ភ្នំពេញ — នៅក្រៅកិច្ចប្រជុំកំពូលអាមេរិកអាស៊ានកាលពីពេលកន្លងទៅថ្មីៗនេះ សហរដ្ឋអាមេរិកស្នើឱ្យរដ្ឋាភិបាលកម្ពុជារបស់លោកនាយករដ្ឋមន្ត្រី ហ៊ុន សែន ពិចារណាទម្លាក់បទចោទប្រកាន់ប្រឆាំងនឹងអ្នកនយោបាយគណបក្សជំទាស់។
នៅក្នុងសេចក្តីប្រកាសព័ត៌មានរបស់ក្រសួងការបរទេសសហរដ្ឋអាមេរិក ចុះកាលពីថ្ងៃទី ១៤ ខែឧសភា អ្នកនាំពាក្យក្រសួងការបរទេសអាមេរិកលោក Ned Price បានលើកឡើងថា នៅក្នុងជំនួបថ្នាក់រដ្ឋមន្រ្តីការបរទេសខាងក្រៅកិច្ចប្រជុំកំពូលអាមេរិក-អាស៊ាន រដ្ឋមន្រ្តីការបរទេសអាមេរិកលោក Antony Blinken បានជំរុញឱ្យរដ្ឋាភិបាលកម្ពុជាទម្លាក់ចោលបទចោទប្រកាន់ដែលត្រូវបានជំរុញពីក្រោយដោយហេតុផលនយោបាយប្រឆាំងនឹងអ្នកនយោបាយគណបក្សប្រឆាំង និងអនុញ្ញាតឱ្យពួកគេចូលរួមដោយសេរីនៅក្នុងការបោះឆ្នោតនាពេលខាងមុខ។
បន្ថែមពីលើនេះ សេចក្តីថ្លែងការណ៍បានបន្តថា ក្នុងជំនួបជាមួយរដ្ឋមន្រ្តីការបទេសកម្ពុជាលោក ប្រាក់ សុខុន រដ្ឋមន្រ្តីការបរទេសអាមេរិកលោក Blinken ក៏បានបង្ហាញការព្រួយបារម្ភពីការរឹតត្បិតសិទ្ធិមនុស្ស និងសេរីភាពមូលដ្ឋាននៅកម្ពុជាផងដែរ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានឱ្យដឹងថា សំណើរបស់រដ្ឋាភិបាលអាមេរិកអាចសម្រេចទៅបាន ឬមិនបាននោះ គឺអាស្រ័យលើនយោបាយរបស់រដ្ឋាភិបាលកម្ពុជា។
ប៉ុន្តែលោកជឿថា កម្ពុជាអាចប្រឈមគំនាបបន្ថែមលើផ្នែកពាណិជ្ជកម្ម ឬទណ្ឌកម្មផ្សេងៗ ប្រសិនបើត្រូវបានរកឃើញថា មិនមានការជឿនលឿនណាមួយចំពោះចំណុចផ្សេងៗដែលបស្ចិមលោកបានបង្ហាញការព្រួយបារម្ភ។
លោកនិយាយថា៖ «ក៏ប៉ុន្តែគ្រាន់ថា អ្វីដែលជាបញ្ហា ប្រសិនបើមានការស្នើសុំបែបហ្នឹងហើយ យើងអត់មានការអនុវត្តតាម បញ្ហាគឺអាចនឹងមានរងការដាក់សម្ពាធផ្សេងៗពីខាងសហរដ្ឋអាមេរិកទៀតដែរ»។
លោក ស៊ឹង សែនករុណា ក៏បានសង្កត់ធ្ងន់ផងដែរថា កន្លងមក រដ្ឋាភិបាលកម្ពុជាមិនបានផ្តោតច្រើនលើការកែទម្រង់ផ្សេងៗ បន្ទាប់ពីមានការស្នើសុំពីសហរដ្ឋអាមេរិក ឬប្រទេសនៅលោកសេរីនោះទេ ហើយជាទូទៅ គឺតែងតែមិនអើពើ ឬធ្វើការច្រានចោលរាល់សំណើនោះ។
កាលពីថ្ងៃសុក្រ ទី ១៣ ខែឧសភា រដ្ឋមន្ត្រីការបរទេសសហរដ្ឋអាមេរិក លោក Antony Blinken បានជួបពិភាក្សាជាមួយរដ្ឋមន្ត្រីការបរទេសកម្ពុជាលោក ប្រាក់ សុខុន ក្នុងរដ្ឋធានីវ៉ាស៊ីនតោន ទីមានការជួបពិភាក្សាគ្នាជាលើកដំបូង និងជាប្រវត្តិសាស្ត្ររវាងក្រុមមេដឹកនាំសហរដ្ឋអាមេរិក និងក្រុមមេដឹកនាំប្រទេសជាសមាជិកអាស៊ាន អំឡុងពេលអាមេរិករៀបចំកិច្ចប្រជុំកំពូលពិសេសអាមេរិក-អាស៊ាន ឆ្នាំ ២០២២។
អ្នកវិភាគនយោបាយលោក សេង សារី បានថ្លែងថា សហរដ្ឋអាមេរិកតែងតែជំរុញឱ្យអ្នកនយោបាយ ដែលមាននិន្នាការផ្ទុយពីគណបក្សកាន់អំណាច ទទួលបានឱកាសនិងសិទ្ធិសេរីភាពពេញលេញ នៅក្នុងការចូលរួមប្រកួតប្រជែងផ្នែកនយោបាយ។
