រដ្ឋមន្ត្រីការបរទេសអាមេរិកលោក Antony Blinken បាននិយាយថា ការផ្លាស់ប្តូរណាមួយក្នុងការដាក់ទណ្ឌកម្មប្រឆាំងនឹងប្រទេសវ៉េណេស៊ុយអេឡា អាចកើតមានឡើងបានលុះត្រាតែមានឆ្លើយតបដោយជំហរស្ថាបនាមួយចំនួន ដោយរបបលោក Maduro ដើម្បីស្តារឡើងវិញនូវលទ្ធិប្រជាធិបតេយ្យនៅក្នុងប្រទេសនេះ។
ថ្លែងទៅកាន់ក្រុមអ្នកសារព័ត៌មាននៅក្រៅជំនួបកិច្ចប្រជុំនៃអង្គការបណ្តាប្រទេសនៅទ្វីបអាមេរិក (OAS) ក្នុងរដ្ឋធានីលីម៉ា ប្រទេសប៉េរូនៅថ្ងៃព្រហស្បតិ៍ម្សិលមិញ ប្រមុខការទូតអាមេរិករូបនេះនិយាយថា៖ «គោលនយោបាយឬរបៀបទាក់ទងរបស់យើងចំពោះប្រទេសវ៉េណេស៊ុយអេឡា មិនមានការផ្លាស់ប្តូរអ្វីនោះឡើយ»។
ចម្លើយរបស់លោក Blinken ត្រូវបានធ្វើឡើងជាការឆ្លើយតបទៅនឹងសំណួរមួយអំពីសេចក្តីរាយការណ៍ព័ត៌មាននានា ដែលថា សហរដ្ឋអាមេរិកកំពុងត្រៀមខ្លួន ដើម្បីអនុញ្ញាតឱ្យក្រុមហ៊ុនប្រេងអាមេរិក Chevron Oil បន្តប្រតិបត្តិការរបស់ខ្លួនឡើងវិញនៅក្នុងប្រទេសវ៉េណេស៊ុយអេឡា។
សហរដ្ឋអាមេរិកនិងប្រទេសជាច្រើនទៀត បានដាក់ទណ្ឌកម្មសេដ្ឋកិច្ចនិងប្រេងទៅលើវ៉េណេស៊ុយអេឡាក្នុងឆ្នាំ២០១៩ បន្ទាប់ពីគេបានទទួលស្គាល់មេដឹកនាំគណបក្សប្រឆាំង គឺលោក Juan Guaido ថាជាប្រធានាធិបតីរបស់ប្រទេសនេះ មិនមែនលោក Nicolas Maduro នោះឡើយ។
លោក Blinken បាននិយាយថា សហរដ្ឋអាមេរិកមានភាពច្បាស់លាស់ដែលថា ខ្លួននឹងសើរើពិនិត្យឡើងវិញទៅលើគោលនយោបាយទណ្ឌកម្មរបស់ខ្លួន «ក្នុងការឆ្លើយតបចំពោះជំហរស្ថាបនាទាំងឡាយ ដោយរបបលោក Maduro ឆ្ពោះទៅកាន់ការបោះឆ្នោតដោយសេរីនិងយុត្តិធម៌»។
លោក Blinken ក៏បានបន្ថែមផងដែរថា លោក Maduro ត្រូវតែធ្វើសកម្មភាពក្នុង«ការបញ្ឈប់ការឈឺចាប់ដល់ប្រជាពលរដ្ឋវ៉េណេស៊ុយអេឡា ដែលជាជនរងគ្រោះទី១នៃគោលនយោបាយរបស់របបនេះ»។
កាលពីចុងសប្តាហ៍កន្លងទៅវ៉េណេស៊ុយអេឡានិងសហរដ្ឋអាមេរិក បានធ្វើការដោះដូរអ្នកទោសទៅវិញទៅមក ដោយក្នុងនោះវ៉េណេស៊ុយអេឡា បានដោះលែងអ្នកទោសអាមេរិកចំនួន៧នាក់ ខណៈអាមេរិកដោះលែងក្មួយប្រុស២នាក់របស់ភរិយាលោក Maduro ដែលត្រូវបានកាត់ទោសឱ្យជាប់ពន្ធនាគារក្នុងសហរដ្ឋអាមេរិក ដោយការរត់ពន្ធគ្រឿងញៀន៕
រដ្ឋមន្ត្រីការបរទេសអាមេរិក៖ មិនមានការផ្លាស់ប្តូរទណ្ឌកម្មលើវ៉េណេស៊ុយអេឡាទេ
