ព្រឹទ្ធសភាសហរដ្ឋអាមរិកបានអនុម័តឲ្យលោក Antony Blinken ក្លាយជារដ្ឋមន្ត្រីក្រសួងការបរទេសកាលពីថ្ងៃអង្គារ ដែលការណ៍នេះបានត្រួសត្រាយផ្លូវឲ្យរដ្ឋបាលលោកប្រធានាធិបតី Bidenផ្លាស់ប្ដូរបន្តិចម្តងៗនូវគោលនយោបាយឯកានិយមរបស់លោកអតីតប្រធានាធិបតី Donald Trump។
លោក Blinken ត្រូវបានអនុម័តក្នុងសំឡេង ៧២ ទល់នឹង ២២ ដើម្បីកាន់តំណែងជារដ្ឋមន្ត្រីក្រសួងការបរទេសទី៧១ របស់សហរដ្ឋអាមេរិក ជាតំណែងខ្ពស់បំផុតក្នុងជួរគណ:រដ្ឋមន្ត្រី និងស្ថិតក្នុងលំដាប់លេខរៀងទី៤ ក្នុងការស្នងតំណែងប្រធានាធិបតី។
នៅក្នុងការសវនការអនុម័តមុខតំណែងនេះ កាលពីសប្ដាហ៍មុន លោក Blinken បាននិយាយថា លោកត្រៀមខ្លួនរួចរាល់ដើម្បីប្រឈមមុខនឹងបញ្ហាប្រឈមនានា ដែលបង្កឡើងដោយប្រទេសចិន អ៊ីរ៉ង់ រុស្ស៊ី និងកូរ៉េខាងជើង។
លោកបាននិយាយថា ប្រទេសចិនបង្កបញ្ហាធ្ងន់ធរដល់ផលប្រយោជន៍សហរដ្ឋអាមេរិក ប៉ុន្តែបានកត់សម្គាល់ថា នៅមានផ្លូវសម្រាប់កិច្ចសហប្រតិបត្តិការ [ជាមួយប្រទេសចិន]។
លោកបាននិយាយថា៖ «មានការប្រជែងជាសត្រូវគ្នាកាន់តែខ្លាំងឡើងក្នុងទំនាក់ទំនងប្រទេសទំាងពីរ ច្បាស់ណាស់វាជាទិដ្ឋភាពនៃការប្រកួតប្រជែង តែក៏មានកិច្ចសហប្រតិបត្តិការខ្លះដែរ នៅពេលវាជារឿងប្រយោជន៍រួម។
លោក Blinken ក៏បានប្ដេជ្ញាថានឹងជំរុញទឹកចិត្តការងារឡើងវិញនៅក្រសួងការបរទេសនិងស្ថាប័នការទូតអាមេរិក។ លោក Blinken បាននិយាយថា លោកយល់ឃើញថា មុខមាត់របស់សហរដ្ឋអាមេរិកលើឆាកអន្តរជាតិ គឺផ្អែកលើភាពជាមេដឹកនាំ ដែលមាន«ការដាក់ខ្លួន និងភាពជឿជាក់លើខ្លួនឯង»៕
