សមាជិកព្រឹទ្ធសភាសហរដ្ឋអាមេរិករបស់គណបក្សទាំងពីរ កាលពីថ្ងៃអង្គារបានផ្តល់ការយល់ព្រមជាឯកឆន្ទដល់ការសម្រេចរបស់រដ្ឋបាលប្រធានាធិបតី ដូណាល់ ត្រាំ ដើម្បីបញ្ឈប់ការផ្តល់ឧបករណ៍យន្តហោះចម្បាំងធុន F-35 ដល់ប្រទេសតួកគី ដោយថា ការសម្រេចចិត្តរបស់រដ្ឋាភិបាលតួកគី ដើម្បីទិញប្រព័ន្ធការពារកាំជ្រួចបាញ់ពីដីទៅអាកាស អាចជាវិធានការលើកទីមួយដើម្បីរារាំងតួកគី មិនឲ្យទទួលបានយន្តហោះចម្បាំងទំនើបនោះ។
លោក James Inhofe សមាជិកព្រឹទ្ធសភាខាងគណបក្សសាធារណរដ្ឋមកពីរដ្ឋ Oklahoma និងជាប្រធានគណៈកម្មាធិការសេវាកម្មអាវុធរបស់ព្រឹទ្ធសភា បាននិយាយថា៖ «ប្រសិនបើ តួកគី ជម្នះទិញប្រព័ន្ធកាំជ្រួចរបស់រុស្ស៊ី នោះវាគ្មានផ្លូវ ដែលយើងអាចធ្វើការបណ្តុះបណ្តាលយន្តហោះចម្បាំងធុន F-35 ដល់ពួកគេ ហើយនិងការតាំងចិត្តរបស់យើង ដើម្បីប្រគល់យន្តហោះចំបាំងប្រភេទ F-35 ពីរគ្រឿងដល់ពួកគេទេ»។
លោក Joe Manchin សមាជិកព្រឹទ្ធសភាខាងគណបក្សប្រជាធិបតេយ្យមកពីរដ្ឋ West Virginia ដែលបានបម្រើនៅក្នុងគណៈកម្មការនោះដែរ បាននិយាយថា៖ «យន្តហោះចំបាំងធុន F-35 របស់អាមេរិក និងប្រព័ន្ធកាំជ្រួចរបស់រុស្ស៊ីមិនអាចនៅជាមួយគ្នាបានទេ»។
សមាជិកព្រឹទ្ធសភាទាំងពីរ បាននិយាយជាមួយ VOA ភ្លាមៗ មុនពេលគណៈកម្មាធិការបានឮឈ្មោះឧត្តមសេនីយ៍កងទ័ពអាកាសលោក Tod Wolters ជាអ្នកដែលបានទទួលការតែងតាំងពីប្រធានាធិបតីត្រាំជាមេបញ្ជាការសម្ព័ន្ធមិត្តរបស់អង្គការអូតង់។
កាលពីសប្តាហ៍មុន រដ្ឋមន្រ្តីការបរទេសតួកគី បានបញ្ជាក់ឡើងវិញពីការតាំងចិត្តរបស់ប្រទេសលោក ដើម្បីដោះស្រាយជាមួយរដ្ឋាភិបាលក្រុងម៉ូស្គូ ដើម្បីទិញប្រព័ន្ធកាំជ្រួច S-400 ដែលជាប្រព័ន្ធកាំជ្រួចមួយដែលរដ្ឋាភិបាលក្រុងវ៉ាស៊ីនតោន ជឿថា អាចធ្វើឲ្យគ្រោះថ្នាក់យន្តហោះចំបាំងធុន F-35៕
