ព្រឹទ្ធសភាសហរដ្ឋអាមេរិក កាលពីថ្ងៃព្រហស្បតិ៍បានច្រានចោលសំណើអំពីអន្តោប្រវេសន៍ទាំងបួនដែលខ្លួនបានពិចារណា ដោយមានការពិភាក្សាគ្នាមួយសប្តាហ៍ដើម្បីរកដំណោះស្រាយខាងផ្លូវច្បាប់សម្រាប់ក្រុមជនអន្តោប្រវេសន៍វ័យក្មេងគ្មានឯកសារ។ ក្រុមជនអន្តោប្រវេសន៍នេះ អាចប្រឈមការបញ្ជូនត្រឡប់ទៅកាន់ប្រទេសពួកគេវិញ ដោយចាប់ផ្តើមពីថ្ងៃទី៥ ខែមីនាតទៅ។
សំណើពីររបស់គណបក្សទាំងពីរដែលមិនអាចទទួលបានការគាំទ្រក្នុងព្រឹទ្ធសភាស.រ.អា.បាននោះគឺទី១ មាគ៌ាមួយសម្រាប់ឱ្យពួកជនអន្តោប្រវេសន៍វ័យក្មេងទទួលសញ្ជាតិអាមេរិកាំង និងបង្កើនសន្តិសុខព្រំដែនស.រ.អា. ផែនការអន្តោប្រវេសន៍របស់ប្រធានាធិបតី ដូណាល់ ត្រាំ។ សំណើទី២ ដែលបរាជ័យដែរនោះគឺវិធានការមួយសម្រាប់បង្ក្រាបទីក្រុងទាំងឡាយណាដែលមិនធ្វើសហប្រតិបត្តិការជាមួយអាជ្ញាធរអន្តោប្រវេសន៍សហព័ន្ធ។
ផែនការរបស់ លោក ត្រាំ បានទទួលសំឡេងឆ្នោតគាំត្រតិចជាងគេបំផុតដោយមានឆ្នោតគាំទ្រតែ ៣៩ក្នុងព្រឹទ្ធសភាស.រ.អា.ដែលមានសមាជិក១០០នាក់។
កាលពីយប់ថ្ងៃព្រហស្បតិ៍ សេតវិមានបានចេញផ្សាយសេចក្តីថ្លែងការណ៍មួយនិយាយថា ពួកប្រជាធិបតេយ្យនៅក្នុងព្រឹទ្ធសភាបាន«ប្រឆាំងតវ៉ានឹងសំណើច្បាប់មួយក្នុងសភាដែលមានមាគារមួយប្រកបដោយសប្បុរសធម៌ទៅកាន់ការទទួលសញ្ជាតិអាមេរិកាំង ពីព្រោះសំណើនេះក៏មានការកែទម្រង់ដែលធ្វើឱ្យព្រំដែនយើងនិងប្រព័ន្ធអន្តោប្រវេសន៍របស់យើងមានសន្តិសុខ»៕
