាំ២០២០។

រដ្ឋមន្ត្រី​ការបរទេស​សហរដ្ឋ​អាមេរិក​លោក​ Mike Pompeo ជួប​ជាមួយពួក​មេដឹកនាំ​ក្នុង​ប្រទេស​ស្លូវេនីនៅ​ថ្ងៃ​ព្រហស្បតិ៍នេះ ​ដែល​នៅ​ទីនោះ​ពួកគេ​មាន​គម្រោង​ចុះ​ហត្ថលេខាលើ​សេចក្តី​ប្រកាស​រួមអំពី​បច្ចេកវិទ្យា 5G។

ក្នុង​រយៈពេល​មួយ​ឆ្នាំ​កន្លង​មក​នេះ ប្រទេស​នានា​នៅ​ក្នុង​តំបន់​អឺរ៉ុប រួម​មាន​ប្រ​ទេស​ប៉ូឡូញ អេស្តូនី និង​សាធារណរដ្ឋ​ឆែក បាន​ចុះហត្ថលេខាលើ​កិច្ច​ព្រមព្រៀង​ជាមួយ​សហរដ្ឋ​អាមេរិក​ដោយ​បាន​សន្យា​ថា ក្រុមហ៊ុនផ្គត់ផ្គង់​បច្ចេកវិទ្យា 5G នឹង​មិន​ស្ថិត​នៅក្រោម​ការត្រួតត្រា​ដោយ​រដ្ឋាភិបាល​បរទេស​ណាមួយ​ដោយគ្មាន​ការពិនិត្យ​សើរើ​ពីតុលាការ​ឯករាជ្យ។ ការធ្វើ​បែប​នេះ​មានន័យ​ថា ​បណ្តា​ក្រុម​ហ៊ុន​ចិន​មិន​អាច​ផ្គត់​ផ្គង់​បច្ចេកវិទ្យា 5G បានទេ។

ដំណើរ​ទស្សនកិច្ច​របស់​លោក​រដ្ឋមន្ត្រី​ការបរទេស Pompeo ទៅកាន់​ប្រទេស​ស្លូវេនីជា​ដំណើរ​ទស្សនកិច្ច​លើក​ទី១ដោយ​រដ្ឋមន្ត្រី​ការបរទេស​សហរដ្ឋ​អាមេរិក​ចាប់តាំង​ពីឆ្នាំ ២០១១​មក។

គម្រោង​របស់​លោក​នៅ​ថ្ងៃ​ព្រហស្បតិ៍នេះរួមមាន​ ជំនួប​ជាមួយ​លោកនាយក​រដ្ឋមន្ត្រី​ Janez Jansa លោក​រដ្ឋមន្ត្រី​ការបរទេស Anze Logar និង​ប្រធានាធិបតី Borut Pahor នៃ​ប្រទេស​ស្លូវេនី។

ក្រសួង​ការបរទេស​សហរដ្ឋ​អាមេរិកបាន​ឲ្យ​ដឹង​ថា ប្រធានបទ​សំខាន់ៗ​ខ្លះ​នៅ​ក្នុង​ការចរចា​គឺបញ្ហាថាមពល​នុយក្លែអ៊ែរ ការដាក់​បញ្ចូល​តំបន់​បាល់កង់​ខាង​លិច​ និង​បញ្ហា​ថាមពល។

លោក​រដ្ឋមន្រ្តីការបរទេស Pompeo បាន​ស្ថិត​ក្នុង​សាធារណរដ្ឋ​ឆែក​កាលពី​ថ្ងៃពុធ​ ហើយ​បាន​និយាយ​នៅ​ទី​នោះថា មហា​អំណាច​សេដ្ឋកិច្ច​ចិន​ជា​ការ​គំរាម​កំហែង​ក្នុង​សាកល​លោកខ្លាំង​ឡើង​ជាង​សហភាព​សូវៀត​ក្នុង​សម័យ​សង្គ្រាម​ត្រជាក់​ទៀត៕

XS
SM
MD
LG