លោកបានបន្តថា ស្របពេលដូចគ្នានេះដែរ លោកសង្កេតឃើញមានសញ្ញាសន្សឹមៗនៃការផ្សះផ្សាគ្នារវាងអ្នកនយោបាយនៅកម្ពុជា ឆ្ពោះទៅរកដំណោះស្រាយជម្លោះនយោបាយដែលកំពុងជាប់គាំងនៅកម្ពុជា។
លោកបាននិយាយថា៖ «អ្វីដែលសំខាន់នោះគឺ ពីលោកនាយករដ្ឋមន្រ្តីផ្ទាល់ ក៏បានបង្ហាញនូវសារវិជ្ជមានមួយចំនួនដែលហាក់ដូចជា ផ្តល់[សញ្ញា]នៅក្នុងការចង់ឱ្យមានដំណោះស្រាយនយោបាយ។ ដូច្នេះ ស្ថានភាពលោក កឹម សុខា គឺនឹង ប្រសើរឡើង ដោយសារលោកនាយករដ្ឋមន្រ្តី ក្នុងនាមប្រធានអំណាចប្រតិបត្តិហ្នឹង ហាក់ដូចជា ផ្តល់នូវឱកាសឱ្យ លោក កឹម សុខា ចេញសួរសុខទុក្ខកូន ចៅ និងព្យាបាលជំងឺនៅក្រៅប្រទេសអីជាដើម»។
លោកបានបន្តថា៖ «លោកនាយករដ្ឋមន្រ្តីផ្ទាល់ក៏ហាក់ដូចជា ផ្តល់នូវសញ្ញាណសម្រាប់លោក សម រង្ស៊ី នៅក្នុងការបើកភ្លើងខៀវនៅក្នុងច្រកសម្រាប់ត្រឡប់ទៅកម្ពុជាវិញ។ ក៏ប៉ុន្តែកាលៈទេសៈបានហួសមួយដំណាក់កាលទៅហើយ។ ហើយខ្ញុំសង្ឃឹមថា នឹងមានការប្រែប្រួល»។
អ្នកនាំពាក្យក្រសួងយុត្តិធម៌លោក ជិន ម៉ាលីន បានប្រាប់វីអូអេតាមប្រព័ន្ធផ្ញើសារតេឡេក្រាមថា ការស្នើសុំពីមន្រ្តីជាន់ខ្ពស់រដ្ឋាភិបាលអាមេរិកគឺជា «រឿងធម្មតាមួយ» ហើយមិនអាច «ជ្រៀតជ្រែកលើកិច្ចការផ្ទៃក្នុង និងរំលោភបំពានលើអធិបតេយ្យ និងច្បាប់ជាតិ» របស់កម្ពុជានោះទេ។
លោកបានថ្លែងថា៖ «ការអំពាវនាវរបស់គាត់គឺជារឿងធម្មតា គឺជាការអំពាវនាវដែលមានចរិតការទូត តាមបែបបទការទូត។ ក៏ប៉ុន្តែអ្វីៗត្រូវអនុវត្តតាមច្បាប់។ អញ្ចឹងកម្ពុជាគឺ គ្មានអីដែលត្រូវផ្អែកទៅលើច្បាប់ និងនីតិវិធីច្បាប់របស់កម្ពុជានោះទេ»។
គួររំឭកផងដែរ ក្នុងជំនួបដោយឡែកមួយទៀតជាមួយនឹងរដ្ឋមន្ត្រីការបរទេសកម្ពុជាលោក ប្រាក់ សុខុន នៅរដ្ឋធានីវ៉ាស៊ីនតោនកាលពីថ្ងៃទី ១១ ខែឧសភា អនុរដ្ឋមន្ត្រីការបរទេសសហរដ្ឋអាមេរិកលោកស្រី Wendy Sherman បានលើកឡើងអំពីការបារម្ភ ពាក់ព័ន្ធនឹងសិទ្ធិសេរីភាពជាមូលដ្ឋាននៅកម្ពុជា ក្នុងនោះក៏មានការលើកឡើងពាក់ព័ន្ធនឹងបទចោទប្រកាន់លើមេដឹកនាំនយោបាយគណបក្សជំទាស់លោក កឹម សុខា ផងដែរ។ នេះបើតាមសេចក្តីប្រកាសព័ត៌មានដាច់ដោយឡែកមួយទៀតរបស់ក្រសួងការបរទេសសហរដ្ឋអាមេរិក។
ដំណាលគ្នានេះដែរ អំឡុងពេលមានវត្តមាននៅរដ្ឋធានីវ៉ាស៊ីនតោន លោកនាយរកដ្ឋមន្រ្តី ហ៊ុន សែន បានប្រាប់ក្រុមមន្ត្រីកម្ពុជា និងពលរដ្ឋខ្មែររស់នៅសហរដ្ឋអាមេរិក និងប្រទេសកាណាដាក្នុងជំនួបមួយថា លោកមិនបានចោទថា អាមេរិកមានការជាប់ពាក់ព័ន្ធក្នុងសំណុំរឿងក្បត់ជាតិរបស់លោក កឹម សុខា ទេ ប៉ុន្តែគឺ លោក កឹម សុខា ទេ ជាអ្នកនិយាយខ្លួនគាត់។ ដូច្នេះលោកថា លោក កឹម សុខា ត្រូវដោះស្រាយជាមួយសហរដ្ឋអាមេរិក៕
