ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

​ស.រ.អា.​​ថា​ខ្លួន​ដឹង​អត្តសញ្ញាណ​ពិត​ប្រាកដ​នៃ​មេដឹកនាំ​ថ្មី​របស់​ពួក​រដ្ឋ​ឥស្លាម


រូបឯកសារ៖ ប្រធានាធិបតី ដូណាល់ ត្រាំ បង្ហាញ​ផែន​ទី​ប្រទេស​ស៊ីរី​និង​អ៊ីរ៉ាក់​ និង​បង្ហាញ​វត្តមាន​​ពួក​រដ្ឋ​ឥស្លាម​នៅ​ឆ្នាំ២០១៧ និង​ឆ្នាំ​២០១៩ នៅ​ពេល​លោក​ថ្លែង​ទៅ​កាន់​អ្នក​កាសែត​​កាល​ពី​ខែ​មីនា ២០១៩។

ក្នុង​ពេល​តែ​មួយ​ថ្ងៃក្រោយ​ពី​ពួកភេវជន​រដ្ឋ​ឥស្លាម​ បាន​លាត​ត្រដាង​ឱ្យ​ដឹង​ឈ្មោះ​មេដឹក​នាំ​ថ្មី​របស់ខ្លួន ​លោក​ប្រធានាធិបតី​ស.រ.អា.​និយាយ​ថា​ លោក​ស្គាល់​អត្តសញ្ញាណ​ពិត​ប្រាកដ​របស់​បុរស​នេះ​ហើយ។

លោក​ប្រធានាធិបតី​បាន​សរសេរ​នៅ​លើ​ Twitter​ កាល​ពី​ថ្ងៃ​សុក្រ​ថា​ «យើង​ដឹង​គាត់​ជា​នរណា​ពិត​ប្រាកដ​ហើយ« ដោយ​លោក​មិន​បាន​ថ្លែង​ល្អិត​ល្អន់​ទេ។

សារ​ជា​សំឡេង​មួយ​ចែក​ចាយ​តាម​រយៈ​បណ្តាញ​ព័ត៌មាន​សង្គម​កាល​ពី​ថ្ងៃ​ព្រហស្បតិ៍​ដោយ​ទី​ភ្នាក់ងារ​ព័ត៌មាន​ Amaq ​របស់​ពួក​រដ្ឋ​ឥស្លាម​ បាន​ហៅ​ឈ្មោះ​មេដឹក​នាំ​ថ្មី​នេះ​តាម​រហស្សនាម​ Abu Ibrahim al-Hashimi al-Qurashi ។

បើ​តាម​ពួក​អ្នកវិភាគ​ថា ​ឈ្មោះ​នេះ​បញ្ជាក់​ថា​មេដឹកនាំ​ថ្មី​នេះ​ជា​អ្នក​បន្ត​ពូជ​ពង្ស​ពីក្រុម​ Hashermite ​នៃ​ពួក​កុលសម្ព័ន្ធ ​Qurashi ​ដែល​មាន​ន័យ​ថា​ មេដឹក​នាំ​ថ្មី​នេះ​ជា​អ្នក​បន្តពូជ​ពង្ស​ពី​ពួក​កុល​សម្ព័ន្ធ​ដូច​គ្នា​នឹង​ព្យាការី​ Muhammed ​ដែល​ជា​ការ​តម្រូវ​មួយ​ដោយ​ពួក​រដ្ឋ​ឥស្លាម​សម្រាប់​ជន​ដែល​អាច​ក្លាយ​ទៅ​ជា​អ្នក​ស្នង​របស់​ Muhammed។

បើ​តាម​ការ​បកប្រែ​ភាសា​ដោយ​ក្រុម​ស៊ើប​ការ​សម្ងាត់ ​SITE​ បាន​ឲ្យ​ដឹង​ថា​ សេចក្តី​ប្រកាស​នេះ​ក៏​នាំ​ឱ្យ​យល់​ដែរ​ថា​ ឈ្មោះ​ al-Qurashi ​ជា​អ្នក​ប្រាជ្ញ​និង​ជា​អ្នក​ចម្បាំង​ផង​ដែរ​ដោយ​បាន​ហៅ​គាត់​ថា​ «អ្នកប្រាជ្ញ​ម្នាក់​ក្នុង​បណ្តា​ពួក​អ្នកប្រាជ្ញ»។ សារ​នោះ​និយាយ​ថា​គាត់ «បាន​វាយ​ប្រហារ​អ្នក​ការ​ពារ​ប្រទេស​អាមេរិក​កាន់​គ្រិស្ត​សាសនា»។

នៅ​ពេល​ដែល​ទីភ្នាក់​ងារ​ស៊ើប​ការ​សម្ងាត់​ស.រ.អា.​កំពុង​ពិនិត្យ​សារ​សំឡេង​កាល​ពី​ថ្ងៃព្រហស្បតិ៍​នោះ​ ពួក​មន្ត្រី​មិន​ទាន់​ធ្វើការ​កំណត់​ជា​សាធារណៈអំពី​អត្តសញ្ញាណ​ពិត​ប្រាកដ​របស់​ al-Qurashi ​នៅ​ឡើយ​ទេ។

មន្ត្រី​និង​អ្នក​វិភាគ​ខ្លះ​បាន​និយាយ​ស្មានៗ​ថា​ al-Qurashi ប្រហែល​ជា​ Hajji Abdallah ​ដែល​ជា​អ្នក​មនោគមវិជ្ជា​ម្នាក់​ក្នុង​បណ្តា​ពួក​អ្នក​មនោគម​វិជ្ជា​ជាន់​ខ្ពស់​របស់​ពួក​រដ្ឋ​ឥស្លាម៕

XS
SM
MD
LG