សហរដ្ឋអាមេរិកនឹងស្វះស្វែងរកចំណាត់ការសមរម្យនៅក្នុងក្រុមប្រឹក្សាសន្តិសុខរបស់អង្គការសហប្រជាជាតិ ក្នុងរយៈពេលប៉ុន្មានថ្ងៃខាងមុខទៀតប្រឆាំងនឹងប្រទេសអ៊ីរ៉ង់ចំពោះការបាញ់បង្ហោះកាំជ្រួចមីស៊ីបាល់លីស្ទិចនៅដើមសប្តាហ៍នេះ។
លោកស្រី Samantha Power ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិបានប្រាប់ VOA កាលពីថ្ងៃសុក្រថា ៖
«យើងត្រូវតែពិនិត្យមើលទៅលើការពិត ហើយឥឡូវនេះវាបានបង្ហាញថាការបាញ់បង្ហោះកាំជ្រួចមីស៊ីលដែលអ៊ីរ៉ង់បានធ្វើឡើងបានរំលោភសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ ដូច្នេះយើងនឹងយកបញ្ហានេះទៅកាន់ក្រុមប្រឹក្សាសន្តិសុខរបស់អង្គការសហប្រជា ជាតិហើយនិងចាត់វិធានការដ៏សមរម្យ ហើយយើងក៏កំពុងពិនិត្យមើលបញ្ហាផ្សេងៗទៀតជាទ្វេភាគីដែលយើងអាចធ្វើដែរ។
កាលពីថ្ងៃពុធ លោកស្រីឯកអគ្គរដ្ឋទូត Power បានមានប្រសាសន៍ថា រដ្ឋាភិបាល ទីក្រុងវ៉ាស៊ីនតោន បានពិនិត្យមើលគ្រប់លទ្ធភាពដែលអ៊ីរ៉ង់បានរំលោភសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិចំពោះការបាញ់បង្ហោះកាំជ្រួចនេះ។
លោកស្រីឯកអគ្គរដ្ឋទូត បានមានប្រសាសន៍ទៀតថា ការបញ្ជាក់ពីការបាញ់បង្ហោះកាំជ្រួចមីស៊ីល Ballistic វង់ប្រតិបត្តិការមធ្យម ដែលមានលទ្ធភាពផ្ទុកក្បាលនុយក្លេអ៊ែកាលពីថ្ងៃទី១០ ខែតុលា ជាការរំលោភយ៉ាងច្បាស់នូវសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិលេខ១៩២៩ ដែលបានអនុម័តកាលពី៥ឆ្នាំមុន ដែលហាមឃាត់សកម្មភាពបែបនេះ។
លោកស្រីឯកអគ្គរដ្ឋទូត Power បានប្រសាសន៍ទៀតថា សហរដ្ឋអាមេរិកកំពុងប្រុងប្រៀបរៀបចំរបាយការណ៍ស្តីពីឧបទ្ទវេហតុនេះ ដើម្បីដាក់ជូនគណៈកម្មាធិការដាក់ទណ្ឌកម្មអ៊ីរ៉ង់របស់ក្រុមប្រឹក្សាសន្តិសុខអង្គការសហប្រជាជាតិ ហើយក៏នឹងលើកឡើងបញ្ហានេះដោយផ្ទាល់ជាមួយសមាជិកក្រុមប្រឹក្សាសន្តិសុខអង្គការសហប្រជាជាតិ៕
